ƐZUKOALƐDEƐ 51
Kɛ Ɔkɛyɛ Na Wɔ Ɛdendɛlɛ Amaa Gyihova Anye Alie Ɛ?
Mekɛ mɔɔ Gyihova bɔle yɛ la, ɔmaanle yɛ ahyɛlɛdeɛ kɛnlɛma bie—yemɔ a le tumi mɔɔ maa yɛkola yɛtendɛ la. Asoo kɛzi yɛfa ahyɛlɛdeɛ ɛhye yɛdi gyima la hyia ye? Ɔhyia ye kpalɛ! (Kenga Gyemise 1:26.) Ɔti kɛ ɔkɛyɛ na yɛ ɛdendɛlɛ amaa Gyihova anye alie ɛ?
1. Kɛzi ɔwɔ kɛ yɛfa ɛdendɛlɛ ahyɛlɛdeɛ ne yɛdi gyima ɛ?
Baebolo ne ka kɛ ‘yɛhɔ zo yɛmaa yɛ nwo anwosesebɛ na yɛboa yɛ nwo ngoko.’ (1 Tɛsalonaekama 5:11) Ɛze awie mɔ mɔɔ bɛhyia anwosesebɛmaanlɛ ɔ? Duzu a ɛbahola wɔayɛ wɔamaa bɛ nye alie a? Maa bɛnwu ye kɛ ɛdwenle bɛ nwo. Bie a ɛbahola wɔaha debie mɔɔ ɛ nye die nwo wɔ bɛ nwo la wɔahile bɛ. Ɛze ngɛlɛlera bie mɔɔ bahola amaa awie mɔɔ ɛze ye la anwosesebɛ ɔ? Ngɛlɛlera dɔɔnwo wɔ ɛkɛ mɔɔ ɛbahola wɔava bie wɔali gyima a. Kakye noko kɛ, kɛzi ɛbaha edwɛkɛ bie la bahola amaa awie mɔ anwosesebɛ kpalɛ. Ɔti dahuu bɔ mɔdenle tendɛ kɛnlɛma yɛɛ bɛtɛɛ.—Mrɛlɛbulɛ 15:1.
2. Edwɛkɛ boni a ɔnle kɛ yɛka a?
Baebolo ne ka kɛ: “Bɛmmamaa edwɛkɛ ɛtane fi bɛ nloa anu finde.” (Kenga Ɛfɛsɛsema 4:29.) Ɛhye kile kɛ ɔnle kɛ yɛka edwɛkɛ mgbane mgbane anzɛɛ yɛka awie anwo edwɛkɛ ɛtane mɔɔ bamaa yeali nyane la. Eza ɔwɔ kɛ yɛkpo kɛ yɛbaye awie mɔ anwo ndɛne anzɛɛ yɛbazɛkye bɛ duma.—Kenga Mrɛlɛbulɛ 16:28.
3. Duzu a bamaa yɛ ɛdendɛlɛ amaa awie mɔ anwosesebɛ a?
Ninyɛne mɔɔ yɛta yɛka nwolɛ edwɛkɛ la maa bɛnwu mɔɔ wɔ yɛ ahonle nu nee mɔɔ yɛdwenle nwolɛ la kpalɛ. (Luku 6:45) Ɔti ɔwɔ kɛ yɛbɔ mɔdenle yɛtete yɛ nwo na yɛfa yɛ adwenle yɛsie ninyɛne mgbalɛ zo—ninyɛne mɔɔ le tenlene, mɔɔ nwolɛ te, mɔɔ maa bɛnyia ɛlɔlɛ yɛɛ mɔɔ ayɛlɛyelɛ wɔ nwolɛ la. (Felepaema 4:8) Amaa yɛava yɛ adwenle yɛazie ninyɛne ɛhye mɔ azo la, ɔwɔ kɛ yɛkpa ninyɛne mɔɔ yɛfa yɛdielie yɛ nye nee yɛ gɔnwo mɔ nrɛlɛbɛ nu. (Mrɛlɛbulɛ 13:20) Eza ɔwɔ kɛ yɛdwenle kolaa na yɛadendɛ. Dwenle kɛzi wɔ ɛdendɛlɛ baha awie mɔ la anwo. Baebolo ne ka kɛ: “Ɛdendɛlɛ mgbane mgbane le kɛ konle dadeɛ mɔɔ wowɔ la, noko nrɛlɛbɛvolɛ atafinlima yɛ ayile.”—Mrɛlɛbulɛ 12:18.
SUKOA DƆƆNWO
Sukoa kɛzi ɛbahola wɔadendɛ wɔamaa Gyihova anye alie na yeamaa awie mɔ anwosesebɛ la anwo debie.
4. Nea wɔ ɛdendɛlɛ boɛ
Ɔyɛ a yɛ muala yɛka edwɛkɛ mɔɔ nzinlii yɛnu yɛ nwo wɔ nwolɛ la. (Gyemise 3:2) Kenga Galeehyeama 5:22, 23, na akee bɛzuzu kpuya ɛhye mɔ anwo:
-
Subane ɛhye mɔ boni a ɛbahola wɔayɛ nwolɛ asɔne amaa yeaboa wɔ yeamaa wɔanlea wɔ ɛdendɛlɛ boɛ a? Kɛzi subane ɛhye mɔ bahola aboa wɔ ɛ?
Kenga 1 Kɔlentema 15:33, na akee bɛzuzu kpuya ɛhye anwo:
-
Kɛzi menli mɔɔ ɛfa bɛ agɔnwolɛ nee ninyɛne mɔɔ ɛfa ɛdielie ɛ nye la bahola aha wɔ ɛdendɛlɛ ɛ?
Duzu a bahola aha kɛzi ɛtendɛ la ɛ?
Kenga Nolobɔvo 3:1, 7, na akee bɛzuzu kpuya ɛhye anwo:
-
Mekɛ boni a nrɛlɛbɛ wɔ nu kɛ ɛbayɛ koonwu anzɛɛ ɛbahendɛ na mekɛ kpalɛ nu wɔadendɛ a?
5. Ka awie mɔ anwo edwɛkɛ kpalɛ
Kɛ ɔkɛyɛ na yɛambɔ awie mɔ aholoba anzɛɛ yɛanga bɛ nwo edwɛkɛ ɛtane ɛ? Ye VIDIO ne, na akee bɛzuzu kpuya ɛhye mɔ anwo.
-
Wɔ vidio ne anu, duzu ati a ɛnee adiema ne kulo kɛ ɔkakyi adenle mɔɔ ɔdua zo ɔka awie mɔ anwo edwɛkɛ la ɛ?
-
Duzu a ɔyɛle amaa yeahola yeayɛ zɔ a?
Kenga Nolobɔvo 7:16, na akee bɛzuzu kpuya ɛhye anwo:
-
Saa ɔba yɛ adwenle nu kɛ yɛha awie anwo edwɛkɛ ɛtane a, duzu a ɔwɔ kɛ yɛkakye a?
Kenga Nolobɔvo 7:21, 22, na akee bɛzuzu kpuya ɛhye anwo:
-
Kɛzi ngyehyɛnu ɛhye mɔ bahola aboa wɔ amaa wɔanva ɛya wɔ mekɛ mɔɔ awie kɛha ɛ nwo edwɛkɛ ɛtane la ɛ?
6. Tendɛ kɛnlɛma kile wɔ abusua ne
Gyihova kulo kɛ yɛfi ɛlɔlɛ nu yɛtendɛ kɛnlɛma yɛkile yɛ abusua ne. Ye VIDIO ne, na akee bɛzuzu kpuya ɛhye anwo.
-
Duzu a baboa wɔ yeamaa wɔadendɛ kɛnlɛma wɔahile wɔ abusua ne a?
Kenga Ɛfɛsɛsema 4:31, 32, na akee bɛzuzu kpuya ɛhye anwo:
-
Ɛdendɛlɛ boni a bamaa yɛ abusua ne anwosesebɛ a?
Gyihova hanle kɛzi ɔkulo ɔ Ra Gyisɛse la anwo edwɛkɛ. Kenga Mateyu 17:5, na akee bɛzuzu kpuya ɛhye anwo:
-
Kɛ ɔkɛyɛ na wɔazukoa Gyihova wɔ kɛzi ɛ nee wɔ abusua ne tendɛ la anwo ɛ?
Kpondɛ ndenle dua zo kanvo awie mɔ
BIE MƆ KA KƐ: “Meka mɔɔ wɔ me adwenle nu la. Saa awie mɔ ɛngulo mɔɔ meka la a ɔnvale me nwo.”
-
Ɛ nee bɛ yɛ adwenle ɔ? Duzu ati ɔ?
EDWƐKƐ TITILI
Tumi wɔ edwɛkɛ mɔɔ yɛka la anu. Ɔwɔ kɛ yɛdwenle edwɛkɛ mɔɔ yɛka, mekɛ mɔɔ yɛka ye nee kɛzi yɛka ye la anwo boɛ.
Ndinu
-
Ndenle boni mɔ a ɛbahola wɔalua zo wɔamaa wɔ ɛdendɛlɛ aboa awie mɔ a?
-
Edwɛkɛ boni a ɔnle kɛ ɛka a?
-
Duzu a baboa yɛ amaa dahuu yɛ ɛdendɛlɛ ayɛ kɛnlɛma na yeamaa awie mɔ anwosesebɛ a?
KPONDƐ DƆƆNWO
Duzu a baboa yɛ yeamaa yɛaha edwɛkɛ mɔɔ bamaa awie mɔ anwosesebɛ a?
Sukoa debie mɔɔ baboa wɔ amaa wɔanga edwɛkɛ ɛtane la.
“Ɛdendɛlɛ Ɛtane Ɛnle Kpalɛ Fee Ɔ?” (Edwɛkɛ mɔɔ wɔ jw.org azo)
Nea kɛzi ɛbahola wɔahwe ɛ nwo wɔavi ndɛneyelɛ nwo la.
Nea kɛzi Gyihova boale nrenyia bie ɔmaanle ɔholale ɔgyakyile edwɛkɛ ɛtane ɛhanlɛ la.
“Membɔle Ɔ Bo Menzuzule Kɛzi Me Ɛbɛlabɔlɛ Ɛlɛkɔ Ye La Anwo Kpalɛ” (Ɛzinzalɛ Arane, August 1, 2013)
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
