Kilisienema agyalɛ mɔɔ ɛbulɛ nee enililɛ wɔ nu la wula Gyihova anyunlunyia na ɔmaa agyalɛma ne anye die. (Mk 10:9) Ɔwɔ kɛ Kilisienema fa Baebolo ngyinlazo di gyima wɔ mekɛ mɔɔ bɛlɛkpa awie mɔɔ bɛkulo kɛ bɛgya ye la amaa bɛ agyalɛ ne adɛnla ɛkɛ ne dahuu na yeayɛ anyelielɛ.

Ɔle kpalɛ kɛ ɛ nee awie ɛnrɛyɛ agyalɛ ngyehyɛleɛ wɔ mekɛ mɔɔ ɛle “kakula somaa” mɔɔ nla nu nganeɛdelɛ mɔɔ anu yɛ se kola sɛkye wɔ kpɔkɛzilɛ la. (1Kɔ 7:36) Ɔle kpalɛ kɛ wɔ mekɛ mɔɔ ɛtɛgyale la ɛbabɔ mɔdenle wɔayɛ ninyɛne mɔɔ ɔbamaa ɛ nee Gyihova agɔnwolɛvalɛ ne anu ayɛ se na wɔanyia Kilisiene subane ngɛnlɛma la. Ɛhye baboa wɔ kpalɛ wɔ mekɛ mɔɔ ɛbagya la yeamaa wɔ agyalɛ ne agyinla.

Kolaa na wɔalie wɔado nu kɛ ɛbagya awie la ɔwɔ kɛ ɛnwu “ahonle nu sonla mɔɔ vea” la, kile kɛ ɔwɔ kɛ ɛnwu ahenle ne kpalɛ. (1Pi 3:4) Saa ɛnwu ninyɛne mɔɔ ɔgyegye wɔ adwenle la a, ɛ nee ye ɛzuzu nwolɛ. Wɔ agyalɛ nu, ɔwɔ kɛ ɛfa wɔ adwenle ɛsie mɔɔ ɛbahola wɔava wɔamaa la azo tɛla mɔɔ ɛbanyia ye la. (Fe 2:3, 4) Saa ɛfa Baebolo ngyinlazo ɛbɔ wɔ ɛbɛla kolaa na wɔagya a, ɔnrɛyɛ se kɛ saa ɛgya a, ɛbadoa zo wɔayɛ zɔ na yemɔ bamaa wɔ agyalɛ ne ayɛ anyelielɛ kpalɛ.

NEA SIEZIE Ɛ NWO MAA AGYALƐ​—FOA 3: ‘SESE YE BOLƐ’ VIDIO NE NA BUA KPUYA ƐHYE MƆ:

• Kɛzi ɛnee adiema raalɛ ne nee kpavolɛ ne agɔnwolɛvalɛ ne ɛlɛkɔ ye ɛ?

• Mekɛ ɛlɛkɔ la duzu a ɔnwunle ye wɔ kpavolɛ ne anwo a?

• Moalɛ boni a ye awovolɛ vale maanle ye a, na kpɔkɛ mɔɔ nrɛlɛbɛ wɔ nu la boni a ɔzile a?