LEKSION 18
Panon ya Naamtaan no Siopa ray Tuan Kristiano?
Binilyon so mangibabaga ya Kristiano ira. Pero nandurumay papanisiaan da tan paraan na panagbilay da. Kanian panon tayon naamtaan no siopa ray tuan Kristiano?
1. Anto ’tay Kristiano?
Saray Kristiano et disipulo odino papatumbok nen Jesu-Kristo. (Basaen so Gawa 11:26.) Antoy pakanengnengan ya disipulo ira nen Jesus? Imbaga to: “No mansiansia kayod salitak, tua a sikayo iray disipulok.” (Juan 8:31) Labay ton ibaga, uunoren na saray tuan Kristiano iray ibabangat nen Jesus. Lanang ya manlalapud Kasulatan iray imbangat nen Jesus, kanian dapat, manlalapu met ed Salita na Dios so papanisiaan na saray tuan Kristiano.—Basaen so Lucas 24:27.
2. Panon ya ipapanengneng na saray tuan Kristiano so panangaro?
Oniay imbaga nen Jesus ed saray papatumbok to: “Manaaroan kayo a singa ed impangarok ed sikayo.” (Juan 15:12) Panon ya impanengneng nen Jesus so panangaro ed saray disipulo to? Sikatoy akiulop ed sikara, pinabiskeg, tan tinulongan to ra. Inter to ni ingen so bilay to parad sikara. (1 Juan 3:16) Ontan met iray tuan Kristiano, aliwa labat ya anggad salita so panangaro ra. Imbes, ipapanengneng da ed salita tan gawa ya inaro day sakey tan sakey.
3. Antoy kimey na saray tuan Kristiano?
Inikdan nen Jesus na kimey iray disipulo to. “Imbaki to ran mangipulong ed Panarian na Dios.” (Lucas 9:2) Saray Kristiano nensaman et nampulong diad saray lugar ya pandadayewan da, diad publikon lugar, tan diad saray kaabungan. (Basaen so Gawa 5:42; 17:17.) Ontan met iray tuan Kristiano natan, ipupulong day katuaan ya walad Biblia ed anggan iner ya kawalaan na totoo. Inaro da ray kapara dan too, kanian makulikuli dan ipupulong so mensahe na Biblia ya mangiiter na ilalo tan ligliwa.—Marcos 12:31.
DAKEL NI NAARALAN MO
Amtaen no antoy pandumaan na saray tuan Kristiano tan saray totoon agda uunoren iray bangat nen Jesus tan agda aaligen so alimbawa to.
4. Aamtaen day katuaan ya walad Biblia
Saray Kristiano nensaman et pinabli day Salita na Dios
Wala ray mangibabagan Kristiano ira, pero agda papablien so katuaan ya walad Biblia. I-play so VIDEO, insan ebatan iya.
-
Antoy ginawa na saray simbaan ya mangibabagan Kristiano pian agnaamtaan na totoo so bangat nen Jesus?
Imbangat nen Jesus so katuaan ya walad Salita na Dios. Basaen so Juan 18:37, insan ebatan iya:
-
Antoy imbaga nen Jesus pian naamtaan tayo no siopa ray Kristiano ya “walad dapag na katuaan”?
5. Ipupulong da so katuaan ya wala ed Biblia
Saray Kristiano nensaman et pinulongan day arum
Antis ya pinmawil ed tawen si Jesus, walay inter ton misyon ed saray papatumbok to ya gawaen da anggad natan. Basaen so Mateo 28:19, 20 tan Gawa 1:8, insan ebatan iya:
-
Anggad iner tan anggad kapigan so kimey ya panagpulong?
6. Gagawaen da so ipupulong da
Antoy akakombinse ed si Tom ya nalmo to la iray tuan Kristiano? I-play so VIDEO, insan ebatan iraya.
-
Diad video, akin et sinmawa si Tom ed relihyon?
-
Antoy akakombinse ed sikato ya nalmo to so katuaan?
Wala may panangibaga da ed English ya: Actions speak louder than words. Basaen so Mateo 7:21, insan ebatan iya:
-
Antoy mas importante ed si Jesus—samay ibabaga tayo odino gagawaen tayo?
7. Manaaroan ira
Saray Kristiano nensaman et inaro day sakey tan sakey
Wala ta lay ebidensya ya ipeligro na saray Kristiano so bilay da para ed kapara dan Kristiano? I-play so VIDEO, insan ebatan iraya.
-
Diad video, akin et impeligro nen Lloyd so bilay to parad si Brother Johansson?
-
Parad sika, amay ginawa to, pakanengnengan kasi ya sikatoy sakey ya tuan Kristiano?
Basaen so Juan 13:34, 35, insan ebatan iraya:
-
Panon ya ituturing na saray disipulo nen Jesus (saray tuan Kristiano) so arum ya lahi?
-
Antoy gawaen da no walay guerra?
IBABAGA NA ARUM: “Amayamay so mauges ya ginawa na saray Kristiano—panon mon nibaga ya tuan relihyon ira ey?”
-
Anton teksto so ibasam pian ipanengneng no siopa ray tuan Kristiano?
SUMARYO
Uunoren na saray tuan Kristiano so bangat na Biblia, ipapanengneng da so tuan panangaro, tan ipupulong da so katuaan ya walad Biblia.
Rebyu
-
Iner manlalapu so papanisiaan na saray tuan Kristiano?
-
Anton kualidad so tanda na saray tuan Kristiano?
-
Anton kimey so gagawaen na saray tuan Kristiano?
DISKOBRIEN
Kabaten ni iray totoo ya mangaalig ed alimbawa nen Jesu-Kristo tan manguunor ed saray bangat to.
Amtaen no panon ya nalmo na sakey ya datin madre so ‘tuan espiritual a pamilya to.’
“Inusar Day Biblia Pian Ebatan so Amin ya Tepet Ko!” (Say Panag-bantayan, Mayo–Hunyo 2014)
Amtaen no panon ya ipapanengneng na saray tuan Kristiano so panangaro ed saray kapananisiaan da ya mankaukolan.
Tutulongan Tayo ray Agagi Tayo no Walay Kalamidad—Video Clip (3:57)
Amtaen no akin ya nabidbir ed saray Kristiano nensaman tan saray tuan Kristiano natan imay imbaga nen Jesus ya tanda na saray papatumbok to.
“Ano ang mga Pagkakakilanlan ng Tunay na Kristiyano?” (Ang Bantayan, Marso 1, 2012)
Ompan Nagustoan Mo Met
MABETBET YA ITETEPET
Anto tay Panag-aral na Biblia ya Iyoopresi na Saray Tasi nen Jehova?
Diad sayan libren interactive ya paraan na panag-aral ya iyoopresi na Saray Tasi nen Jehova, sarag mon usaren so anggan anton patalos na Biblia. Imbitaan so interon pamilyam odino anggan siopan kaarom ya labay day milad sika.
