Anguman Iray Estandarte tan Aderal so Talek

Diad panaon nen King Henry I na Inglatera (1100-1135), imbase so sakey yarda ed “distansia manlapud nguroy eleng na Ari anggad sampot na tangan na akaunat a taklay to.” Panon ka-eksakto iray sukat na yarda ed saray uuleyan nen King Henry? Say personal ya ibisita ed ari so ompatnag a mogmon paraan pian naseguro.

SARAY panagsukat natan so mas eksakton adetermina no nipaakar ed saray estandarte. Kanian, say metro so adetermina bilang say distansia na pambabaroy na liwawa ed anggapoy dagem a liwang ed sakey segundo ya inapag ed 299,792,458. Diad pihon panangibaga, sayan liwawa so agmanguman-uman a wavelength tan manlalapud nikadkaduman klase na laser. No saray totoo so walaan na kagawaan a napawala to so estandarte ed panagsukat, naseguro ra ed inerman a lugar a say panagsukat da ed dukey so mipara ed panagsukat na amin.

Saray pananguman ed saray estandarte ed panagsukat, anggaman samet labat, so pansengegan na panduaruwa, tan pirmin pansasagpotan so pamprotekta ed saray estandarte ed panagsukat. Singa bilang, diad Britanya say estandarte ed panimbang et sakey a baretan (bar) platinum odino iridium alloy a manbelat na sakey kilo. Sayan bareta so akaatol ed National Physical Laboratory. Lapud polusyon ed dagem manlapud saray luluganan tan eroplano et naaaruman so belat na estandarte ed panagkilo kada agew. Anggaman ontan, sayan baretan metal, odino cylinder, so angaligan ed estandarte ed panagsukat ya uusaren ed mundo ya akakarga ed taloran singa kampana iran garapon a walad dalem na dalin a panangiyatolan, diad International Bureau of Weights and Measures diad Sèvres, Pransiya. Balet anggan say belat na sayan bengatla so mandumaduma lapud mikroskopyon kontaminasyon. Anggad natan, saray metrologist na mundo so agni akaimbento na agmanguman-uman ya estandarte ed panagsukat.

Anggaman singano ag-importanti so angkekelag iran pananguman ed ordinaryon too, say intiramintin panguman ed estandarte ed panagsukat so makawetwet. Diad Britanya, say impanguman ed imperyal a sukat na belat (pounds tan onsa) ed metric (kilo tan gramo) so nanresulta ed baleg a panduaruwa​—tan walay rason ed saya. Inanamot na saray andiay prinsipyon makankien na lakoan so agpikabisado na lapag nipaakar ed balon sistema pian kupitan na pasungsong iray suki ra.

Saray Estandarte ed Pamilya tan ed Moral

Komusta iray pananguman na saray estandarte ed pamilya tan ed moral? Say epekto na ontan iran pananguman so nagkalalon tuloy a makaderal. Saray peles a report ed kakukusbo na pamilya, malukak a seksual a kondukta, tan say kasmak a panangabuso ed ugaw so mamapakapuy ed dakel tan saya so mamapaneknek a manbibilay itayo la ed panaon ya onaabeba iray estandarte. Saray sulon-ateng a pamilya, ananak a pinabaleg na homoseksual ya atateng, tan say makapakebbiew a panangabuso ed sekso ed ugugaw a walad panangasikaso na lokal iran autoridad so resultan amin na totoon mangipupulisay ed saray aawaten ya estandarte. Ondarakel so totoon magmamaliw a  ‘maaro ed saray lamalaman da, . . . anggapo so aro ra a nianakan, . . . maingongot ed saray maabig, . . . maaro ed saray likeliket, a lalo nen say dia ed Dios,’ a singa impasakbay la na Biblia manga duan libon taon lay apalabas.​—2 Timoteo 3:1-4.

Mikonektaan a tuloy so iyaabeba na moral iran estandarte ed anggapoy pililiknan panederal ed talek. Agano ni, say mabitabitar iran inkasipa ed saray atagey ya estandarte ed medikal a propesyon so niwalwal diad Hyde, sakey a baley ed mamaamianen ya Inglatera, a no iner saray manaayam so nanmatalek ed “rerespetoen tan pampipiaan” da iran doktor na pamilya ra. Balet makapaermen ta say inpampia ra so dineral. Panon? Impanengneng na saray report ed bista a diad katuaan to, say doktor so sengegan na impatey na manga 15 iran pasienti ton bibii. Diad tua et kinaukolan ya imbestigaan lamet na saray polis so masulok a 130 niran arum ya inaatey a pakalalanoran na doktor. Nidanet so kalaknab na impaneral na doktor ed talek sanen sikatoy nalmoan a nankasalanan tan asentensiaan a nipriso. Say duaran opisyal ed prisoan a say ina ra so nayarin pinatey na sayan doktor so inikdan na sananey iran trabaho pian aliwan sikara so mangasikaso ed sayan mauge-uges a priso. Agpankelawan a say report na kaso ed The Daily Telegraph so anawag ed nankasalanan a doktor bilang say “‘Diablon’ doktor.”

Lapud manguman-uman tan onaabeba iray estandarte ed dakerakel ya aspekto na bilay, diad siopa so napanmatalkan yo? Iner so pakaromogan yo na agmanguman-uman iran estandarte, a susuportaan na sakey ya autoridad a walaan na pakayarin mangitandoro ed saratan? Say onsublay ya artikulo so mangebat ed saratan a tepet.