Eego, Omuregi n’owaabuzima. Niwe “omutegyeki w’ensi egi,” ekyahangirwe ky’omwoyo ekyahindukire kibi kikagomera Ruhanga. (Yohaana 14:30; Abaefeso 6:11, 12) Baibuli neeshoboorora gye ebirikukwata aha Omuregi erikukoresa amaziina aga:

•   Sitaane, ekirikumanyisa “Omuhakanisa.”—Yobu 1:6.

•   Omuregi, ekirikumanyisa “Orikubeiherera abandi.”—Okushuuruurwa 12:9.

•   Ekijoka, ekirikumanyisa “Omunyabishuba” omu Baibuli.—2 Abakorinso 11:3.

•   Omwohi.—Matayo 4:3.

•   Omubeihi.—Yohaana 8:44.

Ti musingye nari omutwarize gw’ekibi

 Abamwe nibagira ngu Sitaane n’omusingye nari omutwarize gw’ekibi ekiri omu bantu. Kwonka, Baibuli neeyoreka ngu Ruhanga na Sitaane bakagaaniira kumwe. Ruhanga n’ohikiriire, ekirikumanyisa ngu akaba atarikugaaniira n’ekibi ekiri ekimurimu. (Eky’Ebiragiro 32:4; Yobu 2:1-6) Kandi Sitaane akagyeza Yesu, owaabaire ataine kibi kyona. (Matayo 4:8-10; 1 Yohaana 3:5) N’ahabw’ekyo, Baibuli neeyoreka ngu Omuregi n’owaabuzima beitu ti kibi ekiri omu bantu.

 Mbwenu shi twine kutangaara ahabw’okugira ngu baingi tibarikwikiriza ngu Omuregi n’owaabuzima? Ngaaha, Baibuli neeyoreka ngu Sitaane naakoresa ebishuba kuhikiiriza ebigyendererwa bye. (2 Abatesalonika 2:9, 10) Akakoryo kamwe aku arikukira kukoresa n’okuhumya abantu amaisho kutareeba ngu n’owaabuzima.—2 Abakorinso 4:4.

 Amazima: Ekigambo ky’Oruheburaayo ekirikuvunuurwa nka Lusifa nikimanyisa ‘enyonyoozi y’obuturuturu’ nari orikwaka. (Isaaya 14:12) Ebyetooroire omushororongo ogwo nibigamba aha butegyeki nari orunyiriri rw’abagabe ba Babulooni, abu Ruhanga yaabaire naija kuhemura ahabw’obutigi bwabo. (Isaaya 14:4, 13-20) Ebigambo ‘nk’enyonyoozi y’obuturuturu’ nari orikwaka, bikaba nibikoresibwa kukiniika obugabe bwa Babulooni bwanyima y’okugwa.

 Amazima: Omuregi n’omuzigu wa Ruhanga, tari muheereza we. Sitaane naahakanisa kandi naarega abarikuheereza Ruhanga.—1 Petero 5:8; Okushuuruurwa 12:10.