1, 2. Niki ekyahwereire Abajurizi ba Yehova 230 kuhonokaho omu rugyendo rw’okufa aha muheru gw’Orutaro rw’Ensi Yoona orwa kabiri?

 ORUTARO rw’Ensi Yoona orwa kabiri ku rwabaire ruri haihi kuhendera n’obutegyeki bwa Nazi butandikire kuhwa amaani, abanazi bakataho ekiragiro ky’okwita abantu baingi abaabaire bari omu bihome. Abantu boona abaabaire bari omu kihome kya Sachsenhausen bakaba nibaza kutwarwa aha nyanja barikwenda ngu babapakire aha meeri babanagye omu nyanja bafe. Ogu ni gumwe aha miringo ei baakoreise ei baizire kweta engyendo z’okufa.

² Abantu 33,000 abaabaire bari omu kihome kya Sachsenhausen bakaba nibaza kugyenda mailo 155 kuhika omuri Lübeck, etauni y’omuri Germany. Omuri abo hakaba harimu Abajurizi ba Yehova 230 kuruga omu mahanga mukaaga abaaragiirwe kugyendera hamwe. Boona bakaba bahweire amaani ahabw’enjara n’endwara. Ab’eishe-emwe abo bakahonokaho bata omu rugyendo orwo? Omwe aharibo akagira ngu ekyabahwereire, n’okuguma nibagumyana. Amaani ga Ruhanga “agarikukirira kimwe,” n’okukundana kwabo bikabahwera kuhonokaho omu rugyendo orwo orwabaire rugumire.​—2 Kor. 4:7.

3. Ahabw’enki twine kugumyana?

³ Obunaku obu tituri mu rugyendo nk’orwo, kwonka nituhikwaho oburemeezi bwingi. Bwanyima y’Obukama bwa Ruhanga kuteebwaho omuri 1914, Sitaane akabingwa omu iguru yaanagwa omu nsi kandi aine ‘ekiniga kingi, ahakuba naamanya ku aine omwanya mukye.’ (Kush. 12:7-9, 12) Obu Haramagedoni eri haihi kuhika, Sitaane naatugyeza kubaasa kushiisha omukago gwaitu na Yehova. Kandi nitubonabona ahabw’oburemeezi obu turikutunga obunaku obu.  (Yob. 14:1; Mub. 2:23) Obumwe oburemeezi nibubaasa kutumaramu amaani, n’obu twakuba tutwire nituheereza Yehova. Nk’eky’okureeberaho, ow’eishe-emwe omwe kumara emyaka mingi akaba ahwera abandi kuguma bari abeesigwa ahari Yehova. Kwonka omu myaka ye ya bukuru, we n’omukazi we ku baatandikire kurwararwara, yaatandika kugira amaganya. Nk’ow’eishe-emwe ogwo, twena twine kugumyana kandi tukashaba Yehova kutuha “amaani agarikukirira kimwe.”

4. Kubaasa kugumya abandi, twine kuguma nitwijuka buhabuzi ki obw’entumwa Paulo?

⁴ Kubaasa kugumya abandi, twine kuguma nitwijuka obuhabuzi obu entumwa Paulo yaahaire Abakristaayo Abaheburaayo. Akagira ati: “Ka tuteekateekye oku twakwezirikisana kukundana n’okukora ebirungi, tutarikureka kuteeranira hamwe, nk’oku abamwe bagira, kureka tugumyane, kandi nk’oku murikureeba ngu ekiro ekyo kiri haihi n’okuhika, mweyongyere kutwaza mutyo.” (Heb. 10:24, 25) Nitubaasa kugyendera tuta aha buhabuzi obwo?

5. ‘Okuteekateeka oku twakwezirikisana’ nikimanyisa ki, kandi eki nitubaasa kukikora tuta?

⁵ ‘Okuteekateeka oku twakwezirikisana’ nikimanyisa okuteekateeka aha byetengo by’abandi. Titurikubaasa kumanya ebyetengo by’abandi, twaba nitugarukira aha kubaramutsya kwonka aha Kyombeko ky’Obukama nari turikugamba nabo aha bintu ebitari bikuru. Kwonka titurikwenda kubuuza ebitatukwaitseho nari ‘kwetaasya omu bitari byaitu.’ (1 Tes. 4:11; 1 Tim. 5:13) Twaba nitwenda kugumya ab’eishe-emwe, twine kuteeraho kubamanya, tukamanya embeera zaabo, emitwarize yaabo, oku barikutwara amazima, ebi barikubaasa kukora n’ebi batarikubaasa kukora. Baine kukireeba ngu turi banywani baabo kandi bakahamya ngu nitubakunda. Eki nikyetengyesa okumara obwire nabo, t’obwo bwonka obu barikuba baine oburemeezi kandi bahweiremu amaani, beitu n’omu bwire obundi.​—Rom. 12:13.

6. Niki ekirikubaasa kuhwera omureeberezi kugumya abari omu kibiina?

⁶ Abareeberezi omu kibiina nibahigwa kureeberera gye obusyo bwa Ruhanga obu baakwatsiibwe, bakikore beekundiire kandi bashemereirwe. (1 Pet. 5:1-3) Kubaasa kukora gye omurimo ogu, baine kuba nibamanya gye ab’eishe-emwe. (Shoma Enfumu 27:23.) Abareeberezi baahwera ab’eishe-emwe beekundiire, abari omu kibiina nikiija kuboorobera kushaba obuhwezi baaba nibabwetenga. Nikiboorobera kugambira abareeberezi oku barikwehurira n’ebirikubeerarikiriza. Ekiraarugyemu, abareeberezi nibaija kuha obuhwezi buri omwe orikubwetenga.

7. Tushemereire kutwara tuta ‘okurahuka kugamba’ kw’abo abahweiremu amaani?

⁷ Paulo arikugambira ab’omu kibiina kya Tesalonika akagira ati: “Muramire abataine maani.” (Shoma 1 Abatesalonika 5:14.) “Abataine maani” nibatwariramu abo abarikuganya n’abaine obusaasi. Enfumu 24:10 nihagira hati: “Ku orikugwa enshazi aha izooba ry’okuhikiirirwa, biri amaani gaawe ni makye.” Omuntu orikuba ahweiremu amaani naabaasa “kurahuka kugamba.” (Yob. 6:2, 3) Naabaasa kugamba ebigambo ebi atarikumanyisa. Rachelle owaabaire aine nyina ohweiremu amaani, eki ekakyereebera ku kyamuhikireho. Rachelle naagira ati: “Emirundi mingi maawe akaba agamba ebirikwitsa ekiniga. Obwire obwingi, nkaba nteeraho kwijuka emitwarize mirungi ya maawe, nka rukundo, embabazi n’obufura. Nkeega ngu abantu abahweiremu amaani nibagamba ebigambo bingi kwonka ebi batarikumanyisa.  Embeera neeyongyera kuba mbi omuntu nawe yaamutwariza omu muringo mubi nari akamugambira kubi.” Enfumu 19:11 neegira eti: “Okwerinda kw’omuntu kumuzibira kurahuka kugira ekiniga, kandi okwehuzya eki bamushobeize kimuhaisa ekitiinisa.”

8. Okukira munonga ni baahi abu twine kuhamiza ngu nitukunda, kandi n’ahabw’enki?

⁸ Nitubaasa kugumya tuta omuntu ohweiremu amaani ahabw’ekibi eki yaakozire ira? N’obu yaakuba yaateireho kushoboorora enshobe ye, naabaasa kuba akiine enshoni ahabw’eki yaakozire. Aha bikwatiraine n’omusiisi owaayeteisize omuri Korinso, Paulo akahandiika ati: “Kibashemerereire kumusaasira n’okumuhuumuza, ngu shana atakaarengwa obusaasi. N’ahabw’ekyo nimbeeshengyereza ngu mugarukye muhamye ku murikumukunda.” (2 Kor. 2:7, 8) Ekigambo “muhamye” nikimanyisa “okworeka” nari “okuhamiza.” Ow’eishe-emwe tarikubaasa kumanya ngu nitumukunda kureka twakyoreka omu bigambo n’omu bikworwa.

9. Nikimanyisa ki ‘okukundana n’okukora ebirungi’?

⁹ Paulo akahandiika ati: “Ka tuteekateekye oku twakwezirikisana kukundana n’okukora ebirungi.” Nitwenda kuhiga ab’eishe-emwe bagyenzi baitu kworeka rukundo kandi bakeejumba n’omu kukora ebirungi. Omuriro gwaba guri haihi kuraara, nituba twine kugwenegyeza kubaasa kuguma nigwaka. (2 Tim. 1:6) Omu muringo nigwo gumwe, nitubaasa kuhiga ab’eishe-emwe kworeka ngu nibakunda Ruhanga n’abataahi. Omuringo murungi gw’okukora eki, n’okusiima ab’eishe-emwe ahabw’ebirungi ebi barikukora.

10, 11. (a) Ni baahi abaine kusiimwa? (b) Ha eky’okureeberaho ekirikworeka ngu waasiima omuntu naagarukamu amaani.

¹⁰ Twena nitushemererwa baatusiima yaaba twine oburemeezi nari tutabwine. Omureeberezi omwe akahandiika ati: “Tata akaba atakaansiimaga ngu naakora gye ekintu.” N’ahabw’ekyo ow’eishe-emwe ogu akakura arikumanya ngu tarikubaasa kukora  ekihikire. N’obu araabe aine emyaka 50 hati, naashemererwa abandi ku barikumusiima ahabw’okuheereza gye nk’omureeberezi omu kibiina. Ekyo kimuhwereire kumanya ngu ni kikuru kusiima abandi kandi naateeraho kubasiima. Nikitugaruramu amaani omuntu yaatusiima. Eki nikitwariramu baapayoniya, abakaikwire n’abo abarikuba bahweiremu amaani.​—Rom. 12:10.

¹¹ Abareeberezi baaba nibahwera omuntu okozire ekibi, baamusiima ahabw’ebirungi ebi yaakozire enyima, nikibaasa kumuhwera kuhindura aha miteekateekyere ye akore ekihikire. (Gal. 6:1) Eki nikyo kyahwereire munyaanyazi-itwe orikwetwa Miriam. Akahandiika ati: “Nkagira obusaasi bwingi obu banywani bangye baaruga omu mazima kandi omu bwire obwo na tata akaba aine endwara y’obwongo. Nkagira enaku nyingi. Omu kuteeraho kusingura enaku yangye, nkatandika kurigira omwojo w’ensi.” Eki kikareetera Miriam kuteekateeka ngu Yehova takimukunda, kandi akateeraho n’okuruga omu mazima. Kwonka omureeberezi ku yaamwijukize oku yaabaire naaheereza n’obwesigwa omu kubanza, kikamuhamiza ngu Yehova naakimukunda. Ekyo kikamuhwera kugaruka kukunda Yehova. Akarekyera aho kukoragana n’omwojo w’ensi ogwo kandi yaagarukamu kuheereza Yehova.

12. Niki ekirikubaasa kubaho twagyeragyeranisa ab’eishe-emwe, tukabacwera orubanja, nari tukabareetera kweshinja?

¹² Okuhemura omuntu orikumugyeragyeranisa n’abandi, okumucwera orubanja ahabw’emitindo ei oyetereireho, nari kumureetera kweshinja ahabw’okutakora bingi omu buheereza, nikibaasa kumuhwera kugira omujinya kumara akiire kakye. Kwonka waasiima omuntu kandi okamuhwera kumanya ngu aine kuheereza Ruhanga ahabw’okumukunda, nikibaasa kurugamu ebirungi eby’obutwire.​—Shoma Abafilipi 2:1-4.

13. Okugumya abandi nikitwariramu ki? (Reeba ekishushani aha kubanza.)

¹³ Twine kugumyana, ahabw’okugira ngu ekiro ekyo kiri haihi kuhika. Okugumya abandi nikitwariramu okubahiga kugumizamu nibaheereza Ruhanga. Okugumya abandi nitubaasa kukugyeragyeranisa n’okwongyera enku omu muriro kugira ngu gugume nigwaka nari ngu gwake gye. Okugumya abandi nikimanyisa okubagaruramu amaani n’okubahuumuriza ngu bagumizemu nibaheereza Ruhanga. Twaba nituhuumuriza abahweiremu amaani twine kukikora omu muringo gwa rukundo kandi ogw’embabazi. (Enf. 12:18) Kandi, twine kuteeraho ‘kurahuka kuhurira’ kandi tuketantara ‘kurahukiiriza kugamba.’ (Yak. 1:19) Twahurikiza gye ow’eishe-emwe, kandi tukateeraho kwetegyereza oku arikwehurira, nitubaasa kumanya ahabw’enki ahweiremu amaani kitubaasise kugamba ebiraamuhwere.

14. Omureeberezi akahwera ata ow’eishe-emwe owaabaire atakibuurira?

¹⁴ Yetegyereze oku omureeberezi omwe  yaahweraire ow’eishe-emwe owaabaire amazire obwire buraingwa atakibuurira. Omureeberezi ku yaahurikiize gye ow’eishe-emwe ogwo, akeetegyereza ngu akaba naakikunda Yehova. Ow’eishe-emwe ogwo akashoma buri Watchtower kandi yaateeraho kuguma naaza omu nteerane butoosha. Kwonka, ebikorwa by’abandi omu kibiina nibyo byabaire bimureeteire kuhwamu amaani. Omureeberezi akamuhurikiza gye atarikumucwera rubanja kandi yaamuhamiza ngu naamukunda hamwe n’ab’omu ka ye. Mporampora, ow’eishe-emwe akeetegyereza ngu ebyabaireho enyima nibyo byabaire nibimuremesa kuheereza Ruhanga ou arikukunda. Omureeberezi akeeta ow’eishe-emwe ogwo kubuurira nawe. Ahabw’obuhwezi obu omureeberezi yaamuhaire, akagarukamu kubuurira kandi yaija yaagarukamu kuheereza nk’omureeberezi.

15. Nitubaasa kutooreza tuta Yehova omu kugumya abahweiremu amaani?

¹⁵ Omuntu ohweiremu amaani, omu kubanza naabaasa kutaikiriza obuhwezi. Nikibaasa kwetengyesa ngu tugume nitumuhwera. Paulo akagira ati: “Muramire abataine maani, mugumisiririze boona.” (1 Tes. 5:14) Omu mwanya gw’okurekyera aho kuhwera abahweiremu amaani, twine ‘kubaramira’ obwo turikugumizamu kubahwera. Ira, Yehova akaba agumisiririza abaheereza be obumwe ku baabaire bahwamu amaani. Nk’eky’okureeberaho, Yehova akagumisiririza Eliya yaafayo n’aha nyehurira ye. Yehova akaha nabi Eliya ebi yaabaire naayetenga kubaasa kugumizamu naaheereza. (1 Bag. 19:1-18) Ahabw’okugira ngu Daudi akeeteisa, Yehova akamusaasira. (Zab. 51:7, 17) Kandi Ruhanga akahwera omuhandiiki wa Zaaburi 73, owaabaire ari haihi kurekyera aho kumuheereza. (Zab. 73:13, 16, 17) Yehova naatutwariza n’embabazi twaba tuhweiremu amaani. (Kur. 34:6) Embabazi ze “buri kasheeshe ziba nsya,” kandi “tizihwaho.” (Tonz. 3:22, 23) Yehova naayenda ngu tukuratire eky’okureeberaho kye tutwarize abahweiremu amaani n’embabazi.

16, 17. Obu emperu y’ensi egi eri haihi kuhika, tushemereire kumariirira kukora ki, kandi n’ahabw’enki?

¹⁶ Aha bantu 33,000 abaabaire bari omu kihome kya Sachsenhausen, baingi aharibo bakafa. Kwonka Abajurizi ba Yehova 230 boona bakahonokaho. Okugumyana, n’okuhwerahwerana kukababaasisa kuhonokaho.

¹⁷ Obunaku obu, turi omu ‘irembo eririkutaasya omu magara.’ (Mat. 7:14) Abaheereza ba Yehova boona bari haihi kutaaha omu nsi ensya ey’okuhikiirira. (2 Pet. 3:13) Ka tumariirire kugumizamu nituhwerahwerana kubaasa kuguma omu muhanda ogurikuhitsya omu magara.