Kapitulo Desinuebe

Makpel ya Itultuloy a Salitaen so Salita na Dios

1. (a) Anton maong a balita so inyabawag na saray babangatan nen Jesus, balet panon so inkiwas na arum a Judio? (b) Antoran tepet so nitepet tayo?

 NGALNGALIN 2,000 taon lay linmabas, say Anak na Dios, si Jesu-Kristo, so alanaan bilang arapen ya Ari ed interon dalin. Pinatey si Jesus diad sugsog na relihyoson kakabusol, balet sikato so pinaoli nen Jehova. Diad panamegley nen Jesus, posible la natan so andi-anggaan a bilay. Anggaman ontan, sanen mapublikon inyabawag na saray babangatan nen Jesus iyan maong a balita, binmetag so panamasegsegang. Arum ed sikara so impriso, pinekpek ni ingen tan ingganggan ya ontunda lan mansalita nipaakar ed si Jesus. (Gawa 4:1-3, 17; 5:17, 18, 40) Anto so ginawa ra? Anto so nayarin gawaen mo? Kasin makpel mon itultuloy so pampulong?

2. (a) Anton makapakelaw a balita so kaukolan ya iyabawag ed panaon tayo? (b) Siopa so akanresponsabilidad a mangipulong ed maong a balita?

² Nen 1914 say Ari ed Panarian na Dios, si Jesu-Kristo, so nitrono ed tawen pian manuley ‘ed pegley na saray kakabusol to.’ (Salmo 110:2) Ontumbok, si Satanas tan saray demonyo to so nibantak dia ed dalin. (Apocalipsis 12:1-5, 7-12) Ginmapo lay kaunoran iran agew na peles a marelmeng a sistema. Sano mangangga iyan panat na panaon, mekmeken na Dios so interon satanikon sistema na bengabengatla. (Daniel 2:44; Mateo 24:21) Akaparaan ed saray niliktar so arapen ya ilalon andi-anggaan a bilay diad  sakey a dalin a magmaliw a paraiso. No inawat mo iyan maong a balita, labay mon inabang itan ed arum. (Mateo 24:14) Balet anton reaksion so nailaloan mo?

3. (a) Panon so ikikiwas na totoo ed mensahe na Panarian? (b) Anton tepet so nepeg tayon arapen?

³ Sano iyabawag mo so maong a balita na Panarian, walaray nayarin mangawat ed satan, balet kaslakan so agmanginenen. (Mateo 24:37-39) Nayarin ludlureyen odino sumpaen ka na arum. Impasakbay nen Jesus a nayarin onsabi so isusumpa manlapud mismon kakanayon mo. (Lucas 21:16-19) Nayarin onsabi met diad pasen na trabahom odino diad eskuelaan. Diad arum a pasen na dalin, saray Tastasi nen Jehova so sesebelan ni ingen na gobierno. Sano nipaarap ed ontan iran sirkumstansya, kasin makpel mo nin itutultuloy a salitaen so salita na Dios tan “ontalindeg a malet ed pananisia”?​—1 Corinto 16:13, NW.

Ag-manmamatalek ed Dilin Biskeg Tayo

4. (a) Pian napaneknekan tayo so inkasikatayo a matoor a lingkor na Dios, anto so sakey a manunan kakaukolanen? (b) Akin ya im-importante iray Kristianon pantitipon?

⁴ Say manunan kaukolan diad pagmaliw a matoor a lingkor nen Jehova et say panagmatalek ed saray itatarya to. Sakey ed saraya et say pantitipon ed kongregasyon. Papasesegen itayo na Kasulatan ya agtayo iratan papaulyanan. (Hebreos 10:23-25) Isesekar na saramay nantultuloy a matoor a Tastasi nen Jehova so iyatendin maparanay ed saray pantitipon a kaiba iray kaparan managdayew. Napadaak so pikakabat tayo ed Kasulatan diad sarayan pantitipon. Ontan met, ombulaslas so pakatalos tayo ed saray kabkabat a maong a katuaan, tan napatarem so pikakabat tayo diad pangusar ed saratan. Napaapit itayo ed saray Kristianon agagi tayo diad nankakasakey a panagdayew tan napabiskeg a manggawa ed linawa na Dios. Iwawanwan itayo  na espiritu nen Jehova diad panamegley na kongregasyon, tan diad panamegley na satan ya espiritu, si Jesus so wala ed leet tayo.​—Mateo 18:20; Apocalipsis 3:6.

5. Sano walad panangisebel iray Tastasi nen Jehova, anto so nagawa ed saray pantitipon?

⁵ Kasin aatendian mon maparanay so amin a pantitipon, tan kasin iyaaplikam a personal so narerengel mon sisingbaten? No maminsan, sano walad panangisebel iray Tastasi nen Jehova, nakaukolan so pantitipon ed ankelag iran grupo diad kaabungan. Nayarin manguman-uman so lugar odino oras tan nayarin aliwan naynay a kombeniente, arum a pantitipon so nagawa ed aralem lan labi. Balet anggaman ed kairapan odino kapeligroan, panggugunaetan na matoor ya agagin lalaki tan bibii so pagmaliw a presente ed kada pantitipon.

6. Panon tayon ipanengneng so panagmatalek ed si Jehova, tan panon itayon natulongan na saya pian mantultuloy a mansalitan makpel?

⁶ Nabayuboan so panagmatalek ed si Jehova diad maparanay ya iyasingger ed sikato panamegley na impapuson pikakasi, a bidbiren tayon nakaukolan tayo so tulong na Dios. Kasin satan so gagawaen mo? Mabetbet a nampikasi si Jesus legan na mangaraldalin a ministeryo to. (Lucas 3:21; 6:12, 13; 22:39-44) Tan diad samay labi sakbay na inkipasak to, pinaseseg toray babangatan to: “Manbantay kayo tan manpikasi kayo, pian agkayo onloob ed katutukso.” (Marcos 14:38) No naabet tayo so agpananginenen ed mensahe na Panarian, nayarin sikatayo so natukson ontayer ed ministeryo tayo. No sikatayo so balawen odino pasegsegangen na totoo, nayarin natukso tayon ontunda lan manpulong pian napaliisan iray problema. Balet no masimoon tayon ipikasi so espiritu na Dios ya ontulong ed sikatayo pian mantultuloy a mansalitan makpel, sikatayo  so nasalimbengan pian agnatukso.​—Lucas 11:13; Efeso 6:18-20.

Sakey a Rekord na Makpel a Panagpulong

7. (a) Akin a paninteresan tayon maong so rekord na saray Gawa? (b) Ebatan iray tepet a walad sampot na sayan parapo, ya idanet no panon a sikatayo so nagunggonaan ed impormasyon.

⁷ Paninteresan tayon maong so rekord ed libro na saray Gawa. Ibabaga to ed sikatayo no panon a saray apostol tan arum iran inmunan babangatan​—totoon walaan na saray liknaan a singa sikatayo—​ya atalonaan da iray babeng tan apaneknekan a makpel tan matoor a tastasi nen Jehova. Usisaen tayo so kabiangan na satan a rekord diad tulong na saray onggendan a tepet tan nisitan teksto. Legan a gawaen tayo, konsideraen no panon a sika so nagunggonaan a personal ed babasaen mo.

Kasin saray apostol so walaan na atagey ya aral? Kasin sikaray totoon nikasiporan ya andi-takot, anggan anto so nagawa? (Juan 18:17, 25-27; 20:19; Gawa 4:13)

Anto so tinmulong ed si Pedro a mansalitan makpel ed arap na Judion korte ya angondena ed dilin Anak na Dios? (Mateo 10:19, 20; Gawa 4:8)

Anto so gagawaen na saray apostoles legan na saray simba sakbay na inkidunget da ed Sanhedrin? (Gawa 1:14; 2:1, 42)

Sanen ingganggan na saray manuley ed saray apostol a tundaan da lan ipulong so nipaakar ed ngaran nen Jesus, panon so inyebat nen Pedro tan si Juan? (Gawa 4:19, 20)

Kayari na inkibulos da, diad siopa lamet so kinerewan na saray apostoles na tulong? Kasin impikasi ran ontunda lay panamasegsegang, odino anto? (Gawa 4:24-31)

 Diad anton paraan ya intarya nen Jehova so tulong sanen sinali na saray sumusumpa a patundaen so kimey na panagpulong? (Gawa 5:17-20)

Panoy impangipanengneng na saray apostol ya atalosan da so rason no akin a sikara so niyawat? (Gawa 5:21, 41, 42)

Anggan sanen dakel ed saray babangatan so nitaytayak lapud panamasegsegang, anto so intultuloy dan gawaen? (Gawa 8:3, 4; 11:19-21)

8. Antoray makapasagyat a resulta ed ministeryo na saray inmunan babangatan, tan panon a sikatayo so awalaan na pibibiang ed parehon ministeryo?

⁸ Aliwan maapa so kimey na panangipulong ed maong a balita. Ngalngalin 3,000 a babangatan so abautismoan nen Pentecostes 33 K.P. “Saray mananisia ed Katawan lalo nin naaruman ira, a dinmakel so bilang na saray lalaki tan bibii.” (Gawa 2:41; 4:4; 5:14) Kabekta, anggan say masebeg a managpasegsegang ed saray totoo na Dios, si Saulo na Tarsus, so nagmaliw a Kristiano tan makmakpel a nantasi nipaakar ed katuaan. Sikato so akabkabat bilang apostol Pablo. (Galacia 1:22-24) Agni tinmunda so kimey a ginmapo nen inmunan siglo. Lalon binmisbiskeg ed sarayan kaunoran ya agew tan asabi to la so amin a pasen na dalin. Pribilehyo tayoy mibiang ed satan, tan legan a gawaen tayo, makaaral itayo ed ehemplo na saray matoor a tastasin nanlingkor ya akauna nen sikatayo.

9. (a) Antoran pankanawnawa so inanamot nen Pablo diad panagpulong? (b) Diad antoran paraan ya ilalaknab mo so mensahe na Panarian ed arum?

⁹ Sanen naaralan nen Pablo so katuaan nipaakar ed si Jesu-Kristo, anto so ginawa to? “Tampol . . . impulong to si Jesus, a sayan Sakey so Anak na Dios.” (Gawa 9:20, NW) Inapresya to so agkanepegan a panangasi na Dios ed sikato,  tan binidbir ton nakaukolan na amin so maong a balita ya inawat to. Si Pablo so sakey a Judio, tan unong ed ugali diad saman a panaon, sikato so linma ed saray sinagoga pian manpulong. Sikato met so nampulong ed kabkaabungan tan akikatunongan ed saray totoo diad tindaan. Tan sikato so mabulos ya onalis ed saray balon teritorya pian ipulong so maong a balita.​—Gawa 17:17; 20:20; Roma 15:23, 24.

10. (a) Panon so impangipanengneng nen Pablo ya anggaman sikato so makpel, sikato met so makatebek diad paraan na impanpulong to? (b) Panon so nayarin pangipatnag tayo ed saray kalidad nen Pablo sano manpupulong ed saray kakanayon, katrabahoan, odino kaeskuelaan?

¹⁰ Makpel si Pablo balet ta makatebek met, kanian ontan itayo met komon. Tinangguyor toray Judio unong ed saray insipan na Dios ed atateng da. Diad saray Griego et sikato so nansalita nipaakar ed saray bengatlan kabisado ra. Sagpaminsan et inusar toy eksperiensya ton mismo ed impakaamta to ed katuaan bilang paraan ed panagpulong. Inkuanto: “Gawaen ko so amin a bengatla nisengeg ed maong a balita, pian komon siak so makapinabang ed satan ed arum.”​—1 Corinto 9:20-23, NW; Gawa 22:3-21.

11. (a) Anto so ginawa nen Pablo pian napaliisan so paulit-ulit a pipiarap ed saray sumusumpa? (b) Kapigan so nayarin makabat a pangalig tayo ed ehemplo nen Pablo, tan panon? (c) Iner so panlalapuan na biskeg pian mantultuloy a mansalitan makpel?

¹¹ Sanen apatnagan a magmaong parad si Pablo so manpulong ed sananey a pasen nisesengeg ed isusumpa, ontan so ginawa to imbes ya ipasoot so paulit-ulit a piarap ed saray sumusumpa. (Gawa 14:5-7; 18:5-7; Roma 12:18) Balet agton balot imbaing so maong a balita. (Roma 1:16) Anggaman asagmak nen Pablo so mapasang​—marawal ni ingen—​a panagtrato na saray sumusumpa, sikato so ‘akatipon na inkakpel diad panamegley na Dios tayo’ pian mantultuloy a manpulong. Inkuanto: “Say Katawan so  akisanawat ed siak, tan pinabiskeg to ak; pian dia ed panamegley ko, say panagpulong nagawa komon a maabig.” (1 Tesalonica 2:2, NW; 2 Timoteo 4:17) Si Jesus, say Ulo na Kristianon kongregasyon, so mantutultuloy a mangiiter na biskeg a nakaukolan tayo pian nagawaan so kimey ya impasakbay to para ed panaon tayo.​—Marcos 13:10.

12. Anto so mangipatnag ed Kristianon inkakpel, tan anto so letnegan na satan?

¹² Walaan itayo na nagnap a rason a mantultuloy a mansalitan makpel ed salita na Dios, a singa ginawa nen Jesus tan arum iran matoor a lingkor na Dios nen inmunan siglo. Agkabaliksan na saya so pagmaliw tayon aliwan makonsidera odino salien ya ipasoot so mensahe ed saraman so agmalabay. Balet ag-itayo onsuko lapud saray totoo so agmanginenen; nisay patundaen itayo la na isusumpa. Singa si Jesus, ipaimano tayo so Panarian na Dios bilang say makanepegan a gobierno ed sankadalinan. Mansalita itayon matalek lapud irerepresenta tayo si Jehova, say Sankatalbaan a Soberano, tan lapud say mensahen iyaabawag tayo so agnanlapud sikatayo noagta nanlapud sikato. Tan say panangaro tayo ed si Jehova so nepeg a sankabiskegan a motibo diad pangidayew ed sikato.​—Filipos 1:27, 28; 1 Tesalonica 2:13.

Repason Pantongtongan

• Akin ya importante so panginabang ed mensahe na Panarian diad amin no nayari, balet antoran reaksion so nailaloan tayo?

• Panon tayon nipanengneng ya ag-itayo manmamatalek ed dilin biskeg tayo diad panaglingkor ed si Jehova?

• Antoran makanakanan leksion so naaralan tayo ed libro na saray Gawa?

[Tepetepet Parad Panagaral]

 [Saray litrato ed pahina 173]

Singa ed apalabas, saray lingkor nen Jehova natan so mansasalita nipaakar ed salita na Dios tekep na inkakpel