1. Antoy naseseguro nen Marta ya nagawa ed agi ton si Lazaro? (Nengnengen so litratod gapo na artikulo.)

SI MARTA ya disipulo tan maapit a kaaro nen Jesus et maneermen, ta inatey so agi ton si Lazaro. Wala kasi nayarin mamakepa ed ermen to? On. Impaseguro nen Jesus: “Say agim et onoli.” Nayarin agsigpot ya inekal na satan so ermen nen Marta, balet anisiaan toy imbaga nen Jesus. Inkuan to: “Amtak a sikatoy onoli diad kaunoran ya agew.” (Juan 11:20-24) Seguradoy Marta ya nagawa itan diad arapen. Pero nanggaway Jesus na milagro. Binilay toy Lazaro diad saman ya mismon agew.

2. Akin ya labay mon mipara ed si Marta so papanisiaan mo?

² Agtayo nailaloan natan ya si Jesus odino say Ama to et manggawa na ontan ya milagro parad sikatayo. Balet singa si Marta, kasin segurado ka ya nabilay lamet diad arapen so inatey ya inad-arom? Nayarin say inatey et asawam, nanay mo, tatay mo, lakim, odino baim. Odino maneermen ka lapud impatey na anak mo. Labalabay mo lan nalakap, nakatongtong, tan narengel so elek na inad-arom. Makapaliket ta singa si Marta, walay rason mon ibaga ya, ‘Amtak ya onoli so inad-arok.’ Balet maabig no  nonoten na kada Kristiano no akin ya walay basiyan ya panisiaan itan.

3, 4. Panon ya nagmaliw a mas kombinsido si Marta ed papanisiaan to lapud samay agano nin ginawa nen Jesus?

³ Lapud si Marta et manaayam diad asingger ed Jerusalem, nayarin agto anengneng ya pinaoli nen Jesus so anak na balo ya bii diad asingger ed Nain, diad Galilea. Balet posiblin abalitaan to itan. Tan abalitaan to met ya pinaoli nen Jesus so bii ya anak nen Jairo. Saramay wadmad abung nen Jairo et “amta ran inatey lay ugaw.” Balet binembenan nen Jesus so lima na ugaw tan inkuan to: “Ana’ko, bangon ka!” Tan binmangon a tampol. (Luc. 7:11-17; 8:41, 42, 49-55) Amta nen Marta tan say agi ton si Maria ya sarag nen Jesus ya paabigen iray mansasakit. Kanian inisip da ya no wadman si Jesus, agkomon inatey si Lazaro. Balet natan ta inatey lay maapit ya kaaro nen Jesus, antoy iilaloan nen Marta ya nagawa? Imanoen ya imbaga nen Marta ya onoli ed bilay si Lazaro diad arapen, “diad kaunoran ya agew.” Akin ya seguradoy Marta ed satan? Tan akin ya segurado kan diad arapen et nabilay lamet iray inatey, kaiba iray inad-arom?

⁴ Wala ray basiyan pian panisiaan mo itan. No aralen tayo so pigara ed saratan, wala ray naamtaan mo ed Salita na Dios a nayarin agmo iisipen ya mikonektaan ed seguradon ilalo ya nanengneng mo lamet iray inatey ya inad-arom.

5. Akin ya kombinsido si Marta ya nabilay lamet si Lazaro?

⁵ Imanoen ya ag-imbaga nen Marta ya, ‘Komon ta onoli so agik.’ Say imbaga to: “Amtak a sikatoy onoli.” Kombinsido si Marta lapud saray milagron naamtaan to antis nin ginmapo so ministeryo nen Jesus. Nayarin naamtaan to iratan ed saray kapamilya to tan diad sinagoga nen kalangweran ni. Nayarin nanonotan mo so taloran salaysay na impamaoli ya nisulat ed Biblia.

6. Anton nikadkaduman milagro so ginawa nen Elias ya seguradon naamtaan nen Marta?

⁶ Agawa so unonan impamaoli nen inikdan na Dios so propeta ton si Elias na pakayarin manggawa na saray milagro. Diad Zarepat, sakey a baley ed Fenicia ya asingger ed dayat, walay balon bii ya amarawes ed si propeta Elias. Diad saman et nanggaway milagro so Dios ya agnaupotan na suplay na arina tan larak imay balon bii pian sikaran sanina et tuloytuloy a manbilay. (1 Ara. 17:8-16) Sinmabi panaon et nansakit so anak to tan inatey. Tinulongan nen Elias so balon bii. Binembenan nen Elias so inatey ya ugaw tan impikasi to: “Dios ko, panangasim, ipawil mo komon so bilay na sayan ugaw.” (1 Ara. 17:21) Tan agawa itan! Dinengel na Dios si Elias, tan abilay lamet so ugaw. Atan so unonan impamaoli ya nisulat ed Biblia. (Basaen so 1 Arari 17:17-24.) Seguradon naamtaan nen Marta itan ya makapakelaw ya agawa.

7, 8. (a) Isalaysay no antoy ginawa nen Eliseo pian natulongan so biin maneermen. (b) Antoy papaneknekan na milagron ginawa nen Eliseo nipaakar ed si Jehova?

⁷ Say komaduan impamaoli ya nabasad Biblia et samay ginawa nen propeta Eliseo ya sinmalat ed si Elias. Walay kabkabat ya biin Israelita diad Sunem ya makapadinayew so impamarawes tod si Eliseo. Diad panamegley nen propeta Eliseo, inikdan na Dios na sakey ya anak a laki iyan bii tan say masiken lan asawa to, ta anggapoy anak da. Balet kayari pigaran taon et inatey so ugaw. Seguradon maer-ermen iyan ina. Nen inabuloyan na asawa to, sikatoy nambiahe na  manga 30 kilometro pian onlad si Eliseo diad Palandey Carmel. Imbaki na propeta so lingkor ton si Gehazi ya unona lad Sunem pian bilayen so ugaw, balet ta agto ayarian. Insan sinmabi so ina na ugaw kaiba toy Eliseo.​—2 Ara. 4:8-31.

⁸ Diad Sunem, linmoob si Eliseo ed abung a kawalaan na bangkay tan nampikasi. Milagro ta abilay imay ugaw tan akaiba to lamet so malikeliket ya ina to! (Basaen so 2 Arari 4:32-37.) Nayarin anonotan na sayan bii imay impikasi nen Hana ya datin agmakaanak, nen inawit toy Samuel ya manlingkor diad tabernakulo: “Si Jehova . . . so mangilasur ed Lubok, tan sikato so mangagwat ditan.” (1 Sam. 2:6) Malinew ya literal a pinaalagey na Dios so ugaw ed Sunem, ya paneknek a sarag Ton paolien iray inatey.

9. Ipaliwawa no panon ya nalalanor si Eliseo ed komatlon impamaoli ya nisulat ed Biblia.

⁹ Balet aliwan satan so sampot ya impamaoli ya nalalanor si Eliseo. Kayari na masulok ya 50 taon ya impanlingkor nen Eliseo bilang propeta, sikatoy ‘adapoan na sakit a sengegay impatey to.’ Kalabas na panaon, nen nagmaliw lan pukel si Eliseo, wala ray grupo na tulisan ya inmataki ed Israel. Diad saman et wala ray Israelita ya mangipoponpon ed bangkay na sakey a laki. Lapud agda labay ya nasabian ira na saratan ya kakabusol, imbuntok dan tampol so bangkay diad lubok ya kawalaan na saray pukel nen Eliseo. Oniay nabasa tayo: “Kadiwit na bangkay ed saray pukel nen Eliseo, abilay may laki tan inmalagey.” (2 Ara. 13:14, 20, 21) Isipen pay epekto ed si Marta na saraman ya agawan impamaoli! Talagan sarag na Dios ya paandien so ipapatey. Tan nonoten no antoy epekto na satan ed sika. Seguradon nakombinsi ka ya balbaleg tan anggapoy limitasyon na pakapanyari na Dios.

10. Antoy ginawa nen Pedro nen inatey so sakey a Kristianon bii?

¹⁰ Diad Kristianon Griegon Kasulatan, nabasa tayo met iray agawan impamaoli ya wadman iray mangirerepresenta ed Dios. Nanengneng itan ed saray pinaoli nen Jesus nen walad paway na Nain tan diad abung nen Jairo. Wala met so sakey a pinaoli nen apostol Pedro, samay Kristianon bii ya si Dorcas (Tabita). Linmay Pedro ed kawalaan na bangkay antis ya iponpon. Legan ya walad abay na bangkay, nampikasi si Pedro. Insan, inkuan to: “Tabita, bangon ka!” Tampol ya abilay si Dorcas, tan sikatoy “inyawat [nen Pedro a] mabilay” ed saray Kristianon agagi to. Talagan makakombinse iman ya agawa kanian “dakel so anisia ed Katawan.” Sarag day mantasi nipaakar ed Katawan tan nibaga dan mismo ya sarag nen Jehova a bilayen iray inatey.​—Gawa 9:36-42.

11. Antoy imbaga na doktor ya si Lucas ya agawad sakey a kalangweran a laki, tan antoy epekto na satan ed arum?

¹¹ Wala met iray akatasi ed sananey nin impamaoli. Aminsan, si apostol Pablo et walad pantitipon diad kuarto ed tagey na abung ed Troas (natan et diad northwest Turkey). Sikatoy nampaliwawa anggad pegley-labi. Ondedengel so sakey ya kalangweran a lakin manngaray Eutico legan ya akayurong ed bintana. Balet sikatoy akaugip tan naplag manlapud komatlon grado na abung. Nayarin say doktor ya si Lucas so unonan dinmago ed sikato, tan imbaga toy resulta, ya kuan to: Si Eutico et aglabat asakitan tan nakalan na malay​—sikatoy inatey! Inmepas si Pablo tan nilakap toy Eutico, insan malikeliket ton imbaga: “Sikatoy mabilay.” Talagan baleg so epekto na satan ed saray akatasi! Amta da ya inatey si Eutico insan abilay lamet, kanian “aligliwa ran maong.”​—Gawa 20:7-12.

12, 13. Diad saray apantongtongan tayo ya agawan impamaoli, anto ran tepet so kaukolan ya naebatan?

¹² Say epekto ed sika na saray abitlan salaysay et nepeg ya mipara ed si Marta. Makapanmatalek ka ya say Dios ya angiter na bilay tayo et sarag ton bilayen lamet iray inatey. Makapainteres ta nen pinaoli nen Jehova iray inatey, wadman iray matoor a lingkor na Dios a singa si Elias, Jesus, odino si Pedro. Panon to balet iramay inatey diad arum a panaon? No say impatey da et diad panaon ya agnampaoli so Dios na inaatey, kasin nailaloan na saray matoor a lalaki tan bibii ya diad arapen et nabilay lamet iray inatey? Kasin nalikna da met so alikna nen Marta a kuan to: “Amtak a [say agik] onoli diad kaunoran ya agew”? Akin ya matalek si Marta a nagawa itan, tan akin a makapanmatalek ka met?

¹³ Diad tua et dakel iray salaysay ed impuyan a Salita na Dios a mangipanengneng ya amta na saray matoor ya lingkor nen Jehova a walay kioli ed bilay diad arapen. Amtaen tayoy pigara ed saratan.

14. Diad salaysay nipaakar ed si Abraham, antoy naaralan tayo nipaakar ed kioli?

¹⁴ Isipen pay imbaga na Dios ed si Abraham ya gawaen tod si Isaac, say tomatawir ya abaybayag ya inalagar. Inkuan nen Jehova: “Ipangasim, alam so anak mo, say bogbogtong ya anak mon inad-arom a maong, si Isaac, tan . . . iyapay mo . . . bilang apay a popoolan.” (Gen. 22:2) Isip mo pay alikna nen Abraham ed satan ya ganggan. Impromisa nen Jehova ya panamegley na ilalak nen Abraham, nabendisyonan so amin ya nasyon. (Gen. 13:14-16; 18:18; Roma 4:17, 18) Imbaga met nen Jehova ya “manlapud si Isaac” itan ya bendisyon. (Gen. 21:12) Panon balet itan ya nagawa no ibagat nen Abraham si Isaac? Pinuyanan si Pablo a mangipaliwawa ya anisia si Abraham a sarag na Dios ya bilayen si Isaac. (Basaen so Hebreo 11:17-19.) Anggapoy ibabaga na Biblia ya inisip nen Abraham ya no sikatoy ontulok, nabilay lamet si Isaac kayari labat na pigaran oras, sakey agew, odino sakey simba. Ag-amta nen Abraham no kapigan nabilay lamet so anak to. Balet sikatoy nanmatalek ya paolien nen Jehova si Isaac.

15. Anto so iilaloan na patriarkan si Job?

¹⁵ Iilaloan met na patriarkan si Job so kioli diad arapen. Amta to ya no say sakey a kiew et batangen, nayarin onsimit lamet itan tan magmaliw ya balon kiew. Balet aliwan ontan ed too. (Job 14:7-12;  19:25-27) No ompatey so too, agto sarag ya paolien so sarili to tan manbilay lamet. (2 Sam. 12:23; Sal. 89:48) Pero agto labay ya ibaga ya agsarag na Dios ya paolien so sakey a too. Diad tua, anisia si Job ya walay panaon ya igetar nen Jehova pian sikatoy nonoten To. (Basaen so Job 14:13-15.) Ag-amta nen Job no kapigan itan nagawa diad arapen. Pero nanmatalek nin siansia a sikatoy sarag ya nonoten tan labalabay ya bilayen na Dios ya Amalsa ed too.

16. Antoy imbaga na anghel ed si propetan Daniel pian napaseseg?

¹⁶ Say sakey nin matoor a too ya kabat tayo ed Hebreon Kasulatan et si Daniel. Sikatoy nanlingkor ed Dios diad dakel a taon, tan tinulongan nen Jehova. Walay inkagawa ya sayan “pinabpabli a too” et pinaseseg na sakey ya anghel a ‘nawalaan komon na kareenan’ tan “manpabiskeg.”​—Dan. 9:22, 23; 10:11, 18, 19.

17, 18. Antoy insipan ed si Daniel a nagawa ed sikato diad arapen?

¹⁷ Si Daniel et ngalngali la 100 so taon to tan magano lan manampot so bilay to. Nayarin iisipen to no anto kasi nagawa ed sikato diad arapen. Kasin nabilay lamet si Daniel? Segurado! Diad sampot na libron Daniel, oniay impaseguro na Dios ed sikato: “Manmatoor ka ya anggad anggaan. Manpainawa ka.” (Dan. 12:13) Amta na masiken lan Daniel ya manpapainawa iray inatey, ya anggapo so “plano odino kakabatan odino karunongan diad Lubok.” Magano lan onla ditan si Daniel. (Ecl. 9:10) Balet aliwan satan so anggaan to. Walay iilaloan to ed arapen.

¹⁸ Oniay kaaruman a mensahe ed si propetan Daniel: “Onalagey ka pian awaten moy apag mo diad kasampotan na saray agew.” Ag-amta nen Daniel no kapigan itan nagawa. Say amta to, sikatoy ompatey insan manpainawa. Pero say labay ya ibaga a sikatoy ‘onalagey pian awaten toy apag to’ diad arapen et seguradon walay ilalo ton onoli​—kayari na andukey a panaon. Nagawa itan “diad kasampotan na saray agew.” Oniay impangipatalos na Maung a Balita ed sayan sipan ed si Daniel: “Onalagey kan mangawat na tumang mo diad kasampotan na panaon.”

19, 20. (a) Antoy koneksion na inaral tayo ed samay imbaga nen Marta ed si Jesus? (b) Antoy aralen tayod ontumbok?

¹⁹ Kanian wala ray basiyan nen Marta pian manmatalek a say matoor ya agi ton si Lazaro et “onoli diad kaunoran ya agew.” Say sipan ed si Daniel, tan say inkasegurado nen Marta ed ebat tod si Jesus so mamaseguro ed saray Kristiano natan. Talagan walay kioli.

²⁰ Saray tuan agawa nensaman so prueba ya nagawa so kioli​—ya nabilay lamet iray inatey. Iilaloan na amin ya lingkor na Dios ya nagawa iya diad arapen. Balet kasin walay basiyan ya talagan nagawa so kioli anggano abaybayag la itan ya insipan? No wala, naaruman so rason tayo ya talaranan so panaon na kioli, a singa si Marta. Balet kapigan itan nagawa? Pantongtongan tayo iratan diad onsublay ya artikulo.