“Sikayo Komon so Misalsalamat”

“Manari komon so deen nen Kristo ed kapusoan yo, . . . tan sikayo komon so misalsalamat.”​—COLOSAS 3:15.

1. Anto so naiimatonan tayon pandumaan na Kristianon kongregasyon tan say mundon babanlongan nen Satanas?

 DIAD 94,600 a kongregasyon na saray Tasi nen Jehova ed sankamundoan, naromog tayo so espiritu na pisasalamat. Diad kada aral da et lulukasan tan sasampotan itan na pikakasi a mangilaktip ed saray balikas na pisasalamat ed si Jehova. Naynay tayon narengel so balikas a “salamat,” “anggapoy wala,” odino arum niran salita ya ibabalikas na saray kalangweran tan maedad la ontan met ed balo ni tan abayag laran Tasi legan na pibibiang da ed panagdayew tan maliket a panlilimog. (Salmo 133:1) Agaylay pidumaan na satan ed inkasiblet ya ipapatnag na dakel ya ‘agmikabat ed si Jehova tan ag-ontutulok ed ebanghelyo’! (2 Tesalonica 1:8) Manbibilay itayo ed mundon agmangipapatnag na pisasalamat. Tan ag-itan pankelawan sano nodnonoten tayo no siopa so dios na sayan mundo​—si Satanas a Diablo, say manunaan a manangiyalibansa ed binubukor ya awawey, a say inkamapaatagey tan inka-rebelyoso to et mangiimpluensya ed sosyedad na totoo!​—Juan 8:44; 2 Corinto 4:4; 1 Juan 5:19.

2. Anton pasakbay so nakaukolan tayon talinengen, tan antoran tepet so konsideraen tayo?

² Lapud apaliberan itayo na mundo nen Satanas, nakaukolan a manalwar itayo ya agnaimpluensyaan ed saray awawey na satan. Nen inmunan siglo, pinanonotan nen apostol Pablo iray Kristianon taga-Efeso: ‘Nanakar kayo nensaman a panaon unong ed kaugalian na sayan mundo, unong ed pangulo na pakayari dagem, na espiritu a natan manggawa ed saray anak na kasusumpa; diad pegley na saraman sikatayo met ya amin nensaman a panaon nambilay itayo ed saray kaalakan na laman tayo, a sinumpal tayo so saray kaliktan na laman tan saray kanonotan, tan dia ed inkatoo anak to itayo ed sanok, a singa saray arum.’ (Efeso 2:2, 3) Ontan met so dakel natan. Panon tayo sirin a napansiansia so espiritu na pisasalamat? Anton tulong so itatarya nen Jehova?  Diad antoran praktikal a paraan a nipatnag tayo so peteg a pisasalamat tayo?

Saray Rason ed Pagmaliw a Misalsalamat

3. Anto so pisalamatan tayo ed si Jehova?

³ Si Jehova a Dios, say Manamalsa tan Manangiter-bilay tayo, so manepeg a pisalamatan tayo, nagkalalo la no nodnonoten tayo so pigara ed mabunlok ya ipapalangkap to ed sikatayo. (Santiago 1:17) Diad inagew-agew et pisalamatan tayo si Jehova lapud ta mabilay itayo. (Salmo 36:9) Naimano tayo ed kaliberliber tayo so daakan ya ebidensya na ginawa la nen Jehova, a singa say agew, bulan, tan bibitewen. Saray manangiter-bilay a mineral a daakan a nitarya ed planeta tayo, say balansin impanlalaok na saray makanan gas ed liwang tayo, tan saray komplikadon sikulo na palsa so mamaneknek ya amin ed walan utang na linawa tayo ed maaron Ama tayo ed tawen. Oniay inkanta nen Arin David: “Amayamay ira, O Jehova a Dios ko, so saray makapakelaw a gawam a ginawam, tan saray nonot mo nipaakar ira ed sikami: ag-ira nisalaysay a mauksoy ed sika: no komon ta ipaliwawak tan salitaen ko ra, dakel ni ra nen saray nayari a bilangen.”​—Salmo 40:5.

4. Akin a nepeg tayon pisalamatan si Jehova ed maliket a panlilimog tayo diad saray kongregasyon tayo?

⁴ Anggaman agni ira manaayam ed literal a paraiso, panggagayagaan la natan na saray lingkor nen Jehova so espiritual a paraiso. Diad saray Kingdom Hall tan diad saray kombension tan asamblea tayo, nalilikna tayo so ikukurang na bunga na espiritu na Dios ed saray kapananisiaan tayo. On, sano manpupulong ed totoo a walaan na samet odino andian na relihyoson abenegan, tutukoyen na arum a Tasi so deneskribe nen Pablo ed sulat to ed saray taga-Galacia. Ipaimano ra nin unona iray ‘gawa na laman’ tan tepetan da iray onderengel ed sikara no anto so naoobserbaan da. (Galacia 5:19-23) Maslak so miabobon a napatnagan iratan ed sosyedad na totoo natan. Sano nipaimano ed sikara so deskripsion na bunga na espiritu na Dios tan naimbitaan ira ed Kingdom Hall pian naimatonan da iyan mismo, dakel so tampol a mamidbir: “Say Dios wala ed sikayo dia ed tua.” (1 Corinto 14:25) Tan aliwa lambengat a diad Kingdom Hall so pakaromogan ed satan. Inerman so laen yo, sano nakatongtong yo so sakey ed masulok ya anemiran milyon a Tasi nen Jehova, naromog yo met so ontan a maliket tan magayagan espiritu. On, sayan makapabiskeg a panlilimog so rason pian pisalamatan tayo si Jehova, a mangiiter ed espiritu to pian magmaliw itan a posible.​—Sofonias 3:9; Efeso 3:20, 21.

5, 6. Panon tayon nipatnag so pisasalamat tayo ed sankabalegan a regalo na Dios, say dondon?

⁵ Say sankabalegan a regalo, say ayadyarin palangkap nen Jehova, et say Anak to, si Jesus, a diad panamegley to et nitarya so dondon bagat. Oniay insulat nen apostol Juan: “No say Dios ontan so impangaro to ed sikatayo, nepeg met a manaaroan so sakey tan sakey ed sikatayo.” (1 Juan 4:11) On, nipatnag tayo so pisasalamat ed dondon ya aliwa lambengat diad pangibalikas ed aro tan pisasalamat tayo ed si Jehova noagta diad pambilay met ed paraan a pakapatnagan na aro ed arum.​—Mateo 22:37-39.

⁶ Dakel ni so naaralan tayo nipaakar ed panangipatnag na pisasalamat diad pangonsidera tayo ed impideneng nen Jehova ed Israel nensaman. Diad panamegley na Ganggan, ya inter to ed nasyon panamegley nen Moises, dakel a leksion so imbangat nen Jehova ed totoo to. Panamegley na ‘nengneng na kakabatan tan katuaan a wala ed Ganggan,’ dakel so naaralan tayo a makatulong ed sikatayon ontumbok ed simbawa nen Pablo: “Sikayo komon so misalsalamat.”​—Roma 2:20; Colosas 3:15.

Taloran Leksion Diad Mosaikon Ganggan

7. Panon a say uksoyan na panangiter na kakaplo so angiter na pankanawnawa ed saray Israelita a mangipatnag ed pisasalamat da ed si Jehova?

⁷ Diad Mosaikon Ganggan, intarya nen Jehova so taloran paraan a nipanengneng na saray Israelita so peteg ya apresasyon da ed kaabigan to. Unona, wala so kakaplo. Say kakaplo na saray bunga na dalin, pati say “kakaplo na manada na baka tan manada na karnero,” so magmaliw a “masantos naani ed kinen Jehova.” (Levitico 27:30-32) Sanen tinmulok iray Israelita, sikara so daakan a benendisyonan nen Jehova. “Yakar yo dia so amin a kakaplo ed kamalir, pian wala komon so tagano ed abung ko, tan salien yo ak natan ed saya, kuan nen Jehova na saray ehersito, no siak agko naani lukasan ed sikayo so saray pinto na tawen, et ikalbok naani ed sikayo so sakey a bendisyon, ya anggapo naani so pasen a makasarag a mangawat ed sikato.”​—Malaquias 3:10.

8. Anto so pandumaan na boluntaryo iran apay tan say panangiter na kakaplo?

⁸ Komadua, nilikud ed kakaukolanen a pangiter na kakaplo, inyuksoy nen Jehova parad saray Israelita so pangiter na boluntaryon kontribusyon. Binilin to si Moises ya oniay ibaga to ed saray Israelita: “Sano makaloob kayo ed dalin a pangiyakaran ko ed sikayo. Nagawa naani ed satan a, no mangan kayo na tinapay na dalin, mangiyapay kayo naani na sakey ya ipaayag a yaapay ed kinen Jehova.” Arum ed saray unonan ‘masa na arina a nepeg ya iyapay a bibingka’ et iyapay bilang “pangiteran [odino kontribusyon] naani ed kinen Jehova” diad interon kailalakan da. Imanoen pa ya anggapo so kinaukolan ya espisipikon karakel na sarayan unonan bunga. (Numeros 15:18-21) Balet sanen angiter iray Israelita na kontribusyon da bilang pisasalamat, sikara so apaseguroan ed panamendisyon nen Jehova. Ontan met ya uksoyan so anengneng ed pasingawey ed si Ezequiel nipaakar ed templo. Oniay nabasa tayo: “Say unona ed saray  amin ya unona a bunga na amin a nengneng, tan amin a bagat ya amin a nengneng, ed saray amin a bagat yo, nipaakar ira naani ed saray saserdote; iter yo met ed saray saserdote so unona a kinames yo, pian sakey a bendisyon a panayamen to ed abung mo.”​—Ezequiel 44:30.

9. Anto so imbangat nen Jehova panamegley na probisyon a panagtodtor?

⁹ Komatlo, inyuksoy nen Jehova so panagtodtor. “Sano anien yo so bunga na dalin yo, agmo lalaosen ya amin so suysuyok na umam, nisay tiponen mo naani so alaglagsanan ed impan-anim. Agmo nepeg ya akukusen so kaubasan mo, nisay tiponen mo so napnaplag a bungabunga na kaubasan mo; ikeram ira naani ya onkana ed saray duruka, tan saray sangsangkaili: Siak si Jehova a Dios mo.” (Levitico 19:9, 10) Maminsan lamet, anggapo so kinaukolan ya espisipikon karakel. Akauley so kada Israelita no panon karakel so itilak to parad saray mankaukolan. Oniay matukoy ya insalaysay nen makabat ya Arin Solomon: “Say walaan na panangasi ed duka pautangen to si Jehova, et say maong a gawa to ipawil to ed sikato a bayaran.” (Uliran 19:17) Kanian imbangat nen Jehova so panangabagey tan pangikonsidera ed saray mankaukolan.

10. Antoray nansumpalan na saray totoo ed Israel sanen agda la nipatnag so pisasalamat da?

¹⁰ Benendisyonan nen Jehova iray Israelita sanen sikara so matulok ya angitarok na kakaplo, angiter na saray boluntaryon kontribusyon da, tan angitarya parad saray mairap-bilay. Balet sanen agla nipatnag na totoo na Israel so pisasalamat da, naandi ed sikara so pabor nen Jehova. Saya so angitonton ed inkadesyang tan inkadestiero ra ed saginonor. (2 Awaran 36:17-21) Anto sirin iray leksion parad sikatayo?

Saray Pakapatnagan ed Pisasalamat Tayo

11. Anto so manunan paraan a nipatnag tayo so pisasalamat tayo ed si Jehova?

¹¹ Say manunan paraan a nisaklang tayo so dayew ed si Jehova tan nipatnag tayo so pisasalamat ed sikato et mangilalanor met ed sakey ya “apay.” Tua, bilang Kristianos et anggapo tayo la ed silong na Mosaikon Ganggan, ya obligadon mangiyapay na saray bagat ya ayayep odino saray inani. (Colosas 2:14) Anggaman kuan, oniay impaseseg nen apostol Pablo ed saray Hebreon Kristiano: “Mangisaklang itayo ed Dios a naynay na bagat a panangidayew, salanti, say bunga na saray bibil a mangiwakawak na ngaran to.” (Hebreos 13:15) Diad pangikana tayo ed saray abilidad tan kaykayarian tayo pian iyapay so bagat na panangidayew ed si Jehova, balanglan diad mapublikon ministeryo odino diad ‘saray muyong odino kongregasyon’ na saray kaparan Kristiano, nibalikas tayo so impapuson pisasalamat ed maaron Ama tayo ed tawen, si Jehova a Dios. (Salmo 26:12) Pian nagawaan itan, anto so naaralan tayo ed saray paraan a nepeg a pangipatnag na saray Israelita ed pisasalamat da ed si Jehova?

12. No nipaakar ed responsabilidad tayo bilang Kristiano, anto so naaralan tayo ed uksoyan nipaakar ed panangiter na kakaplo?

¹² Unong ed siningbat tayo la, say unona et kinaukolan so uksoyan na panangiter na kakaplo; kada Israelita so obligado ed sayan pamaakaran. Bilang Kristiano, walaan itayo na responsabilidad a mibiang ed ministeryo tan onatendi ed saray Kristianon miting. Kakaukolanen irayan kimey. Diad malaknab a propesiya to nipaakar ed panaon na anggaan, oniay mabitar ya inkuan nen Jesus: “Saya ya ebanghelyo na panarian nipulong naani ed sankamundoan ya onkanan pamintuan ed saray amin a nasyones; et saman la onsabi so anggaan.” (Mateo 24:14; 28:19, 20) Nipaakar ed saray Makristianon miting, si apostol Pablo so apuyanan a mangisulat: “Manpapagalangan itayo ed sakey tan sakey pian manaayatan itayo ed aro tan dia ed saray maabig a gawa; ya agtayo paulyan so saray panmumuyong tayo, singa ugali na saray arum, noag ingen mansisimbawaan itayo; tan nagkalalo la, lapud nanengneng yo a manasingger so agew.” (Hebreos 10:24, 25) Nipanengneng tayo so pisasalamat tayo ed si Jehova sano magayaga tayon awaten so responsabilidad tayon manpulong tan manbangat ontan met ed regular a pilimog ed saray agagi tayo diad saray miting ed kongregasyon, a moriaen itan bilang pribilehyo tan kagalangan.

13. Anton leksion so naaralan tayo nipaakar ed saray uksoyan a boluntaryon kontribusyon tan panagtodtor?

¹³ Niarum ni, nagunggonaan itayo diad pangonsidera ed duara nin probisyon a pakapatnagan komon ed apresasyon na saray Israelita ​—saray boluntaryon kontribusyon tan say panagtodtor. Midumaan ed panangiter na kakaplo, a sakey a kakaukolanen tan walaan na espisipikon pipapaknaan, saray boluntaryon kontribusyon tan say uksoyan na panagtodtor so agmankaukolan na nigetar a kantidad o karakel. Imbes, saratan so angiyabuloy ed kinaaralem na apresasyon na sakey a lingkor nen Jehova unong ed impamakiwas na puso to. Diad mipadparan paraan, anggaman aapresyaen tayo a say pibibiang ed ministeryo tan iyaatendi ed saray Makristianon miting et manunan responsabilidad na kada lingkor nen Jehova, kasin interon-kamarerwa tan mabulos itayon mibibiang ed saratan? Kasin momoriaen tayo iratan bilang pankanawnawan nipatnag tayo so masimoon ya apresasyon tayo ed amin a ginawa la nen Jehova parad sikatayo? Kasin mabulos itayon mibibiang ed sarayan kimey, anggad iyaabuloy na saray sirkumstansya na balang sakey ed sikatayo? Odino momoriaen tayo lambengat iraya bilang obligasyon a kaukolan tayon sumpalen? Siempre, saraya so tepet a personal tayon ebatan. Oniay impangibalikas nen apostol Pablo ed satan: “Balang sakey patnagen to komon so gawa ton dili, et dia ed ontan wala naani sirin so like’to nipaakar ed sikato.”​—Galacia 6:4.

14. Anto so iilaloan nen Jehova ed sikatayo diad panaglingkor tayo ed sikato?

¹⁴ Amtan tuloy nen Jehova a Dios iray kipapasen tayo pati saray limitasyon tayo. Papablien to iray iyaapay, baleg man odino melag iratan, a mabulos ya isasaklang na saray lingkor to. Agto iilaloan ya amin tayo et parepareho so karakel na niiter tayo, nisay iilaloan ton nayarian tayon iter itan. Sanen siningbat to so nipaakar ed panangiter na materyal, oniay imbaga nen apostol Pablo ed saray Kristiano a taga-Corinto: “No wadtan so kasiglatay linawa, naawat so unong na wala ed sakey a too, aliwa ya unong na anggapo ed sikato.” (2 Corinto 8:12) Sayan prinsipyo so onaplika met a tuloy ed panaglingkor tayo ed Dios. Pian magmaliw a makapaliket ed si Jehova so panaglingkor tayo, ag-itan nadetermina ed karakel noagta diad paraan na panggagawa tayo ed satan​—magayaga tan sigpot-puso.​—Salmo 100:1-5; Colosas 3:23.

Bayuboan tan Pansiansiaen so Espiritu na Panagpayunir

15, 16. (a) Anto so pisiglaotan na panagpayunir a ministeryo tan say pisasalamat? (b) Panon a nipatnag na saramay agmakapanpayunir so espiritu na panagpayunir?

¹⁵ Say makapatumang a paraan pian nipatnag  tayo so pisasalamat tayo ed si Jehova et diad iloob ed sigpot-panaon a ministeryo. Lapud apakiwas ira ed aro ra ed si Jehova tan pisasalamat ed agkanepegan a panangasi to, dakel a dedikadon lingkor so nanggawa na baleg a pananguman ed bilay da pian mas dakel a panaon so nausar da ed panaglingkor ed si Jehova. Arum so makapanlilingkor bilang regular payunir, a manguusar na promedyon 70 ya oras ed kada bulan diad panangipulong na maong a balita tan panangibangat na katuaan ed totoo. Say arum, a nayarin walaan na limitasyon lapud nanduruman kipapasen, so panapanaon a manguusar na 50 oras ed kada bulan ed panagpulong bilang auxiliary payunir.

¹⁶ Balet komusta so nipaakar ed dakel a lingkor nen Jehova ya agmakapan-regular odino auxiliary payunir? Nipatnag da so pisasalamat da diad pamayubo tan pamasiansia ed espiritu na panagpayunir. Panon? Diad pamaseseg ed saramay nayarian day manpayunir, diad pangipaslep ed ananak da a manpilalek ed karera na sigpot-panaon a serbisyo, tan diad maseet a pibibiang ed panagpulong unong ed saray sirkumstansya ra. Say nagawaan tayo diad ministeryo tayo so akadepende ed kinaaralem na apresasyon na kapusoan tayo ed ginawa, gagawaen, tan gawaen ni nen Jehova parad sikatayo.

Ipatnag so Pisasalamat Diad Panamegley na Saray Mablin “Kayarian” Tayo

17, 18. (a) Panon tayon nipatnag so pisasalamat tayo diad panamegley na saray mablin “kayarian” tayo? (b) Anto so inkuan nen Jesus nipaakar ed kontribusyon na balon bii, tan akin?

¹⁷ “Igalang mo si Jehova [diad panamegley na saray mablin] kayarian mo,” so inkuan na Uliran 3:9, “tan pati saray manunaan a bunga na amin a munat mo.” Saray lingkor nen Jehova so agla nakaukolan a mangiter na kakaplo. Imbes, oniay insulat nen Pablo ed kongregasyon na Corinto: “Balang sakey gawaen to komon so ginetma to ed puso to; aliwa a dia ed kaermenan odino dia ed pasootan; ta say Dios aroen to so sililiket a mangiter.” (2 Corinto 9:7) Say pangiter na boluntaryon kontribusyon pian suportaan so sankamundoan a kimey na panangipulong na Panarian so mangipatnag met ed pisasalamat tayo. Say masimoon a pisasalamat tayo so mamakiwas ed sikatayo a maparanay a manggawa ed satan, a nayarin sinimba ni ingen a mangigana parad satan, a singa ginawa la na saray inmuunan Kristiano.​—1 Corinto 16:1, 2.

¹⁸ Aliwan say karakel na iter tayo so mangipatnag ed pisasalamat tayo ed si Jehova. Imbes, say espiritu ya ipapatnag tayo. Ontan so naimano nen Jesus sanen iimatonan to iray totoon mangipepelag ed saray langkap da diad panangiyatolan na tukdol diad templo. Sanen anengneng nen Jesus so pobrin balo ya angipelag na “duaran marabilis,” oniay inkuanto: “Tua kuan ko ed sikayo, sayan duka a balon bii angipelag na dakdakel nen sikara ya amin. Ta amin so saraya dia ed masulok ed sikara so angalaan da na ipelag da ed saray tukdol; ingen sikato dia ed kakulangan to impelag to so amin a pantagano a wala ed sikato.”​—Lucas 21:1-4.

19. Akin a maabig ya usisaen lamet iray paraan na pangipapatnag tayo ed pisasalamat tayo?

¹⁹ Komon ta sayan inaral tayo ed no panon a nipanengneng so pisasalamat tayo so mamakiwas ed sikatayon mangusisa lamet ed saray paraan na pangipapatnag tayo ed pisasalamat tayo. Nayarian tayo kasin padaaken so bagat na panangidayew tayo ed si Jehova ontan met ed panusuporta tayo ed sankamundoan a kimey tayo diad materyal a paraan? Anggad nagagawaan tayo itan, napaseguroan itayo a napaliket tayo so mabunlok tan maaron Ama tayo, si Jehova, diad pangipatnag tayo na pisasalamat tayo.

Kasin Natandaan Yo?

• Parad antoran rason a nepeg itayon magmaliw a misalsalamat ed si Jehova?

• Antoran leksion so naaralan tayo ed panangiter na kakaplo, boluntaryon kontribusyon, tan panagtodtor?

• Panon tayon nabayuboan so espiritu na panagpayunir?

• Panon tayon nausar iray mablin “kayarian” tayo pian napisalamatan tayo si Jehova?

[Tepetepet Parad Panagaral]

[Saray litrato ed pahina 15]

“Amin a maong a palangkap tan amin ya ayadyarin palangkap manlapu ed tagey”

 [Saray litrato ed pahina 16]

Anton taloran leksion na Ganggan so nipabitar dia?

[Saray litrato ed pahina 18]

Antoray nasarag tayon iyapay?