“Say Dios . . . et punasen to so amin a lua ed kamataan da, tan anggapo lay patey, panirap, panakis, odino sakit.”​—Apocalipsis 21:3, 4, Contemporary English Version.

Makapantiwala ka ya aliwan say Dios so panlalapuan na problema​—Santiago 1:13.

Ombiskeg so liknaan mo ta antam ya mililikna so Dios ed paniirap tayo.​—Zacarias 2:8.

Makaseguro ka ya talagan naandi so paniirap.​—Salmo 37:​9-11.

On, tan nia so duaran rason:

• Aglabay na Dios ya walay maniirap tan naaagrabiado. Isipen pay alikna nen Jehova a Dios nen amaltrato iray totoo to nensaman. Ibabaga na Biblia ya nanermen a maong so Dios lapud “saramay mamapairap tan nanmaltrato ed sikara.”​—Ukom 2:18, Balon Mundo a Patalos.

  Kabusol na Dios iray manggagaway mauges ed kapara dan too. Singa bilang, ibabaga na Biblia ya kabusol to iray “lima a mamapaagus na dala na andiay kasalanan.”​—Proverbio 6:16, 17.

• Inaro na Dios so kada sakey ed sikatayo. Amta na “balang sakey so paniirap to tan say sakit a nalilikna to,” tan amta met itan a mismo nen Jehova!​—2 Awaran 6:29, 30.

  Panamegley na Panarian nen Jehova, asingger to lan ekalen so paniirap na kada too. (Mateo 6:9, 10) Balet antis na satan, maaron tutulongan na Dios iramay mantitiwala ed sikato.​—Gawa 17:27; 2 Corinto 1:3, 4.