1, 2. Tushemereire kuba bantu ba muringo ki, kubaasa kusiimwa Ruhanga?

 ABANTU baingi nibafayo munonga aha ki abandi barikubateekateekaho. Kwonka nk’Abakristaayo eki tushemereire kutwara nka kikuru n’oku Yehova arikutureeba. Yehova niwe arikukirayo omu nsi n’omu iguru, kandi niwe “enshuro y’amagara.”​—Zab. 36:9.

² Entumwa Petero akagira ngu kubaasa kushemeza Yehova tushemereire ‘kuba abarikwera kandi abarikutiina Ruhanga omu mitwarize yaitu.’ (Shoma 2 Petero 3:11.) Emitwarize yaitu neija kuba eshemeire twaba nitworobera Ruhanga omu mbeera zoona. Kandi tushemereire kuba “abarikutiina Ruhanga” ahabw’okugira ngu nitumukunda kandi nitwenda kumuha ekitiinisa. Emitwarize yaitu tiyo yonka eri mikuru ahari Ruhanga baitu n’enyehurira zaitu. Obu Yehova niwe ogwo “ocaaka emitima,” naamanya yaaba nitutwaza gye kandi twaba niwe turikuheereza wenka.​—1 Bus. 29:17.

3. Aha bikwatiraine n’omukago gwaitu na Ruhanga, ni bibuuzo ki ebi tushemereire kwebuza?

³ Sitaane Omuregi, tarikwenda ngu tukore ebirikutureetera kusiimwa Ruhanga. Kandi naakora kyona eki arikubaasa kushiisha omukago gwaitu na Yehova. Sitaane naakoresa ebishuba kutuhabisa n’okutwiha ahari Ruhanga ou turikuramya. (Yoh. 8:44; 2 Kor. 11:13-15) N’ahabw’ekyo, ni kirungi kwebuuza tuti: ‘Sitaane naabeiha ata abantu? Nimbaasa kukora ki kurinda omukago gwangye na Yehova?’

4. Kubaasa kushiisha omukago gwaitu na Ruhanga, Sitaane naateeraho kukora ki, kandi ahabw’enki?

⁴ Omwegi wa Yesu orikwetwa Yakobo akahandiika ati: “Omuntu weena ayohibwa yaabeihwabeihwa  okwetenga kwe, kwamwosyosya. Bwanyima okwetenga okwo ku kuheza kutwara enda, kuzaara ekibi; n’ekibi ku kikura, kizaara okufa.” (Yak. 1:14, 15) Sitaane kubaasa kushiisha omukago gwaitu na Ruhanga, naateeraho kuhabisa omutima gwaitu.

5, 6. (a) Sitaane naateeraho ata kuhabisa omutima gwaitu? (b) Sitaane naakoresa mitego ki kushiisha ebyetengo by’emitima yaitu kandi abaasize kubikoresa ata?

⁵ Sitaane naateeraho ata kuhabisa omutima gwaitu? Baibuli neegira eti: ‘Ensi yoona eri omu butegyeki bw’Omubi ogwo.’ (1 Yoh. 5:19) Emitego ya Sitaane netwariramu ‘ebintu ebiri omu nsi.’ (Shoma 1 Yohaana 2:15, 16.) Omuregi atwire nataho emitego kubaasa kutubeihabeiha. Ahabw’okugira ngu nitutuura omu nsi egi, twine kwerinda emitego ya Sitaane.​—Yoh. 17:15.

⁶ Sitaane naakoresa emitego egyendereire kushiisha ebyetengo by’emitima yaitu. Entumwa Yohaana naayoreka emiringo eshatu ei Sitaane arikukoresa: (1) “Ebi omubiri gwetenga,” (2) ‘ebi amaisho geetenga,’ (3) “n’okwehimbisa ahabw’eby’amagara aga.” Sitaane akabikoresa kureetera Yesu kwohibwa omu ihamba. Ahabw’okugira ngu Sitaane atwire naakoresa emitego egi, naamanya ogu ashemereire kukoresa aha buri muntu. Tutakareebire oku turikubaasa kwerinda, ka tubanze tureebe oku Sitaane yaabaasize kubeiha Haawa kwonka atarabaasize kubeiha Omwana wa Ruhanga.

7. Sitaane akakoresa ata “ebi omubiri gwetenga” kubeihabeiha Haawa?

⁷ Abantu boona nibeetenga eby’okurya kuguma bahurire. Omuhangi akakora ensi erikubaasa kweza eby’okurya omu bwingi. Sitaane naabaasa kukoresa ekyetengo kyaitu eky’eby’okurya kuturemesa kuheereza Yehova. Yetegyereze oku yaakozire ekyo ahari Haawa. (Shoma Okutandika 3:1-6.) Sitaane akagambira Haawa ngu yaarya aha kijuma ‘ky’omuti ogw’okumanya oburungi n’obubi’ tarikwija kufa, kureka ngu eizooba eri ariguryaho aryaba nka Ruhanga. (Kut. 2:9) Omuregi akaba naamanyisa ngu Haawa tarikwetenga kworobera Ruhanga kubaasa kuguma ahuriire. Ekyo ka kyabaire kiri ekishuba kihango! Sitaane ku yaherize kushiisha emiteekateekyere ya Haawa, Haawa akaba aine kucwamu aha bintu bibiri: Akaba naabaasa kwanga ekiteekateeko ekyo, nari agume naakiteekateekaho ayeyongyere kukunda ekijuma. N’obu araabe yaabaire naabaasa kurya aha miti endiijo, akacwamu kuguma naateekateeka aha bi Sitaane yaagambire aha muti ogwabaire guri ahagati  y’ekibanja “yaacwa aha bijuma byagwo yaarya.” Sitaane akareetera Haawa kwetenga ekintu eki Omuhangi yaabaire amuzibiire.

8. Sitaane akakoresa ata “ebi omubiri gwetenga,” omu kuteeraho kureetera Yesu kwohibwa, kandi ahabw’enki Sitaane ataraasingwire?

⁸ Sitaane akakoresa omutego nigwo gumwe kureetera Yesu kwohibwa omu ihamba. Sitaane akateeraho kureetera Yesu kugira ekyetengo ky’eby’okurya bwanyima ya Yesu kumara ebiro 40 nyomushana na nyekiro atarikurya. Sitaane akagira ati: “Ku oraabe ori omwana wa Ruhanga, gambira eibaare eri rihindukye eby’okurya.” (Luk. 4:1-3) Yesu akaba aine eby’okucwamu bibiri: Akaba naabaasa kukoresa amaani ge ag’omutaano kwigutsya ekyetengo kye eky’eby’okurya nari ayangye. Yesu akaba nakimanya ngu tashemereire kukoresa amaani ge ahabw’okweyendeza. N’obu araabe yaabaire aine enjara, omukago gwe na Yehova nigwo gwabaire guri mukuru kukira eby’okurya. Yesu akagarukamu ati: “Kikahandiikwa ngu, Omuntu tatungwa by’okurya byonka, kureka n’ekigambo kyona ekiruga omu kanwa ka Ruhanga.”​—Mat. 4:4.

9. Ebigambo ‘ebi amaisho geetenga’ nibimanyisa ki, kandi Sitaane akakoresa ata omutego ogu kureetera Haawa kwohibwa?

⁹ Ekindi eki Sitaane arikukoresa kutureetera kwohibwa eki Yohaana yaagambireho, “n’ebi amaisho geetenga.” Eki nikimanyisa ngu omuntu naabaasa kutandika kwetenga ekintu yaakireeba. Sitaane akakoresa okwetenga oku arikugambira Haawa ati: “amaisho gaanyu garyaiguka.” Haawa ku yaagumire naareeba ekijuma kyayongyera kumushemeza. Akareeba omuti “guri murungi kurya, nigushemeza amaisho.”

10. Sitaane akakoresa ata “ebi amaisho geetenga” omu kuteeraho kureetera Yesu kwohibwa, kandi Yesu akamugarukamu ata?

¹⁰ Sitaane akakoresa ata ‘ebi amaisho geetenga’ kureetera Yesu kwohibwa? Sitaane ‘akamworeka obugabe bwona obw’omu nsi yoona omu mwanya mukye, yaamugira ati: Niinyija kukuha obushoboorozi obu bwona n’ekitiinisa kyabwo.’ (Luk. 4:5, 6) Yesu akaba atarikubaasa kureeba obugabe bwona obw’omu nsi omu mwanya mukye ogwo, kwonka Sitaane akaba naateekateeka ngu Yesu yaareeba ekitiinisa ky’obugabe obwo nikiija kumushemeza. Sitaane akagira ati: “Ku orainame wandamya, bwona nibuba obwawe.” (Luk. 4:7) Yesu akaba atarikubaasa kwikiriza ngu Sitaane amukorese eki arikwenda. Akamugarukamu ahonaaho ati: “Kikahandiikwa ngu, oramye Mukama Ruhanga waawe, obe niwe waaheereza wenka.”​—Luk. 4:8.

11. Sitaane akabeihabeiha ata Haawa?

¹¹ Yohaana akagamba n’aha ‘kwehimbisa ahabw’eby’amagara aga.’ Adamu na Haawa nibo bonka abaabaire bari omu nsi, bakaba bataine abu baabaire nibaza kwehimbisaho. Kwonka nabwo bakehimbisa. Sitaane akareetera Haawa kuteekateeka ngu haine eki Ruhanga amusherekire. Sitaane akamugira ngu yaarya aha ‘muti gw’okumanya oburungi n’obubi,’ naija ‘kuba nka Ruhanga, amanye oburungi n’obubi.’ (Kut. 2:17; 3:5) Sitaane akareetera Haawa kuteekateeka ngu naabaasa kwetegyeka. Okwehimbisa nikwo kwamureeteire kwikiriza ekishuba ekyo. Akarya aha kijuma ekyo arikuteekateeka ngu tarikwija kufa. Ekyo ka kyabaire kigweriire kimwe!

12. Ni muringo ki ogundi ogu Sitaane yaakoreise kuteeraho kureetera Yesu kwohibwa, kandi Yesu akagarukamu ata?

¹² Okutashushana na Haawa, Yesu ka yaatutereireho eky’okureeberaho kirungi eky’obucureezi! Sitaane akateeraho kureetera Yesu kwohibwa arikukoresa omutego ogundi, kwonka Yesu akanga kukora ekintu ekirikushemeza abandi kwonka kirikugyeza Ruhanga. Ekyo kikaabaire ekikorwa ky’okwehimbisa! Omu mwanya gw’ekyo, Yesu akagarukamu butunu ati: “Kikagambwa ngu, otaryosya Mukama Ruhanga waawe.”​—Shoma Luka 4:9-12.

13, 14. Shoboorora oku Sitaane arikukoresa emitego emwe obunaku obu.

¹³ Obunaku obu, Sitaane naakoresa emitego nk’ei yaakoreise ahari Haawa na Yesu. Sitaane naakoresa ensi ye kureetera abantu kukunda “ebi omubiri gwetenga” barikwejumba omu by’obushambani, okurya n’okunywa ekirengyesereize. Naakoresa “ebi amaisho geetenga” kureetera abantu kureeba ebirikwitsa enshoni, na munonga aha Intaneeti. Kandi naakoresa ‘okwehimbisa ahabw’eby’amagara aga’ arikureetera abantu kweyoreka ahabw’ebi baine nk’eby’obutungi, obushoboorozi, n’okurangaanwa.

¹⁴ Ebintu ebiri omu nsi nibibaasa kugyeragyeranisibwa n’ebi omujubi arikuta aha irobo kutega eby’enyanja. Nibiba nibireebeka gye, kwonka nibiba biri aha irobo. Sitaane naakoresa ebi abantu barikureeba  nk’ebya butoosha kubareetera kutoorobera ebiragiro bya Ruhanga. Ebintu nk’ebyo bitebeekanisiibwe kushiisha omutima n’ebyetengo byaitu. Nibibaasa kutureetera kuteekateeka ngu ebi turikwetenga ni bikuru okukira okukora ebi Ruhanga akunda. Noija kwikiriza emiteekateekyere egyo kukushiisha?

15. Nitubaasa kutooreza Yesu tuta omu kwangira okwohibwa?

¹⁵ N’obu Sitaane araabe yaabeihabeihire Haawa, Yesu we akasingura emitego ya Sitaane. Buri murundi ogu Sitaane yaabaire ateeraho kureetera Yesu kwohibwa, Yesu akaba agarukamu n’Ekyahandiikirwe arikugira ngu “Kikahandiikwa” nari ngu, “Kikagambwa.” Twaba nitweyegyesa Baibuli, nitwija kumanya gye ebyahandiikirwe kandi bibaase kutuhwera twayohibwa. (Zab. 1:1, 2) Okwijuka ebi abaheereza ba Ruhanga abeesigwa baakozire, nikiija kutuhwera kubatooreza. (Rom. 15:4) Okuha Yehova ekitiinisa, okukunda ebi arikukunda n’okwanga ebi arikwanga nikiija kuturinda.​—Zab. 97:10.

16, 17. Ebi turikuteekateekaho nibyoreka ngu turi bantu ba muringo ki?

¹⁶ Baibuli neetuhiga kuteeraho kugira emiteekateekyere nk’eya Ruhanga kwonka etari y’ensi. (Rom. 12:1, 2) Paulo naayoreka ngu twine kwerinda aha bikwatiraine n’ebi turikuteekateekaho arikugira ati: “Nitumaraho tutyo empaka n’ekintu kyona ekirikwetunguura kurwanisa okumanya Ruhanga, kandi nitugomoora ekiteekateeko kyona, ngu kyorobere Kristo.” (2 Kor. 10:5) Ebi turikuteekateeka nibyoreka eki turi, n’ahabw’ekyo tushemereire ‘kuteekateeka’ aha birikwombeka.​—Fil. 4:8.

¹⁷ Titurikubaasa kuguma turi abarikwera twaba nituteekateeka aha bintu ebibi. Twine kukunda Yehova kuruga aha “mutima ogushemeire.” (1 Tim. 1:5) ‘Ebintu ebiri omu nsi’ nibibaasa kutuhuzya ahabw’okuba omutima n’engobya. (Yer. 17:9) N’ahabw’ekyo, tushemereire kuguma ‘nitweshwijuma tukareeba ku turaabe turi omu kwikiriza; kandi tukegyeza twenka’ twaba nitushoma Baibuli.​—2 Kor. 13:5.

18, 19. Ahabw’enki twine kumariirira kuba abantu abu Yehova arikwenda ngu tube?

¹⁸ Ekindi ekiraatuhwere kwerinda ‘ebintu ebiri omu nsi’ n’okuguma nitwijuka ebigambo bya Yohaana ebi: “Ensi egi neehwaho n’okwetenga kwayo; kwonka okora ebi Ruhanga akunda, agumaho ebiro byona.” (1 Yoh. 2:17) Ensi ya Sitaane nereebeka nk’eraagumeho ebiro byona. Kwonka izooba rimwe neija kuhwaho. Okuguma nitwijuka ngu ensi egi teine eki erikubaasa kutuha eky’obutwire, nikiija kutuhwera kwerinda emitego ya Sitaane.

¹⁹ Entumwa Paulo naatuhiga kuba abantu abarikusiimwa Ruhanga ‘turikutegyereza ekiro kya Mukama, kandi nitukora eby’okukirahutsya; ahabw’ekyo kiro eiguru riryayokibwa rihweho, kandi eby’obuhangwa biryayagibwa omuriro mwingi!’ (2 Pet. 3:12) Ekiro ekyo kiri haihi kuhika, kandi Yehova naija kucwekyereza ensi ya Sitaane. Ekiro ekyo kitakahikire Sitaane naija kugumizamu naakoresa ‘ebintu ebiri omu nsi’ kutureetera kwohibwa nk’oku yaakozire ahari Haawa na Yesu. Titushemereire kuba nka Haawa turikuteeraho kwigutsya ebyetengo byaitu. Twakora tutyo nituba twaikiriza Sitaane kuba ruhanga waitu. Tushemereire kuba nka Yesu tukangira okwohibwa, n’obu Sitaane yaakureebekyesa ekintu nka kirungi. Twena ka tumariirire kuba abantu abu Yehova arikwenda ngu tube.