‘Pian Niyabawag so Ngaran nen Jehova’

DIAD sankamundoan et aapresyaen iray magasin a Say Panag-Bantayan tan Awake! lapud maespiritual a lugan tan makaibangat a kablian na saratan. Satan a panangapresya so nipatnag ed onggendan ya agano nin sulat na sakey a managbasa a taga-Pransya:

“Sakey ak a malangwer a biin tubo ed Aprika, a walaan na abeban aral. Nen agano ni et ginapoan koy manbasa na saray magasin yo. Diad impakasagyat ko ed saray tema, amoriak so kaimportantian na panagbasa. Salamat ed sikayo, apaaligwas koy bokabularyok tan mas daiset lay lingok no mansusulat ak.

“Pandinayewan koy pangipapalapag yo ed saray artikulo ed kada teman nipaakar ed totoo, planeta, tan say Manamalsa. Main-inomay a talosan iratan ya artikulo a pagmaliwen dan mapetepet a manbasa so sakey a too. Anggapo lay arum a makapangibangat ed amin a klase na totoo a manbabansag.

“Mandinayew ak met sanen anengneng ko a gagawaen iyan amin aliwan pian pakalmoay kuarta, noagta pian niyabawag lambengat so ngaran nen Jehova. Amtak ya aabobonan to kayo, tan misalsalamat ak ed sikayo. Itultuloy yo komon so mangalay biskeg ed Manamalsa pian manbangat.”

Diad kaplesan et mibibiang iray Tasi nen Jehova ed kimey a panagbangat ed Biblia diad 235 a daldalin. Nipapalapag so Say Panag-Bantayan ed 148 a lenguahe tan say Awake! ed 87. Ag-ipapalapag irayan dyurnal pian irayew so siopaman a too. Say nibase ed Biblian simbawa tan nipanpanaon ya impormasyon a lugan na saraya so denesinyo pian igalang so Manamalsa, ya angikuan: “Siak si Jehova . . . ya angibangat ed sika na nipaakar ed nabang mo.” (Isaias 48:17) Komon ta nagunggonaan ka diad regular a pambasa na Masanton Kasulatan ontan met ed sarayan katulongan ed panagaral na Biblia.