“Dayaw Ako sa Iya Tumalagsahon nga Katutom”

SI Günter Grass isa ka Aleman nga awtor nga nagdaug sang Nobel nga Premyo para sa Literatura sang 1999. Sang 2006, ginbalhag niya ang sugilanon sang iya kabuhi. Sa sini nga libro, ginlaragway niya ang tion nga gintawag sia agod magserbisyo sa sibilyan nga pangdepensa sang Alemanya. Ginsaysay man niya ang tuhoy sa isa ka tawo nga indi gid niya malimtan bisan 60 ka tuig na ang nagligad. Ini nga tawo nanindugan sa iya pagtuo bisan ginhingabot.

Sa isa ka interbyu nga ginbalhag sa pang-adlaw-adlaw nga pamantalaan nga Frankfurter Allgemeine Zeitung, ginsugid ni Grass ang tuhoy sa sining tumalagsahon nga tawo, nga nangindi sa pag-uyat sing armas. Si Grass nagsiling nga ining tawo “wala magsakdag sa bisan ano nga popular nga mga ideolohiya, kay indi sia isa ka Nazi, isa ka Komunista, ukon isa ka Sosyalista. Isa sia ka Saksi ni Jehova.” Indi na madumduman ni Grass ang ngalan sini nga Saksi, apang ginhayuan niya sia nga si Wala-kami-nagahimo-sina, bangod ang mga Saksi Jehova wala nagasoldado kag wala man nagahimo sing mga butang nga may labot sa militar. Nakilal-an sang mga manugpanalawsaw sang mga Saksi ni Jehova nga sia amo si Joachim Alfermann. Sulitsulit sia nga ginkastigo kag ginpakahuy-an, kag dayon ginbartolina. Apang nagpabilin nga malig-on si Alfermann kag wala gid mag-uyat sing armas.

“Dayaw ako sa iya tumalagsahon nga katutom,” siling ni Grass. “Ginpamangkot ko ang akon kaugalingon: Paano niya nabatas ini tanan? Paano niya ini nahimo?” Ginbatas ni Alfermann ang malawig nga mga panikasog agod bungkagon ang iya integridad sa Dios. Sang ulihi, sang Pebrero 1944 ginbilanggo sia sa kampo konsentrasyon sa Stutthof. Ginhilway sia sang Abril 1945, kag nalampuwasan niya ang inaway kag napatay nga isa ka matutom nga Saksi ni Jehova sang 1998.

Si Alfermann isa sa mga 13,400 ka Saksi—sa Alemanya kag sa mga pungsod nga ginsakop sang mga Nazi—nga ginsilutan bangod sa ila pagtuo. Gintuman nila ang sugo sa Biblia, nga magpabilin nga neutral kag indi mag-entra sa inaway. (Mateo 26:52; Juan 18:36) Mga 4,200 ka Saksi ang ginbilanggo sa mga kampo konsentrasyon, kag 1,490 sa ila ang napatay. Bisan karon, ginadayaw gihapon sang madamo nga indi mga Saksi ang ila panindugan kag katutom.

[Piktyur sa pahina 32]

Si Joachim Alfermann