Kapitulo 8

Anto So Nagawa ed Ipatey?

1. Anto ran tepet so mabetbet ya itepet na totoo nipaakar ed saray inaatey?

 ANGANGKO et amtam so apan liknaan ya onsabi diad kaandi na inad-aro ed patey. Agaylan ermen tan inkapakaskasi so naliknam! Natural lambengat ya itepet: Anto so nagawa ed sakey a too sano sikato so ompatey? Kasin sikato nin siansia so mabilay ed arum a pasen? Kasin say mabilay so makayari lamet a manggayaga ed dalin diad piulop ed saraman so inaatey natan?

2. Anto so agawa ed inmunan too, si Adan, diad impatey to?

² Pian naebatan iratan a tepet, makatulong ed sikatayo so pakaamta ed samay agawa ed si Adan diad impatey to. Sanen sikato so nankasalanan, imbaga na Dios ed sikato: “Sika [so] ompawil ed dalin, lapud ditan so angalaan ed sika. Lapud sika et dabok ka diad dabok ompawil ka.” (Genesis 3:19) Isipen so kabaliksan na satan. Sakbay a sikato so pinalsa na Dios a nanlapud dabok, anggapo so Adan. Sikato so anggapo. Sirin, nen sikato so inatey, si Adan so pinmawil ed parehon kipapasen na agkiwawala.

3. (a) Anto so patey? (b) Anto so ibaga na Eclesiastes 9:5, 10 nipaakar ed kipapasen na saray inaatey?

³ Simplen nibaga, say patey so kasuniyan na bilay. Saya so ipapanengneng na Biblia ed Eclesiastes 9:5, 10. Unong ed Authorized odino King James Version, ikuan na sarayan bersikulo: “Ta saray mabilay amta ra ya ompatey ira; balet saray inaatey so agmikabat ed antokaman a bengatla, nisay nawalaan ira na tumang; ta say pakanodnonotan ed sikara so alingwanan la. Antokaman  a naromog na limam a gawaen, gawaen mo ed anggaan na pakayarim; ta anggapo so kimey, nisay gawa, nisay pikakabat, nisay kakabatan, ed lubok, a laen mo.”

4. (a) Anto so nagawa ed saray pakayari na panagnonot na sakey a too diad patey? (b) Akin a saray amin a liknaan na too so ontundan onkiwas diad ipatey?

⁴ Kabaliksan na saya ya anggapo so nagawaan na inaatey tan agmakalikna ed antokaman. Sikara so andian la na kanonotan, a singa inkuan na Biblia: “Agkayo manmamatalek ed saray dederlengen, nisay dia ed anak na too, a diad sikato et anggapo so kilalaban. Say espiritu to so ompaway, sikato so ompawil ed dalin to; diad satan ya agew saray nonot to so natawtaw.” (Salmo 146:3, 4) Diad ipatey say espiritu na too, puersa na bilay to, a satan so nasustine diad panlinawa, so “ompaway.” Sikato so anggapo la. Kanian saray liknaan na too ed pakadngel, pakanengneng, pakalikna, pakaangob tan pakataway, a mandepende ed pakayari ton manisip, so ontunda lan amin ya onkiwas. Unong ed Biblia, say inatey so onloob ed kipapasen na nagnap ya agpakalikna.

5. (a) Panoy pangipanengneng na Biblia a say kipapasen na totoon inaatey tan ayayep ya inaatey so pareho? (b) Anto so “espiritu” a manggawan mabilay ed namparan totoo tan ayayep?

⁵ Sano ompatey ira, namparan saray totoo tan ayayep so wala ed sayan parehon kipapasen na nagnap ya agpakalikna. Imanoen so impangipalinew na Biblia ed sayan punto: “Unong a say sakey so ompatey, ontan met a say sakey so ompatey; tan sikaran amin so walaan na sakey ya espiritu, ta pian anggapo so talunggaringan na too ed ayep, ta amin a bengatla so kaapaan. Amin so onla ed sakey a pasen. Amin da so nanlapud dabok, tan amin da so ompawil ed dabok.” (Eclesiastes 3:19, 20) Say “espiritu” a manggawa ed saray ayep a manbilay so pareho a singa saman so manggawa ed saray totoo a manbilay. Sano sayan “espiritu,” odino agnanengneng a puersa-na-bilay, so ompaway, namparan say too tan ayep so ompawil ed dabok a ditan so akagawaan da.

OMPATEY SO KAMARERWA

6. Panoy pangipanengneng na Biblia a saray ayayep so kamarerwa?

⁶ Inkuan na arum a totoon say pidumaan na too ed saray ayayep et say too so walaan na kamarerwa balet saray ayep so andian. Anggaman ontan, ibabaga na Genesis 1:20 tan 30 a pinalsa na Dios so “mabilay a kakamarerwa” a manbilay ed saray danum, tan saray ayayep so walaan na “bilay a bilang kamarerwa.” Diad sarayan bersikulo inusar na arum a Biblia so saray salitan “pinalsa” tan “bilay” imbes a “kamarerwa,” ingen ta saray pakabasa ed marhinal da  so mipakna a say salitan “kamarerwa” so pinmatnag ed orihinal a lenguahe ra. Sakey ed saray impanukoy na Biblia ed ayayep a bilang kamarerwa so diad Numeros 31:28. Ditan et sasalitaen to so “sakey a kamarerwa na limanlasus, ed totoo tan ed saray baka tan ed saray asno tan ed pulok.”

7. Anto so ibabaga na Biblia ed pamaneknek a namparan saray kakamarerwan ayayep tan totoon kakamarerwa so ompatey?

⁷ Lapud saray ayayep so kakamarerwa, sano sikara so ompatey say kamarerwa ra so ompatey. Unong ya ibabaga na Biblia: “Balang mabilay a kamarerwa so inatey, on, saray bengatlan wala ed dayat.” (Apocalipsis 16:3) Kumusta so totoon kakamarerwa? A singa naaralan tayo la ed akaunan kapitulo, agpinalsa na Dios so too a walaan na sakey a kamarerwa. Say too so  sakey a kamarerwa. Kanian, a singa nailaloan tayo, sano ompatey so too, say kamarerwa to so ompatey. Inulit-ulit na Biblia ya imbaga a saya so tua. Agbalot ibabaga na Biblia a say kamarerwa so ag-ompatey odino agnayarin ompatey. “Amin na saraman so onlasor ed dabok so ontuek, tan anggapo so makapangiyapiger a mabilay ed dilin kamarerwa to,” so kuan na Salmo 22:29. “Say kamarerwan mankasalanan​—sikato a dili so ompatey,” so ipapaliwawa na Ezequiel 18:4 tan 20. Tan no sika so mangibukay ed Josue 10:28-39, naromog mo so pitoran pasen a ditan et asalita so kamarerwa a nayarin pateyen odino deralen.

8. Panoy pikabat tayo a say toon kamarerwa, si Jesu-Kristo, so inatey?

⁸ Diad sakey a propesiya nipaakar ed si Jesu-Kristo, ibabaga na Biblia: “Inkalbo to so kamarerwa to ya angga ed patey . . . tan sikaton mismo so angawit ed dilin kasalanan na dakel a totoo.” (Isaias 53:12) Say bangat na dondon so mamaneknek a sakey a kamarerwa (Adan) so nankasalanan, tan pian narondon so katooan nakaukolan a wala so kasimbangan a kamarerwa (sakey a too) a nibagat. Si Kristo, diad ‘impangikalbo to ed bilay to diad patey,’ so angitarya ed presyo na dondon. Si Jesus, say toon kamarerwa, so inatey.

9. Anto so kabaliksan na saray salitan, ‘say espiritun mismo so ompawil ed Dios ya angiter ed sikato’?

⁹ A singa anengneng tayo la, say “espiritu” so bengatlan miduma ed kamarerwa tayo. Say espiritu so puersa-na-bilay tayo. Sayan puersa-na-bilay so wala ed kada selula na laman na namparan totoo tan ayayep. Sikato so nasustine, odino napansiansian mabilay, diad panlinawa. Anto so kabaliksan, sirin, sano ibabaga na Biblia a diad ipatey et “say dabok so ompawil ed dalin . . . tan say espiritu a mismo so ompawil ed tuan Dios ya angiter ed sikato”? (Eclesiastes 12:7) Diad ipatey say puersa-na-bilay so kabekta ontaynan ed amin a selula na laman tan say laman so onggapon nabulok. Balet agkabaliksan na saya a say puersa-na-bilay tayo so literal ya ontaynan ed dalin tan manbiahe ed liwang ya onarap ed Dios. Noag ingen, say espiritu so ompawil ed Dios diad pantalos a natan say ilalo tayo ed arapen a bilay so sigpot ya onsaral ed Dios. Diad panamegley lambengat na pakayari to a say espiritu, odino puersa-na-bilay, so nipawil ta pian sikatayo so manbilay lamet.​—Salmo 104:29, 30.

LAZARO​—TOON INATEY ED APATIRAN AGEW

10. Anggaman inatey si Lazaro, anto so imbaga nen Jesus nipaakar ed kipapasen to?

¹⁰ Say agawa ed si Lazaro, ya inatey ed loob na apatiran agew, so ontulong ed sikatayon mantalos ed kipapasen na saray inaatey. Imbaga nen Jesus ed saray babangatan to: “Si Lazaro a kaaro tayo so  nampainawa, balet siak so manbiahen onlad’man pian sikato so liingen a manlapud ugip.” Anggaman ontan, inmebat iray babangatan to: “Katawan, no sikato so nampainawa, sikato so ombangon naani.” Diad saman, imbaga to’d sikaran malinew: “Si Lazaro so inatey.” Akin ya imbaga nen Jesus a si Lazaro so nanaugip anta diad tua et sikato so inatey? Nengnengen tayo.

11. Anto so ginawa nen Jesus ed inatey a Lazaro?

¹¹ Sanen si Jesus so akaasingger ed baryo a panaayaman nen Lazaro, sikato so inabet nen Marta ya agi nen Lazaro. Kabekta, pati saray arum a dakel, so linma ed pantyon nen Lazaro. Sikato so sakey ya ungib, tan akasara so sakey a bato. Inkuan nen Jesus: “Ipaliis so bato.” Lapud si Lazaro so inatey la ed loob na apatiran agew, inkuan nen Marta: “Katawan, sikato la so ambanget natan.” Ingen say bato so inekal, tan kinmelyaw si Jesus: “Lazaro, paway ka!” Tan sikato so pinmaway! Pinmaway a mabilay, ya aputipotan ni na saray abel. “Okbaran yo tan paulian yo,” inkuan nen Jesus.​—Juan 11:11-44.

12, 13. (a) Akin a maseguro itayo a si Lazaro so agmakalikna sanen sikato so inatey? (b) Akin ya imbaga nen Jesus a si Lazaro so naugip anta, diad tua, et sikato so inatey?

¹² Natan saya so isipen: Anto so kipapasen nen Lazaro kaleganan na saraman ya apatiran agew a sikato so inatey? Kasin sikato so wala ed tawen? Sikato so sakey a toon maong. Ingen ta anggapo so bengatlan imbaga nen Lazaro nipaakar ed inyakar to’d tawen, a sikato komon so seguradon ginawa to no akakar diman. Andi, si Lazaro so peteg ya inatey, unong a singa imbaga nen Jesus. Sirin akin ya imbaga nen Jesus ya inmuna ed saray babangatan to a si Lazaro so nanaugip lambengat?

¹³ Bueno, kabat nen Jesus a si Lazaro ya inatey so agmakalikna, a singa ibabaga na Biblia: “Saray inaatey . . . so agbalot makalikna.” (Eclesiastes 9:5) Ingen say mabilay a too so nayarin naliing a manlapud maitlek ya ugip. Sirin ipapanengneng nen Jesus a, diad panamegley na pakayari na Dios a niiter ed sikato, si kaaro ton Lazaro so nayarin naliing a manlapud patey.

14. Say pikabat ed pakayari nen Kristo a mamaoli ed inaatey so nepeg a mamakiwas ed sikatayon manggawa na anto?

¹⁴ Sano walad maitlek ya ugip so sakey a too, anggapo so nanonotan to. Satan so mipadpara ed saray inaatey. Sikara so andian a balot na liknaan. Sikara so anggapo. Balet, diad inggeter na Dios a panaon, saray inaatey a dinondon na Dios so napaoli ed bilay. (Juan 5:28) Seguradon sayan pikakabat so nepeg a mamakiwas ed sikatayo a mankaliktan a makagamor ed panamalangkap na Dios. No satan so gawaen tayo, anggano sikatayo so ompatey, sikatayo so nanonotan na Dios tan paolien to itayo ed bilay.​—1 Tesalonica 4:13, 14.

[Tepetepet Parad Panagaral]

[Litrato ed pahina 76]

ADAN​—ginawa a nanlapud dabok . . . pinmawil ed dabok

[Litrato ed pahina 78]

Anto so kipapasen nen Lazaro sakbay na impamaoli nen Jesus ed sikato?