Makapanisia Ka ed Paraison Dalin

DIAD interon awaran, minilyon a totoo so manisia a diad kaunoran et taynan da so dalin tan onla ra ed tawen. Moriaen na arum ya agbalot ginetma na Manamalsa tayo a say dalin so permanentin ayaman tayo. Alodloor ni ingen so panmoria na saray asetiko. Moriaen na dakel ed sikara a say dalin tan amin a materyal a bengatla et mauges​—a makaamper ed peteg a pakapenek ed espiritual tan inkaapit ed Dios.

Saramay anibukel ed saratan ya ideya so balanglan agmikabat ed imbaga na Dios nipaakar ed paraison dalin odino gagagalaen dan ibaliwala itan. Diad tua et dakel natan so ag-interesadon mangusisa ed sayan pamaakaran ya impaikurit na Dios ed saray pinuyanan ton lalaki diad Salita to, say Biblia. (2 Timoteo 3:16, 17) Balet agta makabat so panmatalek ed Salita na Dios nen say pangawat ed saray teorya na totoo? (Roma 3:4) Diad tua et makanakana so panggawa tayo ed satan, lapud papasakbayan itayo na Biblia a say makapanyari ingen ta agnanengneng a mauges a pinalsa so mamubulag ed katooan diad espiritual a paraan tan sikato natan so ‘mantitila ed lapag na sankamundoan.’​—Apocalipsis 12:9; 2 Corinto 4:4.

Akin a Pakawewetwetan?

Lapud mansusumlangan iran ideya nipaakar ed kamarerwa, saray totoo so nawewetwet nipaakar ed gagala na Dios ed dalin. Dakel so manisia a walaan itayo na ag-ompatey a kamarerwa​—a bengatlan biig manlapud laman na too tan makaliktar ed ipapatey. Say arum so manisia a wala la so kamarerwa antis ya apalsa so laman na too. Unong ed sakey a reperensya, minoria na Griegon pilosopo a si Plato a say kamarerwa so “impisok ed laman bilang dusa ed saray kasalanan ya agawaan na satan sanen wala’d tawen.” Mipadpara, inkuan na say komatlon-siglon teologo a si Origen a “nankasalanan iray kamarerwa [diad tawen] antis iran nikasakey ed laman” kanian saratan so “inkulong [ed satan a laman diad dalin] bilang dusa ed saray kasalanan da.” Tan panisiaan na minilyon a say dalin so panagsubokan labat ed too sakbay ya onla ed tawen.

Nanduruma met iray ideya nipaakar ed no anto so nagawa ed kamarerwa sano ompatey so too. Unong ed libron History of Western Philosophy, saray Ehipsio so awalaan na panmorian “saray kamarerwa na inaatey so linmasur ed mundo na inaatey.” Diad saginonor et insuppiat na saray pilosopo a saray kamarerwa na inaatey so agtalaga linmasur ed ambilunget a mundo na inaatey noagta sinmegep ed atagtagey ya espiritun ayaman. Ibabaga ran panisiaan na Griegon pilosopo a si Socrates a diad ipatey et say kamarerwa so “onsian ya onla ed [sakey ya] agnanengneng a pasen . . . tan manayam la diman lawas a kaiba iray dirios.”

Anto so ibabaga na Biblia?

Anggapoy ibabaga na pinuyanan a Salita na Dios, say Biblia, a walaan so totoo na ag-ompatey a kamarerwa. Pibasam pa so salaysay diad Genesis 2:7. Inkuan na satan: “Si Jehova a Dios, say sapok na dalin so ginawa to a too, tan inlinawa to ed saray sangab na eleng to so linawa na bilay; et say too nagmaliw a mabilay a sikakamarerwa [“kamarerwa,” NW].” Satan so malinew tan mainomay a natalosan. Sanen pinalsa na Dios so inmunan too, si Adan, Sikatoy ag-angitekep na sakey ya elementon aliwan pisikal. Andi, lapud ibabaga na Biblia a ‘say too so nagmaliw a mabilay a kamarerwa.’ Say too et agpanaayaman na kamarerwa. Sikato so kamarerwa.

Diad impamalsa to ed dalin tan say pamilya na too, agginetma nen Jehova ya ompatey so  too. Say gagala na Dios et manbilay so totoo ya andi-anggaan diad dalin, diad Paraiso iran kipapasen. Inatey si Adan lapud sinumlang to so ganggan na Dios. (Genesis 2:8, 15-17; 3:1-6; Isaias 45:18) Sanen inatey so primeron too, kasin sikatoy linma ed pasen na saray espiritu? Andi! Sikato​—say kamarerwan Adan​—so pinmawil ed andiay-bilay a dabok ya amalsaan ed sikato.​—Genesis 3:17-19.

Amin tayo so akatawir ed kasalanan tan ipapatey manlapud inmunan ateng tayon si Adan. (Roma 5:12) Sayan ipapatey so sampot na kiwawala, a singa ed impanampot nen Adan. (Salmo 146:3, 4) Diad tua et agbalot insiglaot na amin a 66 a libro na Biblia iray terminon “ag-ompatey” odino “andi-anggaan” ed salitan “kamarerwa.” Diad kasunian, malinew ya ibabaga na Kasulatan a say kamarerwa​—say too​—so mortal odino ompatey.​—Eclesiastes 9:5, 10; Ezequiel 18:4.

Kasin Sipor lan Mauges Iray Materyal a Bengatla?

Komusta so ideya a mauges iray materyal a bengatla, a pati say dalin? Ontan so papanisiaan na saray patumbok na Manichaeism, sakey a relihyoson grupo ya inletneg na sakey a toon manngaran na Mani diad Persia legan na komatlon siglo K.P. Oniay ibabaga na The New Encyclopædia Britannica: “Say Manichaeism so linmesa lapu ed egagel a nisipor la ed kipapasen na too.” Panisiaan nen Mani a say too et “dayo, agnaanosan, tan sigpot a mauges.” Panisiaan to met a say pakalukpos lambengat ed sayan “egagel” et say pakalukpos na kamarerwa ed laman, ya ontaynan ed dalin, tan makarateng ed espiritual a kiwawala diad mundo na espiritu.

Diad pisunian, ibabaga ed sikatayo na Biblia a diad imaton na Dios et “amin a bengatla a ginawa to” sanen pinalsa toy dalin tan sankatooan so “maong iran tuloy.” (Genesis 1:31) Diad saman a panaon et anggapo so babeng ed baetan na totoo tan say Dios. Nanggayagaan nen Adan tan Eva so maapit a pisisiglaotan ed si Jehova, unong a nanggayagaan met na ayadyarin toon si Jesu-Kristo so maapit a pisisiglaotan ed mangatatawen ya Ama to.​—Mateo 3:17.

No agginemtan na saray inmunan ateng tayo, si Adan tan si Eva, so mankasalanan, sikaray magnayon ya awalaan komon na maapit a pisisiglaotan ed si Jehova a Dios diad paraison dalin. Sikara so ginmapon nambilay diad Paraiso, lapud oniay ibabaga ed sikatayo na Kasulatan: “Si Jehova a Dios angitanem na sakey a  tanamanan ed Eden ed dapit bukig; et diman to impasen so too a ginawa to.” (Genesis 2:8) Diad satan a paraison hardin so amalsaan ed si Eva. No agnankasalanan si Adan tan Eva, sikara tan saray ayadyarin ilalak da so maliket komon a mankimey a saniiba anggad magmaliw a paraiso so interon dalin. (Genesis 2:21; 3:23, 24) Say mangaraldalin a Paraiso so panayaman komon na katooan diad andi-anggaan.

Akin a Walaray Onla ed Tawen?

‘Balet,’ nayarin ikuan yo a, ‘sinaglawi na Biblia a walaray totoo ya onla ed tawen, agta ontan?’ On. Kayari na impankasalanan nen Adan, ginagala nen Jehova so mangiletneg na mangatatawen a Panarian ya arum ed saray kapolian nen Adan et “manari ra ed tapew na dalin” a kaiba nen Jesu-Kristo. (Apocalipsis 5:10; Roma 8:17) Sikaray napaoli ed imortal a bilay diad tawen. Say dagup a bilang da et 144,000, tan say primeron kabiangan ed saratan et saray matoor a babangatan nen Jesus nen inmunan-siglo.​—Lucas 12:32; 1 Corinto 15:42-44; Apocalipsis 14:1-5.

Anggaman ontan, aliwan datin gagala na Dios a taynan na saray maptek a totoo so dalin insan onla ira ed tawen. Diad tua et oniay inkuan nen Jesus sanen wadiad dalin: “Anggapo so too a sinmegep ed tawen, noag say linmasur nanlapu ed tawen, salanti, Anak na too, a wala ed tawen.” (Juan 3:13) Diad panamegley na “Anak na too,” si Jesu-Kristo, say Dios so angitarya na dondon pian saramay mangagamil na pananisia ed bagat nen Jesus so makagamor na andi-anggaan a bilay. (Roma 5:8) Balet iner so magnayon a panayaman na saratan a minilyon a totoo?

Nasumpal so Orihinal a Gagala na Dios

Anggaman ginagala na Dios so mangala ed sankatooan na saray magmaliw a kaiba nen Jesu-Kristo a manuley diad mangatatawen a Panarian, agkabaliksan na satan ya onla ed tawen so amin a maong a totoo. Pinalsa nen Jehova so dalin pian magmaliw a Paraison ayaman na katooan. Agla manbayag et sumpalen na Dios so orihinal a gagala to.​—Mateo 6:9, 10.

Diad silong na uley nen Jesu-Kristo tan saray kaiba ton manuley ed tawen, ontalona so kareenan tan liket diad interon dalin. (Salmo 37:9-11) Saraman so walad pakanodnonotan na Dios so napaoli tan manggayaga ed ayadyarin bunigas. (Gawa 24:15) Lapud inkamatoor da ed Dios, ipagamor ed matulok a katooan so abalang na saray inmunan ateng tayo​—say pambilay ya andi-anggaan na ayadyarin totoo diad paraison dalin.​—Apocalipsis 21:3, 4.

Si Jehova a Dios so seguradon manumpal ed saray ginagala to. Diad panamegley na propeta ton si Isaias, oniay inyabawag to: “Unong a say uran tan say musyak a lurem onlasor ira a manlapu ed tawen, et ag-ira ompawil diman noag ingen salogen da so dalin, tan pambungaen da tan pambukelen da, tan pangikdan to na bini ed saray managtanaman tan tinapay ed manangan. Ontan met naani so salitak ya ompaway ed sangik; sikato naani ag-ompawil ed siak a paoypaoy, noag ingen sumpalen to naani so kaliktan ko, tan onaligwas naani ed bengatla a pangiyakaran ko ed sikato.”​—Isaias 55:10, 11.

Panamegley na libro na Biblia ya Isaias, nilitrato tayo la ed nonot tayo no anto so kipapasen na bilay diad Paraison dalin. Anggapo so manaayam ed Paraiso a mangibagan, “Mabeblay ak.” (Isaias 33:24) Say too so agla sakitan na saray ayep. (Isaias 11:6-9) Saray totoo so mangipaalagey na mararakep ya abung tan manayam ed saratan tan sikaray mantanem na tantanaman tan napesel ira a mangan. (Isaias 65:21-25) Niarum ni, say Dios ‘akmonen to so patey ed ando lan ando tan say Katawan a Jehova punasen to naani so lua ya onagus ed saray amin a lupa.’​—Isaias 25:8.

Agla manbayag, say matulok a katooan so manbilay ed saratan ya alay abig a kipapasen. Sikaray “niliktar ed inkaaripen na kabulokan ya onloob ed kawayangan na gloria na saray anak na Dios.” (Roma 8:21) Agaylan makapaliket so manbilay ya andi-anggaan diad insipan a mangaraldalin a Paraiso! (Lucas 23:43) Makapambilay ka met ditan no onkiwas ka la natan unong ed suston pikakabat ed Kasulatan tan mangagamil na pananisia ed si Jehova a Dios tan si Jesu-Kristo. Tan makapanmatalek ka a makatunongan so panisia ed paraison dalin.

[Litrato ed pahina 5]

Si Adan tan Eva so ginetman manbilay ya andi-anggaan diad paraison dalin

 [Saray litrato ed pahina 7]

Diad mangaraldalin a Paraiso . . .

sikaray mangipaalagey na kaabungan

sikaray mantanem na saray ubasan

sikaray bendisyonan nen Jehova

[Picture Credit Line ed pahina 4]

U.S. Fish & Wildlife Service, Washington, D.C./NASA