Wɔ October 5 nee 6, 2013 dapɛne awieleɛ ne, tievolɛma mɔɔ bɛ dodo le 1,413,676 mɔɔ bɛwɔ maanle 31 azo la, diele Watch Tower Bible and Tract Society of Pennsylvania ɛvolɛ ayia ne mɔɔ tɔ zo 129 la. Bie mɔ diele ye wɔ Gyihova Alasevolɛ Nyianu Asalo ne mɔɔ wɔ Jersey City, New Jersey, U.S.A. la anu, yɛɛ bie mɔ noko diele ye wɔ Intanɛte zo.

Guy Pierce mɔɔ boka Gyihova Alasevolɛ Neazo Eku ne anwo la a yɛle ebianutɛnlavolɛ a. Ɔmanle bɛdabɛ mɔɔ bɛrale la anye lale ninyɛne ɛhye mɔ ade. Bɛbabua Baebolo nu kpuyia titile bie mɔ, bɛbamaa nɔhalɛ ne wienyi ne ada, na bɛava sunsum nu “aleɛ [bɛamaa] wɔ mekɛ ne anloa.”​—Mateyu 24:45; Mrɛlɛbulɛ 4:18.

“Ninyɛne Mɔɔ Di Gyihova Eni.”

Mark Sanderson mɔɔ boka Neazo Eku ne anwo la hilehilele ninyɛne mɔɔ bɛvale bɛzieziele ɛkɛ bɛmanle menli nleanle wɔ yɛ gyima ne ati wɔ Brooklyn, New York, U.S.A. mɔɔ bɛdole ye duma “Baebolo Ne Nee Duma Nwuanzanwuanza Ne” la anu. Ɛleka mɔɔ Nyamenle duma ne finde wɔ Hibulu Ngɛlɛlera ne nee Keleseɛnema Giliki Ngɛlɛlera ne anu, tete Baebolo dɔɔnwo, nee tete adwinli ninyɛne nee Avinli Mekɛ ne anu Baebolo mukelɛ bie mɔ mɔɔ bɛzia bɛyɛ bie la boka ninyɛne ne anwo.

Ninyɛne titile mɔɔ bɛvale bɛzieziele ɛkɛ ne la bie a le Baebolo ne mɔɔ William Tyndale hilele ɔ bo wɔ ɛvoya 16 ne anu mɔɔ ɔlumuale ɔhilele Nyamenle duma ne abo wɔ Nrelenza nu wɔ nu, nee Spain aneɛ nu Baebolo, Reina-Valera mɔɔ bɛyɛle ye wɔ 1602 mɔɔ bɛhilele duma nwuanzanwuanza ne abo kɛ “Iehova” wɔ ɛleka biala mɔɔ ɔfinde la mukelɛ ko. Ninyɛne bieko mɔɔ bɛvale bɛzieziele ɛkɛ la a le Nrelenza Baebolo ne mɔɔ bɛfɛlɛ ye Great Bible (bɛpelentele ye 1549), Elias Hutter Baebolo ne mɔɔ bɛyɛle ye aneɛ 12 anu (1599 Ɛdeɛ ne mɔɔ eza bɛfɛlɛ ye Nuremberg Polyglot la), yɛɛ Geneva Baebolo ne (bɛpelentele ye 1603), duma nwuanzanwuanza ne wɔ ye kɔsɔɔti anu.

Adiema Sanderson vɛlɛle awie biala kɛ ɔranlea Baebolo ngakyile mɔɔ bɛva bɛziezie ɛkɛ la, na ɔhanle kɛ: “Nɔhalɛ, yɛ nzɛlɛlɛ a le kɛ . . . ɔbaboa ahonlekpalɛma kɔsɔɔti, ɔnva nwo bɛ ɛvolɛ nee nwoma mɔɔ bɛzukoa la, yeamaa bɛ nye alie ninyɛne nwiɔ ne mɔɔ yɛ muala yɛ nye die nwo la anwo​—Nyamenle Edwɛkɛ Baebolo ne mɔɔ ɔsonle bolɛ la, nee ye anyunlunyia duma Gyihova ne.”

Ɛvolɛ 2014 Edwɛkɛ Ne.

Mɔɔ Gerrit Lösch mɔɔ boka Neazo Eku ne anwo yɛle dapɛne ne anu Ɛzinzalɛ Arane ne sikalɛ wiele la, Adiema Pierce vale ɛvolɛ 2014 edwɛkɛ ne dole gua, “Wɔ belemgbunlililɛ ɛrɛla.” (Mateyu 6:​10) Gyihova Alasevolɛ ɛvolɛ edwɛkɛ kɔsɔɔti fɛta noko ɛvolɛ 2014 ɛdeɛ ne le titile ɔluakɛ bɛvale Belemgbunlililɛ ne bɛziele ɛkɛ la ye ɛvolɛ ɛya ko ɛne.

“Ahyɛlɛdeɛ Kɛnlɛma Mɔɔ Vi Gyihova.”

Akee, tievolɛma nleanle kɛzi bɛyɛle New World Translation ne, Baebolo mɔɔ Gyihova Alasevolɛ a yɛle na menli dɔɔnwo bu ye kɛ ɔboka Baebolo ngilebɛbo kpalɛ ne mɔ anwo la video. Mekɛ mɔɔ Nathan Knorr yele foa ne mɔɔ lumua la wɔ ɛvolɛ 1950, “Theocracy Increase International Assembly” ne abo la, ɔhanle edwɛkɛ ɛhye mɔɔ ɔwɔ kɛ yɛdayɛ noko yɛdi zo la ɔhilele tievolɛma ne: Bɛgenga. Bɛzukoa. Bɛboa awie mɔ bɛmaa bɛzukoa, ɔluakɛ ɔbaboa bɛ yeamaa bɛabɔ Gyihova duma ne.

“Ngakyelɛ Debie Mɔɔ Yɛ Anyelielɛ.”

Samuel Herd mɔɔ boka Neazo Eku ne anwo la a lile ɛdendɛlɛ ɛhye anwo gyima a. Bɛbizebizale U.S. Bɛtɛle abusua ne anu menli nna edwɛkɛ wɔ New World Translation ne mɔɔ bɛyele ye foa nsia ɔvi 1950 kɔdwu 1960 la anwo. Bɛlumuale bɛhyele edwɛkɛ ne.

Eunice Timm hanle kɛzi ɔvale New World Translation ne ɔlile gyima wɔ debiezukoalɛ bo la. Ɔ nye liele ninyɛne mɔɔ bɛfa bɛyɛ neɛnleanu mɔɔ wɔ nu la anwo. Ɔhanle kɛ kɛmɔ ɔnrɛhola ɔnrɛva ɔ muala ɔnrɛhɔ debiezukoalɛ la ati, ɛnee ɔfa foa ne mɔ mɔɔ ɔbahyia nwo la nee King James Baebolo ekyi ne amaa saa bɛkenga ngɛlɛlera mɔɔ ɔ nye ɛnla la a, yeanlea ye wɔ nu.

Ngilebɛbo fofolɛ ne manle yɛyɛle nzenzaleɛ wɔ yɛ ɛzonlenlɛ ne afoa mɔɔ ɛha la noko anu. Kɛ neazo la, Fred Rusk hanle kɛ kolaa na 1950 adwu la, ɛnee mediema mɔɔ gyinla Bɛtɛle abusua ne agyakɛ anu yɛ nzɛlɛlɛ la fa edwɛkɛkpɔkɛ “bɛ belemgbunlililɛ ɛrɛla” mɔɔ wɔ King James Version ne anu la di gyima. Noko mɔɔ bɛyele New World Translation ne la, yeangyɛ, bɛanva zɔhane ɛdendɛlɛ ne mɔɔ ɛnee ɛkpa nwo la bɛanli gyima wɔ asɔneyɛlɛ nu bieko.

John Wischuk anye liele Baebolo zɔhane nee mɛlɛbɛnwoaze mɔɔ New World Bible Translation Kɔmatii ne lale ye ali la anwo kpalɛ. Ɔhanle kɛ: “Bɛngulo kɛ saa bɛde aze o anzɛɛ bɛwu o, menli kɛnwu bɛ ɔluakɛ bɛkpondɛ kɛ anyunlunyia ne kɔsɔɔti kɔ Gyihova Nyamenle ɛkɛ.” Charles Molohan edwɛkɛ ɛhye maa yɛnwu nganeɛ mɔɔ ɛnee menli ne kɔsɔɔti te la, ɔhanle kɛ: “New World Translation ne ɛmaa yɛlie nɔhalɛ ne yɛli wɔ yɛ ahonle nu yɛɛ yemaa yɛ diedi ɛyɛ kpole, amaa yɛahola yɛaboa awie mɔ yɛamaa bɛanyia diedi.”

“Yɛte kɛ bɛlɛfa yɛ maanle nu aneɛ bɛaha ninyɛne mgbole mɔɔ Nyamenle ɛyɛ la.”

(Gyima ne 2:11) Geoffrey Jackson mɔɔ boka Neazo Eku ne anwo la a manle ɛdendɛlɛ ne mɔɔ bɛvale bɛyele 2013 New World Translation ne la a. Mɔɔ ye ɛdendɛlɛ ne rale awieleɛ la, asɛɛ menli mɔɔ rale gyimalilɛ ne nee bɛdabɛ mɔɔ bɛdiele ye wɔ Intanɛte zo la kɔsɔɔti nyianle Baebolo ne ko.

Adiema Jackson hanle kɛ ɔvi mekɛ mɔɔ bɛyele New World Translation ne mɔɔ lumua la, ɛvolɛ 60 ɛpɛ nu. Kɛkala Nrelenza aneɛ ne ɛhakyi, noko bodane mɔɔ yɛlɛ ye wɔ Baebolo bo ɛhilelɛ gyima ne anwo la ɛtɛkakyile. Yɛkpondɛ kɛ yɛkile Nyamenle Edwɛkɛ ne abo pɛpɛɛpɛ mɔɔ yɛngakyi ndelebɛbo ne a.

Wɔ 2005, Neazo Eku ne hwenle adwenle dɔɔnwo hɔle Baebolo ne mɔɔ bɛkile ɔ bo bɛahɔ aneɛ dɔɔnwo anu la azo. Ɔvi zɔhane mekɛ ne, bɛhile New World Translation ne abo bɛvi aneɛ 52 anu bɛhɔ 121 anu, na bɛlɛyɛ nwolɛ gyima wɔ aneɛ 45 noko anu. Mekɛ mɔɔ bɛlɛkile New World Translation ne abo bɛahɔ aneɛ ngakyile nu la, bɛbizale kɛ yɛhilehile edwɛkɛ agbɔkɛ nee edwɛkɛ bie mɔ anu kpalɛ yɛhile bɛ. Kɛkala, bɛbiza kpuyia zɛhae mɔ mɔɔ bo 52,000 la bɛmaa bɛye ɔ nloa na ɛhye manle yɛnwunle kɛ ɔwɔ kɛ yɛyɛ nzenzaleɛ wɔ Nrelenza ɛdeɛ ne anu.

Kɛ neazo la, Adiema Jackson hilehilele nuhua kɛ bɛhanle ye wɔ Nrelenza New World Translation ne mɔɔ lumua la anu wɔ 1 Samoɛle 14:11 kɛ Dwɔnatan nee ye sonvolɛ ne “yele bɛ nwo hilele Filisitiama sinzavolɛma ne.” Yemɔti, amaa awie annyia ndelebɛbo fofolɛ wɔ ye ɛgengalɛ nu la, bɛha ye wɔ fofolɛ ne anu kɛ “bɛmanle bɛnwunle kɛ bɛwɔ ɛkɛ.” Wɔ Maeka 2:6 noko bɛnleanle edwɛkɛ agbɔkɛ ne mɔ azo bɛhilele ɔ bo kɛ: “Bɛmmamaa edwɛkɛ tɔ aze. Bɛmaa edwɛkɛ tɔ aze.” Kɛkala, edwɛkɛ ɛhye kenga kɛ: “‘Bɛmmaka edwɛkɛ ne!’ bɛka edwɛkɛ ne.”

Wɔ ɛvolɛ nnu mɔɔ ɛze la, Neazo Eku ne kpale kɔmatii kɛ bɛnlea na bɛyɛ nzenzaleɛ bie mɔ wɔ New World Translation ne anu, na kɛkala bɛwie. Baebolo fofolɛ ne le kɛnlɛma, nuhua ɛnyɛ se, yɛɛ ɔbahyɛ. Adiema Jackson vale dole gua kɛ ɔnrɛhyɛ bɛbayɛ ye kpole yɛɛ ekyi wɔ Nrelenza nu.

‘Sɔ Nɔhalɛ Edwɛkɛ Ne Anu Kpalɛ.’

Stephen Lett mɔɔ boka Neazo Eku ne anwo la hilehilele mokanwo mɔɔ wɔ Baebolo fofolɛ ne anu la anu. Ɔvale ye edwɛkɛtile ne ɔvile 2 Temɔte 2:15. Edwɛkɛ ‘sɔ nu kpalɛ’ mɔɔ wɔ ngyɛnu ɛhye anu la abo kile kɛ “pɛ ye fɔɔnwo.” Yɛkpondɛ kɛ yɛfa ‘sunsum ne konle dadeɛ ne’ yɛdi gyima nɔhalɛ nu. (Ɛfɛsɛsema 6:17) Akee Adiema Lett hilele kɛzi yɛbava ninyɛne fofolɛ mɔɔ bɛva bɛboka Baebolo ne anwo yɛayɛ zɔ la.

1. Ɛbanwu edwɛkɛ “Sukoa Mɔɔ Wɔ Nyamenle Edwɛkɛ Ne Anu La” wɔ ɔ nyunlu ɛkɛ ne ala. Ngɛlɛlera mɔɔ bua Baebolo nu mɔlebɛbo ngilehilelɛ ne anwo kpuyia 20 la a wɔ ɛkɛ a.

2. Appendix A ne kilehile kɛzi bɛhɛlɛle Baebolo ne, nzenzaleɛ mɔɔ bɛyɛle ye wɔ edwɛkɛ agbɔkɛ ne bie mɔ anu nee kɛzi bɛhilele duma nwuanzanwuanza ne abo la anu.

3. Appendix B ne mɔɔ ɔwɔ nu 15 mɔɔ bɛyɛ ye kɔsɔɔti kɔla la, le azɛkɛlata nee nlɛka mɔɔ bɛbaboa yɛ wɔ bɛtianwo debiezukoalɛ nee ngilehilelɛ nu a.

4. “Nuninyɛne” mɔɔ ka edwɛkɛ mɔɔ wɔ Baebolo buluku ne mɔ anu sikalɛ na ɔboa kengavo ne ɔmaa ɔnwu edwɛkɛ mɔɔ ɔkpondɛ ndɛndɛ la, wɔ Baebolo buluku biala mɔlebɛbo. Ɛhye ati, edwɛkɛ biala ɛnle mukelɛ ne mɔ anwuma kɛmɔ ɛnee ɔde ye wɔ alumua ɛdeɛ ne anu la.

5. ““Baebolo Nu Edwɛkɛ Agbɔkɛ Mɔɔ Bɛhile Ɔ Bo” la kile edwɛkɛ agbɔkɛ bie mɔ abo sikalɛ.

6. Bɛde “Baebolo Nu Edwɛkɛ Mɔɔ Bɛhyehyɛ” la azo kpalɛ. Edwɛkɛ agbɔkɛ nee ngɛlɛlera mɔɔ yɛbahyia nwo wɔ edwɛkɛhanlɛ nee ngilehilelɛ nu la ala a wɔ ɛkɛ a.

7. Bɛde edwɛkɛ mɔɔ bɛhyehyɛ ye wɔ mukelɛ ne mɔ avinli la noko azo. Mɔɔ yɛbahyia nwo wɔ daselɛlilɛ nu la ala a wɔ ɛkɛ a.

8. Kɛzi bɛkile edwɛkɛ bie mɔ abo wɔ adenle fofolɛ zo nee ɛleka mɔɔ edwɛkɛ ne vi la wɔ ɔ bo ɛkɛ edwɛkɛ ne mɔ anu.

JW Library.

John Ekrann mɔɔ boka United States Ɔfese Kɔmatii ne anwo la hilehilele kɛzi bɛfa JW Library ne bɛdi gyima wɔ fonu mgbole nee kɔmputa ngyikyikyi zo la anu. New World Translation fofolɛ ne nee Baebolo gyɛne nnu wɔ zo. Bɛyɛle ye October 7, 2013, na awie biala bahola ahwe bie mɔɔ ɔndua ezukoa biala.

“Nyamenle Edwɛkɛ Ne Mɔɔ Bɛhile Ɔ Bo Kpalɛ.”

Anthony Morris mɔɔ boka Neazo Eku ne anwo la hanle ngyinlazo mɔɔ New World Bible Translation Kɔmatii ne gyinlanle zo yɛle Baebolo fofolɛ ne la anwo edwɛkɛ dɔɔnwo. Kɛmɔ 1 Kɔlentema 14:8, 9 kile la, ɛnee kɔmatii ne kpondɛ kɛ awie biala kenga Baebolo ne te ɔ bo. Saa bɛgyinla edwɛkɛ agbɔkɛ ne mɔ azo bɛkile ɔ bo na ɔkakyi Baebolo ne anu ndelebɛbo ne a bɛkoati kɛ bɛbayɛ ye zɔ.

Kɛ neazo la, saa bɛgyinla edwɛkɛ agbɔkɛ mɔɔ wɔ Mɔlebɛbo 31:20 ne azo bɛkile edwɛkɛ ne abo a, ɔbagenga kɛ: “Gyekɔbo wuale Leeban ahonle.” Noko akee, asolo mɔɔ Hibulu ɛdendɛdenle ɛhye kile nee mɔɔ Nrelenza ɛdendɛdenle ne noko kile la. Yemɔti, kɛkala bɛhile ɔ bo wɔ New World Translation fofolɛ ne anu kɛ: “Gyekɔbo veale Leeban hɔle.” Saa bɛgyinla edwɛkɛ agbɔkɛ mɔɔ wɔ 1 Kɔlentema 7:39 la noko azo bɛkile ɔ bo a, ɔbahile kɛ saa raalɛ ɔ hu “dafe” a, ɔbahola yeagya nrenya fofolɛ. Noko kɛmɔ ɔdwu mekɛ ne bie a, Baebolo ne fa ewule to “nlafelɛ” nwo la ati, amaa awie adwenle nu anyɛ ye kesee la, New World Translation ne kenga kɛ “saa ɔda wɔ ewule nu a.”

Adiema Morris hanle kɛ, “Bɛhɛlɛle Baebolo ne wɔ adenle mɔɔ saa awie biala​—ɛyazonlɛma, mboaneneavolɛma, nee fɛlɛkyevoma kenga a, bɛbade ɔ bo la azo. Baebolo mɔɔ bɛhile ɔ bo kpalɛ la a le Baebolo mɔɔ saa ahonlekpalɛma kenga a bɛte ɔ bo ɔnva nwo sukulu mɔɔ bɛhɔle la.”

‘Edwɛkɛ Agbɔkɛ Mɔɔ Yɛ Fɛ Nee Edwɛkɛ Mɔɔ Le Nɔhalɛ.’

David Splane mɔɔ boka Neazo Eku ne anwo la vale ye edwɛkɛtile ne vile Nolobɔvo ne 12:10. Menli mɔɔ hɛlɛle Baebolo ne la kpale edwɛkɛ mɔɔ fɛta la vale lale Nyamenle adwenle ali, na zɔhane ala a New World Bible Translation Kɔmatii ne mɔɔ lumua la noko yɛle a. Kenlensa ye New World Translation kɔmatii ne ɛli ngyinlazo ko ne ala azo: “Edwɛkɛ ne mɔɔ [bɛhɛlɛle] la le nɔhalɛ,” bɛmaa Nyamenle edwɛkɛ ne anu ɛla ɛkɛ kpalɛ.

Adiema Splane hanle kɛ: “Nrelenza edwɛkɛ agbɔkɛ dɔɔnwo lɛ ndelebɛbo mɔɔ bo ko.” Kɛ neazo la, ɛbanwu “edwɛkɛ kpalɛ nwo neazo” wɔ alumua New World Translation ne anu wɔ 2 Temɔte 1:13. Nrelenza edwɛkɛkpɔkɛ ne mɔɔ bɛhilele ɔ bo “neazo” la eza kile “debie mɔɔ dwinvolɛ ɛyɛ la.” Ndelebɛbo ɛhye ati, bie mɔ ka kɛ edwɛkɛ ne kile adwinli, anzɛɛ kilemunli kɛnlɛma, mɔɔ wɔ Baebolo ne anu la. Noko, ngilenu mɔɔ fɛta la a le “ndonwo mɔɔ bɛyɛ kɛ bɛli zo la.” Yemɔti, bɛhile ɔ bo wɔ Baebolo fofolɛ ne anu kɛ “edwɛkɛ kpalɛ nwo ngyinlazo.”

Adiema Splane eza hanle Nrelenza edwɛkɛ agbɔkɛ ne mɔ anu nzenzaleɛ ne noko anwo edwɛkɛ. Kɛ neazo la, edwɛkɛ kpɔkɛ mɔɔ bɛvale bɛhilele kɛzi bɛhunle Gyisɛse wɔ alumua New World Translation ne anu la kile “baka” mɔɔ bɛzinzi ɔ ti mɔɔ bɛva bɛwɔ awie bɛmaa yevinde ɔ nzi na akee bɛbɔ ye wɔ zo la. Kɛmɔ bɛanva amaneɛnwunlɛ baka ne bɛanwɔ Gyisɛse akunlu na nzinlii bɛahu ye wɔ zo la ati, bɛhile ɔ bo wɔ Baebolo fofolɛ ne anu kɛ “bɛbɔle ye pɛlɛko nu wɔ baka zo,” bɛva bɛhile kɛzi bɛhunle Gyisɛse la anu.​—Mateyu 27:22, 23, 31.

Adiema Splane dwulale ye edwɛkɛ ne kɛ: “Yɛ nzɛlɛlɛ a le kɛ New World Translation fofolɛ ne mɔɔ ɛbagenga na wɔazukoa la bahwe wɔ abikye Gyihova dahuu. Ɔrɛla ye kɛ ɔbahɔ zo yeayɛ ɛ Ze, wɔ Nyamenle, nee ɛ Gɔnwo.”

Adwulaleɛ.

Adiema Pierce vale Baebolo fofolɛ ne dole aleɛ “kpalɛ” mɔɔ Gyihova ɛva ɛdo yɛ ɛkponle la anwo. (Ayezaya 25:6) Akee ɔmanle tievolɛma dole edwɛne 114 wɔ To Edwɛne Maa Gyihova buluku ne anu, ɔ ti se “God’s Own Book​—A Treasure” (“Nyamenle Buluku Ne Le Agyadeɛ”) ɔvale ɔdwulale gyimalilɛ ne kɛnlɛma.