ƐZUKOALƐDEƐ 30
Wɔ Alɔvolɛ Bahola Adɛnla Aze Bieko!
Ewule maa yɛdi nyane nee alɔbɔlɛ kpole. Ɛhye ati a Baebolo ne ka kɛ ewule le kpɔvolɛ la. (1 Kɔlentema 15:26) Wɔ Ɛzukoalɛdeɛ 27 ne anu, ɛzukoale kɛ Gyihova baye kpɔvolɛ zɔhane avi ɛkɛ. Na bɛdabɛ mɔɔ bɛwu dɛba la ɛ? Wɔ ɛzukoalɛdeɛ ɛhye anu, ɛbazukoa Gyihova ɛwɔkɛ bieko mɔɔ yɛ anyelielɛ la anwo debie—ɔbamaa menli mgbe mgbe azia aradɛnla aze dahuu. Ɔbadwazo bɛ! Asoo ɛhye bazi amgba? Asoo bɛbadwazo bɛ bɛahɔ anwuma anzɛɛ bɛara azɛlɛ ye azo?
1. Duzu a Gyihova kulo kɛ ɔyɛ ɔmaa yɛ alɔvolɛ mɔɔ ɛwu la ɛ?
Gyihova anye la kɛ ɔbamaa menli mɔɔ ɛwu la azia ara ngoane nu bieko. Ɛnee Dwobu mɔɔ lɛ diedi la lɛ anwodozo kɛ saa ɔwu a Nyamenle arɛle ɛnrɛvi ye. Ɔhanle ɔhilele Nyamenle kɛ: “Ɛbavɛlɛ, na mebalie wɔ zo [wɔ Nla ne anu].”—Kenga Dwobu 14:13-15.
2. Kɛzi yɛkola yɛnwu kɛ bɛbadwazo mowuamra ɛ?
Mekɛ mɔɔ Gyisɛse wɔ azɛlɛ ye azo la, Nyamenle maanle ye tumi ɔmaanle ɔdwazole menli. Gyisɛse dwazole kakula raalɛ bie mɔɔ ɛli ɛvolɛ 12 la yɛɛ kunlavolɛ bie ara nrenyia. (Maake 5:41, 42; Luku 7:12-15) Nzinlii, Gyisɛse agɔnwo Lazalɛse wule. Ɛnee Lazalɛse ɛwu bɛzie ye yeli kenle nna ɛdeɛ, noko Gyisɛse dwazole ye. Gyisɛse zɛlɛle Nyamenle na akee ɔhakyile ɔ nye wɔ nla ne anwo ɔdeanle nu kpole kɛ: “Lazalɛse, finde bɛla!” Na “nrenyia ne mɔɔ ɛwu la vindele rale”—yedwazo! (Dwɔn 11:43, 44) Nea kɛzi Lazalɛse mbusuafoɔ nee ɔ gɔnwo mɔ anye liele la!
3. Anyelazo boni a wɔ ɛkɛ maa wɔ alɔvolɛ mɔɔ ɛwu la ɛ?
Baebolo ne bɔ ɛwɔkɛ kɛ: ‘Bɛbadwazo menli bɛavi ewule nu.’ (Gyima ne 24:15) Menli mɔɔ Gyisɛse dwazole bɛ la, ɛnee bɛtɛkɔle anwuma. (Dwɔn 3:13) Bɛ nye liele kɛ bɛdwazole bɛ bɛrale azɛlɛ ye azo bieko la. Zɔhane ala a ɔnrɛhyɛ, Gyisɛse badwazo menli mgbe mgbe yeamaa bɛadɛnla aze dahuu wɔ paladaese a. Ɔhanle kɛ “bɛdabɛ mɔɔ bɛwɔ ngakyelɛ nla ne mɔ anu la kɔsɔɔti”—bɔbɔ bɛdabɛ mɔɔ ɔzɔho kɛ menli arɛle ɛvi bɛ noko Nyamenle kakye bɛ la—badwazo.—Dwɔn 5:28, 29.
SUKOA DƆƆNWO
Nea daselɛ mɔɔ wɔ Baebolo ne anu mɔɔ kile kɛ bɛbahola bɛadwazo mowuamra la. Sukoa kɛzi ewudwazo ne bahola akyekye ɛ rɛle na yeamaa wɔanyia anyelazo la.
4. Gyisɛse hilele kɛ ɔkola ɔdwazo mowuamra
Sukoa mɔɔ Gyisɛse yɛle maanle ɔ gɔnwo Lazalɛse la anwo ninyɛne dɔɔnwo. Kenga Dwɔn 11:14, 38-44, na akee bɛzuzu kpuya ɛhye mɔ anwo:
-
Kɛzi yɛkola yɛnwu kɛ ɛnee Lazalɛse ɛwu amgba ɛ?—Nea ngyɛnu 39.
-
Saa ɛnee Lazalɛse ɛhɔ anwuma a, ɛnea a anrɛɛ Gyisɛse bamaa yeazia yearadɛnla azɛlɛ ye azo ɔ?
5. Bɛbadwazo menli dɔɔnwo!
Kenga Edwɛne 37:29, na akee bɛzuzu kpuya ɛhye anwo:
-
Menli mgbe mgbe mɔɔ bɛbadwazo bɛ la bɛadɛnla ni?
Tɛ menli mɔɔ zonlenle Gyihova la angomekye a Gyisɛse badwazo bɛ a, ɔbadwazo menli gyɛne dɔɔnwo. Kenga Gyima ne 24:15, na akee bɛzuzu kpuya ɛhye anwo:
-
Nwane mɔ a ɛkulo kɛ ɛnwu kɛ bɛdwazo bɛ a?
Dwenle ɛhye anwo nea: Ɔnyɛ se kɛ Gyisɛse badwazo awie mɔɔ ɛwu la kɛ mɔɔ selɛ kola tunwue ɔ ra mɔɔ ɛla la
6. Ewudwazo ne bahola akyekye ɛ rɛle na yeamaa wɔanyia anyelazo
Gyeelɛse ara raalɛ ne anwo edwɛkɛ mɔɔ wɔ Baebolo ne anu la ɛkyekye menli dɔɔnwo mɔɔ ɛlɛdi nyane la arɛle na yemaa bɛ anwosesebɛ. Kenga mɔɔ zile la wɔ Luku 8:40-42, 49-56.
Kolaa na Gyisɛse adwazo Gyeelɛse ara raalɛ ne la, ɔzele ye papa kɛ: “Mmasulo, wɔmɔ nyia diedi ala.” (Nea ngyɛnu 50.) Kɛzi ewudwazo anyelazo ne bahola aboa wɔ . . .
-
wɔ mekɛ mɔɔ wɔ kulovolɛ bie kɛwu la ɛ?
-
wɔ mekɛ mɔɔ wɔ ngoane la esiane nu la ɛ?
Ye VIDIO ne, na akee bɛzuzu kpuya ɛhye anwo.
-
Kɛzi ewudwazo anyelazo ne ɛkyekye Phelicity awovolɛ arɛle na yemaa bɛ anwosesebɛ ɛ?
BIE MƆ KA KƐ: “Bɛnlie ewudwazo ne bɛnli.”
-
Kɛzi ɛnwu ye ɛ?
-
Ngɛlɛlera boni a ɛbava wɔahile kɛ bɛbadwazo menli a?
EDWƐKƐ TITILI
Baebolo ne bɔ ɛwɔkɛ kɛ bɛbadwazo menli mgbe mgbe mɔɔ ɛwu la. Gyihova kulo kɛ bɛtɛnla aze bieko, na yemaa Gyisɛse tumi kɛ ɔdwazo bɛ.
Ndinu
-
Duzu a kile kɛ Gyihova nee Gyisɛse kulo kɛ bɛdwazo mowuamra bɛba ngoane nu bieko a?
-
Menli mgbe mgbe mɔɔ bɛbadwazo bɛ la bɛadɛnla ni—anwuma anzɛɛ azɛlɛ ye azo? Duzu ati a wɔha ye zɔ a?
-
Duzu a maa ɛdie ɛdi kɛ wɔ alɔvolɛ badɛnla aze bieko a?
KPONDƐ DƆƆNWO
Sukoa ninyɛne mɔɔ ɛbahola wɔayɛ wɔava wɔagyinla nyanelilɛ nloa la.
Asoo Baebolo ngyinlazo bahola aboa awie mɔɔ ɛlɛdi nyane la amgba?
Kɛ ɔkɛyɛ na ngakula agyinla bɛ kulovolɛ bie ewule nloa ɛ?
Asoo bɛbadwazo awie bahɔ anwuma? Nwane mɔ a bɛnrɛdwazo bɛ a?
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
