Mantultuloy a Manlingkor a Benebenek

“Ipawil ko ed saray baley so malinis a pansasalita [“puron lenguahe,” NW], pian sikara ya amin tawagan da komon so ngaran nen Jehova, pian manlingkor ira ed sikato a benebenek.”​—SOFONIAS 3:9.

1. Anto so nagagawa bilang kasumpalan na Sofonias 3:9?

 NGALNGALI 6,000 a lenguahe so uusaren natan ed interon dalin. Nilikud ed saratan, wala so nanduruman dialekto, odino lokal a porma na lenguahe. Anggaman ontan, balanglan nanduruma so salita na totoo a singa say Arabe tan Zulu, walay nikadkaduman ginawa na Dios. Ginawa ton posibli parad totoo ed inerman a pasen so panaral tan pansalita ed saksakey a puron lenguahe. Saya so nagagawa bilang kasumpalan na sakey a sipan a niiter panamegley nen propetan Sofonias: ‘Ipawil ko [Jehova a Dios] ed saray baley so puron lenguahe, pian sikara ya amin tawagan da komon so ngaran nen Jehova, pian manlingkor ira ed sikato a benebenek.’​—Sofonias 3:9.

2. Anto so “puron lenguahe,” tan anto so nanggawan posibli ed satan?

² Say “puron lenguahe” et say katuaan na Dios a naromog ed Salita to, say Biblia. Nagkalalo la, satan so katuaan nipaakar ed Panarian na Dios, a mamasantos ed ngaran nen Jehova, mangiyalangon ed inkasoberano to, tan mangitarok na saray bendisyon ed katooan. (Mateo 6:9, 10) Bilang say alenleneg a lenguahe diad dalin a malinis ed espiritual, say puron lenguahe so sasalitaen na totoo ed amin a nasyon tan rasa. Ontutulong itan ed sikara a manlingkor ed si Jehova a “benebenek.” Sikara sirin so manlilingkor ed sikato a nankakasakey, odino “walaan na saksakey a panangabobon.”​—The New English Bible.

Anggapo so Panangidumaduma ed Sikara

3. Anto so ontutulong ed sikatayo a mankakasakey a manlingkor ed si Jehova?

³ ilang Kristiano, panliliketan tayo so pantutulongan ed limog tayo anggaman nandurumay lenguahe tayo. Anggaman ipupulong tayo so maong a balita na Panarian ed dakel a lenguahe na totoo, sikatayo so manlilingkor ed Dios tekep na pankakasakey. (Salmo 133:1) Posibli itan lapud, inerman a dalin so panaayaman tayo, mansasalita tayo na sakey a puron lenguahe diad kirayewan nen Jehova.

4. Akin ya anggapo so panangidumaduma ed limog na totoo na Dios?

⁴ Nepeg ya anggapo so panangidumaduma ed limog na totoo na Dios. Impabitar itan nen apostol Pedro sanen sikatoy nampulong ed ayaman na Gentil ya opisyal na sundalo a si Cornelio nen 36 K.P. tan sikato so apakiwas a mangikuan: “Tua a nanengneng ko a say Dios anggapo so pangiduma to ed saray totoo; noag ingen dia ed balang nasyon akoen to so antakot ed sikato tan manggawa na matunong.” (Gawa 10:34, 35) Lapud petepeteg itan, anggapo so naromog a panangidumaduma, panggrupo-grupo, odino pangipanengneng na paboritismo diad loob na Kristianon kongregasyon.

5. Akin a makapuy so pamawala na inkaapag-apag diad loob na kongregasyon?

⁵ Nipaakar ed imbisita to ed Kingdom Hall, oniay kuan na sakey ya estudyante ed kolehyo: “Kaslakan, tatangguyoren na saray relihyon iray kabiangan na sakey a rasa odino etnikon grupo. . . . Mankakayurongan iray Tastasi nen Jehova tan ag-ira agrupo-grupo.” Balet, arum a membro na kongregasyon ed Corinto nensaman so amalesa na saray grupo. Lapud satan ya inkaapag-apag, susumlangen da so ikukurang na masanton espiritu na Dios, lapud iyaalibansa na satan so pankakasakey tan kareenan. (Galacia 5:22) No iyalibansa tayo so inkaapag-apag ed loob na kongregasyon, onsusumlang tayo la ed panangiwanwan na espiritu. Kanian, nodnonoten tayo iray salita nen apostol Pablo ed saray taga-Corinto: “Pikasik sirin ed sikayo, agagi, dia ed ngaran na Katawan tayon Jesu-Kristo, ta sikayon  amin salitaen yo so saksakey a bengatla, tan anggapo so pansisian ed sikayo: noag ingen ayadyari a pannononong yo ed saksakey a nonot tan saksakey ya isip.” (1 Corinto 1:10) Indanet met nen Pablo so pankakasakey diad sulat to ed saray taga-Efeso.​—Efeso 4:1-6, 16.

6, 7. Anto so insimbawa nen Santiago nipaakar ed paboritismo, tan panon ya onaplika iray salita to?

⁶ Say agpanangidumaduma so lawas kakaukolanen ed saray Kristiano. (Roma 2:11) Lapud arum ed inmunan-siglon kongregasyon so angipatnag na paboritismo ed saray mayaman ya indibidual, oniay insulat na babangatan a Santiago: “Agagik ira, agyo agamilen so pananisia ed Katawan tayo a Jesu-Kristo, say Katawan na gloria, a wala so italonggaring ed saray katooan. Ta no ondago ed duypo yo so sakey a too ya akasingsing na balitok, tan sikakawes a maong, tan ondago met so sakey a too a makabos a sikakawes na marutak, et pampagaan yo so marakep so kawes to, tan kuan yo ed sikato: Yurong ka dia ed maong a pasen; et ikuan yo ed makabos: Manalagey ka tan, odino yurong ka’d tan ed leksab na toonan na salik: Agkayo kasi sirin manangibiig ed inkasikayo a dili, tan magmaliw kayo ya ukom a mauges iran nonot?”​—Santiago 2:1-4.

⁷ No onatendi ed Makristianon pantitipon iray mayaman ya agmananisia ya akasingsing na balitok tan akakawes na balibali ontan met ed saray pobrin agmananisia ya akakawes na maringdingot, saray mayaman so nikaduman tratoen. Sikara so payurongen da ed “maong a pasen,” bangta saray pobri so paalageyen odino payurongen da ed datal diad salian na sakey. Balet anggapoy panangidumaduman intarya na Dios so dondon bagat nen Jesus parad mayaman tan pobri. (Job 34:19; 2 Corinto 5:14) Kanian no labay tayon napaliket si Jehova tan manlingkor ed sikato a benebenek, agtayo nepeg ya ipatnag so paboritismo odino ‘irayew iray personalidad parad dilin pankaabigan tayo.’​—Judas 4, 16, NW.

Paliisan so Panagtalabutob

8. Anto so agawa lapud impanmeremere na saray Israelita?

⁸ Ta pian namantini tayo so pankakasakey tayo tan mantultuloy a nagamoran so pabor na Dios, nepeg tayon tuloken so simbawa nen Pablo a: “Gawa yo ya amin so bengatla ya anggapoy talabutob.” (Filipos 2:14, 15) Saray agmatoor ya Israelitas a nibulos ed panangaripen na Ehipto so nanmeremere sumpad si Moises tan Aaron tan anggan ed si Jehova a Dios. Lapud saya, amin a lalaki a man-edad na 20 a patagey, nilikud ed matoor a si Josue tan si Caleb tan saray Levita, so ag-akaloob ed Insipan a Dalin tan inatey ira legan na 40 taon ya impanteyengteyeng na Israel ed kalawakan. (Numeros 14:2, 3, 26-30; 1 Corinto 10:10) Agayla so inebatan da lapud panagmeremere!

9. Anto so asagmak nen Miriam lapud impanmeremere to?

⁹ Impatnag na satan so agawa ed interon nasyon a nanmeremere. Komusta balet iramay sinansakey a managmeremere? Bueno, oniay inmeremere na agi nen Moises, a si Miriam, pati say agi ton Aaron: “Si Moises ta labat so pisalitaan nen Jehova? Aglabat misalita kasi ed sikata?” Inyarum ni na salaysay: “Si Jehova nadngel to man.” (Numeros 12:1, 2) Antoy resulta? Si Miriam, a mapatnag ya angigaulo ed sayan impanreklamo, so inyabeba na Dios. Panon? Diad impakawalaan toy kating tan impakapaskar ton mansiansia ed paway na kampo ed loob na pitoran agew anggad sikatoy alinisan.​—Numeros 12:9-15.

10, 11. Say agnapugeran a panagmeremere so manresulta ed anto? Iyilustra.

¹⁰ Say panagmeremere so aliwa labat a panagreklamo nipaakar ed gawan-mauges. Saray managmeremere so maniisip a maong ed liknaan da odino posisyon da, ya ipapaarap da so imano ed sikara imbes a diad Dios. No ag-itan  naamper, pansengegan itan na inkaapag-apag ed limog na saray kapananisiaan tan napugeran na satan iray sagpot dan manlingkor a benebenek ed si Jehova. Tua itan lapud naynay ya ibebesngaw na saray managmeremere so reklamo ra, a seguradon maniilalo a misimpatya ed sikara so arum.

¹¹ Singa bilang, nayarin walay mankritiko ed pamebemben na sakey a matatken ed saray betang to diad kongregasyon odino diad panusumpal to ed saray obligasyon to. No dengelen tayo itan a reklamador, nayarin manisip tayo la a singa sikato. Sakbay a nitanem ed kanonotan tayo so bini na pakakaalipanesan, saray kimey na matatken so aliwa nin makaalipanes ed sikatayo, balet diad kaunoran et magmaliw lan ontan so panmoria tayo. Insan diad imaton tayo et anggapo la so dugan gagawaen na matatken, tan nayarin manreklamo tayo met la nipaakar ed sikato. Sayan klase na kondukta so agmanepeg ed kongregasyon na totoo nen Jehova.

12. Say panagmeremere so walaan na anton epekto ed relasyon tayo ed Dios?

¹² Say panagmeremere nipaakar ed lalaki a say obligasyon da et manpastol ed pulok na Dios so mangitonton ed pangayew. Say ontan a panagmeremere odino panagpauges ed sikara so pirmin maneral ed relasyon tayo ed si Jehova. (Exodo 22:28) Saray agmagbabawin manag-ayew so agmakatawir ed Panarian na Dios. (1 Corinto 5:11; 6:10) Oniay insulat nen babangatan a Judas nipaakar ed saray managmeremere ya ‘ipapasen dan andi-kana so pakauley tan papaugesen da iray atagey ya inkabetang,’ odino responsablin lalaki ed kongregasyon. (Judas 8) Saratan a managmeremere so andian na panangabobon na Dios, tan sikakabat tayon paliisan so marelmeng a kurang da.

13. Akin ya aliwan makapuy so amin a reklamo?

¹³ Balet, aliwan amin a reklamo et kainglit na Dios. Agto imbaliwala so “akis na reklamo” nipaakar ed Sodoma tan Gomorra noagta dineral to iratan a marelmeng a syudades. (Genesis 18:20, 21; 19:24, 25) Diad Jerusalem, kayarin tuloy na Pentecostes 33 K.P., “nantalabutob so saray Griego a Judio ya onsumpa ed saray Hebreos, lapud saray bibii a babalo ed sikara napapaulyan ira ed pannanabangan ya inagew-agew.” Kanian, pinetek na “labindua” so kipapasen diad impanuro na “pitoran lalaki a maong so dengel da” pian mangasikaso ed satan a “gawa” na panangiyutob na tagano. (Gawa 6:1-6) Saray mamatatken natan so agnepeg a ‘mamepet ed saray layag da’ ed makatunongan iran reklamo. (Uliran 21:13) Imbes a kritikoen iray kapananisiaan, nepeg a magmaliw a makapaseseg tan makapabiskeg iray mamatatken.​—1 Corinto 8:1.

14. Pian nipaliis ed panagtalabutob, anton kalidad so nagkalalo lan nakaukolan?

¹⁴ Amin tayo so nepeg ya ompaliis ed panagtalabutob, lapud makaderal ed espiritual so ontan ya awawey. Satan ya awawey so mamuyak ed pankakasakey tayo. Imbes, lawas tayon abuloyan so masanton espiritu a mamawala na aro ed sikatayo. (Galacia 5:22) Say itulok ed ‘maarin ganggan na aro’ so ontulong ed sikatayo a mantultuloy a manlingkor ed si Jehova a benebenek.​—Santiago 2:8, NW; 1 Corinto 13:4-8; 1 Pedro 4:8.

Pambantay Sumpad Panagpauges

15. Panon yon pandumaanen so panagtalabutob tan panagpauges?

¹⁵ Lapud say panagmeremere so mangitonton ed makaderal a talabutob, nepeg a manalwar itayo ed ibaga tayo. Say talabutob so anggapoy kakanaan a tongtong nipaakar ed totoo tan saray gagawaen da. Balet, say panagpauges et palson dalem a ginagalan maneral ed reputasyon na arum a too. Satan a tongtong so makapasakit tan agmaridios. Kanian oniay inkuan na Dios ed saray Israelita: “Agmo nepeg so mamatulo tan mamaleksab a singa managtongtong na panalabutob.”​—Levitico 19:16.

16. Anto so imbaga nen Pablo nipaakar ed pigaran managtalabutob, tan panon itayon naapektaan ed simbawa to?

¹⁶ Lapud manresulta ed panagpauges so andiay-kakanaan a tongtong, makpel a binaat nen Pablo so pigaran managtalabutob. Kayari ton sinaglawi iray abalo a kualipikado parad tulong na kongregasyon, tinukoy to iray abalo a ‘nailuam a mangiras ya onla ra ed saray kaabungan; tan aliwa labat a mangiras noag ingen matongtong ira tan misasalet, a salitaen da so saray bengatla  ya agda kanepegan.’ (1 Timoteo 5:11-15) No namoria na sakey a Kristianon bii a walay kakapuyan to ed panagtongtong a mangitonton ed panagpauges, nepeg ton tumboken so simbawa nen Pablo a magmaliw a ‘mabinta, aliwan managpauges.’ (1 Timoteo 3:11) Siempre, nepeg a manbantay met iray Kristianon lalaki sumpad makapasakit a panagtalabutob.​—Uliran 10:19.

Agmanguukom!

17, 18. (a) Anto so imbaga nen Jesus nipaakar ed panhusga ed agi tayo? (b) Panon tayon niyaplika iray salita nen Jesus nipaakar ed panaghusga?

¹⁷ Anggaman agtayo mamapauges na siopaman, nayarin kaukolan tayon pansagpotan a maong so ipaliis ed pagmaliw a maukom! Satan ya awawey so kinondena nen Jesus sanen inkuanto: “Agkayo mangukom, pian agkayo naukom. Ta say pangukom a pangukom yo, sikato so kaukoman yo; tan say sukat a panukat yo, sikatoy panukat naani ed sikayo. Et akin a nengnengen moy taep a walad matay agim, et agmo balet imanoen so pagsen a walad matam a dili? Ono panon so pangibagam ed agim, Maya ka, ta ekalen ko so taep ed matam; et anta, walad matam a dili so pagsen? Sika mansimpisimpitan, ekal mo nin unona so pagsen a walad matam a dili; et saman la makanengneng kan maliwliwawa a mangekal na taep a walad mata na agim.”​—Mateo 7:1-5.

¹⁸ Agtayo sasalien ya ekalen so “taep” ed mata na agi tayo pian sikatoy tulongan tayo anta say mismon abilidad tayon manhusga ed manepeg a paraan so apugeran la na sakey a piguratibon “pagsen.” Diad tua, no talagan natatalosan tayo so inkamapangasi na Dios, agtayo mainomay a husgaan iray kaagian tayo. Panon tayo iran posiblin natalosan a singa ed pakatalos ed sikara na mangatatawen ya Ama tayo? Agpankelawan a pinasakbayan itayo nen Jesus ya ‘agmanguukom pian agtayo naukom’! Say matuan pangikonsidera ed agtayo inkayadyari so nepeg a mangamper ed sikatayon manhusga, ya ipasen na Dios ya agmatunong.

Maletey Balet ta Kagalgalang

19. Panon tayon moriaen iray kapananisiaan?

¹⁹ No determinado tayon manlingkor ed Dios a benebenek kaiba iray kapananisiaan, agtayo labat paliisan so pagmaliw a maukom. Idaulo tayo so pangipatnag na galang ed sikara. (Roma 12:10) Diad tua, anapen tayo so pankaabigan da, aliwan say pankaabigan tayo, tan magayaga tayon gawaen iray mapaabeban kimey nisesengeg ed sikara. (Juan 13:12-17; 1 Corinto 10:24) Panon  tayon mantinien so ontan a maabig ya awawey? No nodnonoten a kada mananisia et mabli ed si Jehova tan nakaukolan tayo so balang sakey, singa ed kada kabiangan na laman na too et akadependi ed arum a kabiangan.​—1 Corinto 12:14-27.

20, 21. Anto so kabaliksan ed sikatayo na saray salita na 2 Timoteo 2:20, 21?

²⁰ Tua, saray Kristiano et lupok iran banga ya angimatalekan na matalonggaring a kayamanan na ministeryo. (2 Corinto 4:7) Ta pian nagawaan tayo iyan sagradon kimey a kirayewan nen Jehova, nepeg tayon mantinien so mapagalang a talindeg ed arapan to tan say Anak to. Diad pansiansian malinis ed moral tan espiritual et makapansiansia itayon mapagalang a baseha ya usaren na Dios. Nipaakar ed saya, oniay insulat nen Pablo: “Dia ed sakey ya abung a baleg, aliwa labat a wala so saray baso a balitok tan pilak, noag met saray agawa ed kiew tan pitek; et saray arum sikara so kirayewan, tan saray arum makapabaing. Kanian no wala so mangogol ed inkasikato ed saraya, sikato naani sakey a baso a kirayewan, apasantos, nitalaga ya ikana na makankien, sipaparaan ed ganagana a gawa’n maabig.”​—2 Timoteo 2:20, 21.

²¹ Saray indibidual ya agmitutunosan ed saray kakaukolanen na Dios et ‘baseha a makapabaing.’ Balet, diad tuloytuloy a pangagamil ed maridios a kurang, magmaliw itayon ‘baseha a kirayewan, apasantos, odino nitalaga, ya ikana parad si Jehova tan sipaparaan ed ganagana a gawan maabig.’ Kanian nepeg tayon itepet ed inkasikatayo: ‘Kasin sakey ak a “baseha a kirayewan”? Maong ak kasin impluensya ed saray kapananisiaan? Kasin kabiangan ak na kongregasyon a benebenek a mankikimey kaiba iray kaparan managdayew?’

Mantultuloy a Manlingkor a Benebenek

22. Diad anto so napangiyalilingan ed Kristianon kongregasyon?

²² Say Kristianon kongregasyon et singa-pamilyan uksoyan. Wala so maaro, matulong, tan maabig a kipapasen na sakey a pamilya no amin a membro et mandadayew ed si Jehova. Say pamilya so nayarin tugyopen na pigaran indibidual a walaan na nanduruman personalidad, balet amin so walaan na kagalgalang a betang. Mipara so situasyon ed kongregasyon. Anggaman amin tayo so nandurumaan tan ag-ayadyari, sikatayo so iyaasingger na Dios ed inkasikato panamegley nen Kristo. (Juan 6:44; 14:6) Sikatayo so inaro nen Jehova tan si Jesus, tan singa ed nankakasakey a pamilya, maseguron nakaukolan ya ipanengneng tayo so aro ed balang sakey.​—1 Juan 4:7-11.

23. Anto so nepeg a nodnonoten tan determinado tayon gawaen?

²³ Say singa-pamilyan Kristianon kongregasyon et sakey met a pasen a manepeg a pakaromogan na katooran. Oniay insulat nen apostol Pablo: “Pirawat ko sirin a saray totoo mikasi’ra komon dia ed ganagana a pasen, ya itagey da so malinis a kalimaan da, ya anggapo so sanok tan siblangan.” (1 Timoteo 2:8) Insiglaot sirin nen Pablo so katooran ed mapublikon pikakasi “dia ed ganagana a pasen” a pantitiponan na saray Kristiano. Say matoor labat a lalaki so nepeg a mangirepresenta na kongregasyon diad mapublikon pikakasi. Siempre, iilaloan na Dios ed sikatayon amin a manmatoor ed sikato tan ed balang sakey. (Eclesiastes 12:13, 14) Komon ta determinado tayo sirin a mankakasakey a mankimey, a singa saray parte na laman na too. Mankakasakey tayo met a manlingkor bilang kabiangan na pamilya na saray mandadayew ed si Jehova. Manuna ed amin, komon ta nodnonoten tayo a nakaukolan tayo so balang sakey tan panggayagaan tayo so panangabobon tan panamendisyon na Dios no benebenek itayon manlingkor ed si Jehova.

Panon Yon Ebatan?

• Anto so ontutulong ed totoo nen Jehova a manlingkor ed sikato a benebenek?

• Akin a paliisan na saray Kristiano so panangidumaduma?

• Anto so nibaga yon kakapuyan na panagmeremere?

• Akin a nepeg tayon igalang iray kapananisiaan?

[Tepetepet Parad Panagaral]

 [Litrato ed pahina 15]

Atalosan nen Pedro a ‘say Dios et agmanangidumaduma’

[Litrato ed pahina 16]

Amta yo ta no akin ya inyabeba na Dios si Miriam?

[Litrato ed pahina 18]

Malikeliket iray matoor a Kristiano a benebenek a manlilingkor ed si Jehova