SAA mualɛ ne le ɛhɛe a, ɛnee kpuyia bieko ba ye kɛ: Asoo yɛ subane ka Nyamenle nganeɛdelɛ? Wɔ adenle fofolɛ zo, asoo yɛ nyɛleɛ bahola amaa Nyamenle anye alie anzɛɛ ali nyane? Tete nrɛlɛbɛvoma bie mɔ buale kɛ kyɛkyɛ. Bɛzule kpolera kɛ awie biala ɛnle ɛkɛ mɔɔ ye nyɛleɛ fane Nyamenle anwo a, yemɔti Nyamenle ɛngola ɛnde nganeɛ. Noko Baebolo ne kilehile debie gyɛne, yemɔ a le kɛ Gyihova te nganeɛ na ɔdwenle mɔɔ yɛyɛ la anwo kpalɛ. Suzu edwɛkɛ mɔɔ wɔ Edwɛndolɛ 78:40, 41 la anwo.

Edwɛndolɛ 78 ka kɛzi Nyamenle nee tete Yizilayɛma luale la anwo edwɛkɛ. Mekɛ mɔɔ ɔliele maanle ne ɔvile akɛlɛzonlenlɛ bo wɔ Yigyibiti la, Gyihova bɔle bɛ ɛwɔkɛ kɛ ɔ nee bɛ banyia agɔnwolɛvalɛ titile bie. Ɔbɔle ɛwɔkɛ kɛ saa bɛdi ye mɛla ne mɔ azo a, “bɛbayɛ [ye] ɛdeɛ wɔ maanle maanle kɔsɔɔti avinli” na yeava bɛ yeali gyima titile bie yeamaa ye bodane ne ara nu. Menli ne liele dole nu na bɛ nee ye yɛle Mɛla ngyekyeleɛ. Asoo bɛyɛle mɔɔ bɛhanle kɛ bɛbayɛ la?—Adendulɛ 19:3-8.

Edwɛndolɛnli ne ka kɛ: “Bɛdele ɔ nwo atua dɔɔnwo wɔ fienemgbole ne anu.” (Ngyɛnu 40) Ngyɛnu mɔɔ doa zo la fa boka nwo kɛ: “Bɛzɔle ye bɛnleanle fane dɔɔnwo.” (Ngyɛnu 41) Yɛ ye nzonlɛ kɛ kɛlɛvolɛ ne hanle kɛ bɛhɔle zo bɛdele atua ko ne ala fane dɔɔnwo. Mekɛ mɔɔ bɛliele bɛ bɛvile Yigyibiti la anzi mekɛ ekyi bie anu, wɔ fienemgbole ne anu yɛɛ bɛ atuadelɛ subane ne bɔle ɔ bo a. Menli ne bɔle ɔ bo dendɛle bɛ nzo abo tiale Nyamenle, ɛnee bɛnlie bɛnli kɛ ɔbahola yeanlea bɛ. (Ɛdianlɛ 14:1-4) Buluku bie mɔɔ bɛyɛ bɛmaa menli mɔɔ kile Baebolo bo la ka kɛ bɛbahola bɛahile edwɛkɛ “bɛdele ɔ nwo atua” abo “wɔ adenle fofolɛ zo kɛ ‘bɛmanle bɛ ahonle yɛle se wɔ Nyamenle anwo’ anzɛɛ ‘bɛhanle “kyɛkyɛ” bɛhilele Nyamenle.’” Noko akee, Gyihova anwunvɔnezelɛ ne ati, ɔvale ye menli ne ɛtane ɔhyɛle bɛ wɔ mekɛ mɔɔ bɛnlunle bɛ nwo la. Noko bɛziale bɛvale bɛ subane dɛba ne na bɛdele atua bieko. Na zɔhane ala a bɛhɔle zo bɛyɛle a.—Edwɛndolɛ 78:10-19, 38.

Saa Gyihova menli ne mɔɔ ɛnzi pi la te atua biala a kɛzi ɔte nganeɛ ɛ? Ngyɛnu 40 ne ka kɛ: “Bɛmanle ɔlile nyane.” Baebolo ngilebɛbo fofolɛ ka kɛ bɛyɛle “debie bɛmanle ɔlile nyane.” Baebolo nwo neɛnleanu buluku ko kilehile nu kɛ: “Mɔɔ ɛhye kile la a le kɛ kɛmɔ kakula anzosesebɛ nee atuatevolɛ subane maa bɛdi nyane la zɔhane ala a ɛnee Hibuluma ne noko subane de a.” Kɛmɔ kakula anzosesebɛ bahola amaa ye awovolɛ ali nyane wɔ bɛ ahonle nu la, zɔhane ala a Yizilayɛma atua ɛdelɛ ne manle “Yizilayɛ Nwuanzanwuanza Ko ne” lile nyane a.—Ngyɛnu 41.

Duzu a yɛkola yɛsukoa yɛfi edwɛndolɛ ɛhye anu a? Saa yɛnwu kɛ Gyihova bikye ye azonvolɛ kpalɛ na ɔlɛ bɛ nwo abotane a, ɔmaa yɛ rɛle kyekye. Wɔ mekɛ ko ne ala anyebolo wɔ nu kɛ yɛbanwu kɛ Gyihova lɛ nganeɛdelɛ na yɛ subane kola ka ye nganeɛdelɛ. Kɛzi ɛhye mɔɔ yɛnwu ye la ka wɔ ɛ? Asoo ɔka wɔ ɔmaa ɛnyia ɛhulolɛ kɛ ɛbayɛ mɔɔ ɔtenrɛ la ɔ?

Kɛ anrɛɛ yɛbali ɛtaneyɛlɛ nzi na yɛamaa Gyihova ali nyane la, yɛbahola yɛazi kpɔkɛ yɛayɛ mɔɔ tenrɛ la na yɛamaa ɔ nye alie. Na ɛhye a ɔkpondɛ kɛ ye azonvolɛ yɛ a: “Me ra nrenya, nwu nrɛlɛbɛ na maa me nye ɛlie.” (Mrɛlɛbulɛ 27:11) Debie mɔɔ sonle bolɛ kpole kpalɛ mɔɔ yɛbahola yɛava yɛamaa Gyihova la a le kɛ yɛbabɔ ɛbɛla mɔɔ ɔbamaa ɔ nye alie la.