Dati, say amta na saray scientist, makakala na nectar so dila na hummingbird lapud proseso ya tatawagen ya capillary action—atan may natural ya ompasok so liquid ed maimpis ya tube. Pero nen nanresearch iran maong, adiskobre da ya walay mas epektibon gagawaen na sayan siwit, titiponen to so nectar ed dila to.

 Nonot mo pa: No ipaway to lay dila to pian mangalay nectar, mankadua so sampot na dila to. Diad kada nguro na dila to et walay singa sakob ya automatic ya onlukas no ontatsaw so dila to ed nectar. Lapud satan, kusa lan onkarga ed dila to so nectar. Kanian agto la kaukolan ya supsopen ya singa straw. Kayari to, kusa lan onkapot so sakob na nguroy dila to tan mila met la so atipon ya nectar.

 Imbaga na saray researcher ya si Alejandro Rico-Guevara, Tai-Hsi Fan, tan Margaret Rubega ya “anggapoy 0.1 second” ya nagagawa itan. Imbaga da met ya “say nguro na dila na hummingbird et nikadkadumay paraan to pian makala na liquid, mapmaples ya man-adjust . . . no ontatsaw itan ed fluid.”

 Aliwan satan labat, agla kaukolan na hummingbird so mangusar na energy no gawaen to itan. Lapud natural ya shape tan desinyo na nguroy dila na hummingbird, kusan onlukas tan onkapot itan no ontatsaw so dila to ed fluid.

 Epektiboy paraan na dila na hummingbird ed pangalay fluid. Panisiaan na saray researcher ya mausa-usar itan ya adiskobre da diad medisina, robotics, tan diad arum nin field na science. Makatulong met itan pian makaimbento ray kagawaan parad pansepsep na liquid odino tinmagas ya langis.

 Antoy nibagam? Kasin say inkadesinyo na dila na hummingbird et nan-evolve labat? Odino walay nandesinyo?