NENGNENG moy Samuel. Kakalboan to na larak so ulo na laki. Nensaman et ontan so gagawaen da pian ipanengneng ya say sakey et pinilin magmaliw ya ari. Ingganggan nen Jehova si Samuel ya kalboan to na larak so ulo nen Saul. Sayan larak et espisyal tan ambalbalingit.

Parad si Saul, agto inangay so magmaliw ya ari. Imbaga tod si Samuel: ‘Kaiba ak ed tribu na Benjamin, say sankamelagan ed Israel. Akin et ibabaga yon magmaliw ak ya ari?’ Labay nen Jehova si Saul ta aliwan malastog tan agpaimportante. Kanian pinili ton magmaliw ya ari.

Diad tua, si Saul et nanlapud mayaman a pamilya, sikatoy guapo tan mas atagey nen say anggan siopa ed Israel! Maples met ya ombatik tan mabisbiskeg. Malikeliket iray totoo ta pinili nen Jehova si Saul a magmaliw ya ari. Inyeyag da: ‘Andukey komoy bilay na ari!’

Saray kalaban na Israel et mabisbiskeg nin siansia. Tan agda tutundaan iray Israelita. Sanen ari lay Saul, akilaban iray Ammonita ed sikara. Balet tinipon nen Saul iray sundalo to tan tinalo da ray Ammonita. Kanian maliket iray totoo ta nagmaliw ya ari si Saul.

Diad inlabas na saray taon, dakel so tinalo di Saul ya kalaban da. Wala met so anak nen Saul ya makpel, say ngaran to et Jonatan. Tinmulong si Jonatan pian manalo so Israel ed dakel ya panlalaban. Saray Filisteo so siansia nin sankagrabian a kalaban na Israel. Aminsan, dakdakel ya Filisteo so milalaban ed Israel.

Binilin nen Samuel si Saul ya manalagar ed isabi to pian mangibagat odino mangiter na regalo ed si Jehova. Balet agtampol akasabi si Samuel. Natatakot si Saul ta ompan nitan la ray Filisteo, kanian sikato lan mismoy nambagat. Nen akasabi si Samuel, imbaga tod si Saul ya aliway ginawa to. ‘Mamili si Jehova na sananey a magmaliw ya ari ed Israel,’ so kuan nen Samuel.

Kayari na saya, aglamet tinmulok si Saul. Kanian imbaga nen Samuel ed sikato: ‘Maong ni ontulok ed si Jehova nen say mangibagat ed sikato na sankaabigan a karnero. Lapud agmo tinulok, agto ka la labay ya man-ari ed Israel.’

Naaralan tayod saya a naynay ya importante so katutulok ed si Jehova. Ipapanengneng met na saya ya say datin maong a too, a singa si Saul, et nayarin manguman tan magmaliw a mauges. Agtayon balot labay so magmaliw a mauges awa?