1. Ni mbeera ki ezi Nehemia yaashangireho obu yaagaruka omuri Yerusaalemu? (Reeba ekishushani aha kutandika.)

 ABANTU b’omuri Yerusaalemu bakaba bashobeirwe, ahakuba omunyamahanga enkozi y’ebibi akaba naatuura omuri kimwe aha bishengye by’omu hekalu. Abaleevi bakaba batsigireho omurimo gwabo. Abareeberezi bakaba nibakora eby’obushuubuzi aha sabato omu mwanya gw’okwebembera okuramya. Abaisraeli baingi bakaba nibashwera abatari Bayudaaya. Ebi ni bimwe aha byabaireho ebyateganiise Nehemia obu yaagaruka Yerusaalemu omu gwa 443.​—Neh. 13:6.

2. Israeli rikahinduka rita eihanga eryeziibwe?

² Israeli rikaba riri eihanga eryehaireyo ahari Ruhanga. Omu gwa 1513, Abaisraeli bakaba baine omujinya gw’okworobera ebiragiro bya Yehova. Bakagira bati: “Ebigambo byona ebi MUKAMA yaagamba, nitwija kubikora.” (Kur. 24:3) N’ahabw’ekyo Ruhanga akabeeza nari yaabatoorana nk’abantu be. Ogwo buzima gukaba guri omugisha! Bwanyima y’emyaka makumi ana, Musa akagaruka yaabaijutsya ati: “Ori eihanga eryereziibwe MUKAMA Ruhanga waawe; kandi MUKAMA Ruhanga waawe akakutoorana omu mahanga goona agari omu nsi, kuba eihanga eri yaayetooraniire.”​—Bir. 7:6.

3. Obu Nehemia yaahika omuri Yerusaalemu omurundi gwa kabiri Abayudaaya bakaba nibatwara bata okuramya okw’amazima?

³ Eky’obusaasi, omujinya ogu Abaisreali baabaire baine gukatuuba. N’obu omu Bayudaaya haraabe haabaire harimu abarikuheereza Ruhanga, abaingi bakaba batarikwenda kworobera Yehova kandi barikwetwara nk’abarikwera. Obu Nehemia yaahika omuri Yerusaalemu omurundi gwa kabiri, hakaba hahingwireho emyaka nka igana okwiha obu Abaisraeli abeesigwa baagaruka kuruga Babulooni kugaruraho okuramya okw’amazima. Omujinya gw’eihanga eryo ogw’okuramya okw’amazima gukagaruka gwatuuba.

4. Ni nshonga ki ezi turikuza kushwijuma eziraatuhwere kuguma turi abarikwera?

 ⁴ Nk’Abaisraeli, Abajurizi ba Yehova obunaku obu boona beeziibwe Ruhanga. Abashukirweho amajuta ‘n’ab’omutwe muhango’ boona n’abarikwera kandi batoorainwe ahabw’obuheereza oburikwera. (Kush. 7:9, 14, 15; 1 Kor. 6:11) Omuriitwe tihariho n’omwe owaakwenzire kufeerwa omukago gwe murungi na Ruhanga nk’oku Abaisreali baakozire. Niki ekirikubaasa kutuhwera kwetantara ekyo, kugira ngu tugume turi abarikwera kandi ab’omugasho omu kuheereza Yehova? Omu kicweka eki nituza kushwijuma enshonga ina ezirikugambwaho omu Nehemia eshuura 13: (1) Okwetantara emikago mibi; (2) okushagika entebeekanisa z’ekibiina kya Yehova; (3) okwebembeza okuheereza Yehova; (4) n’okurinda akamanyiso kaawe k’Ekikristaayo. Ka tushwijume buri emwe aha nshonga ezi.

5, 6. Eliashibu na Tobia bakaba bari baahi, kandi niki ekirikubaasa kuba kyareetaire Eliashibu kunywana Tobia?

⁵ Shoma Nehemia 13:4-9. Nitutuura n’abantu abaine emitwarize mibi obunaku obu, n’ahabw’ekyo tikyorobi kuguma turi abarikwera. Yetegyereze eky’okureeberaho kya Eliashibu na Tobia. Eliashibu akaba ari omunyamurwa omukuru, kandi Tobia akaba ari Omuamoni owaabaire ari omuhuuku omu butegyeki bw’Abaperesi obw’omuri Yuda. Tobia na banywani be bakaba baahakaniise Nehemia obu yaabaire naateeraho kwombeka orugo rwa Yerusaalemu. (Neh. 2:10) Abaamoni bakaba batarikwikirizibwa kuza omu mwanya gwa hekalu. (Bir. 23:3) N’ahabw’ekyo Eliashibu akaba atashemereire kureeta Tobia omuri kimwe aha bishengye bya hekalu.

⁶ Tobia akaba ahindukire munywani wa Eliashibu ow’aha mara. Tobia n’omutabani Yehohanani bakashwera abakazi b’Abayudaaya, kandi Abayudaaya baingi bakaba bamugambaho ebirungi. (Neh. 6:17-19) Omwe ahari baijukuru ba Eliashibu akaba ashweire muhara wa Sanibalati, ow’eishaza rya Samaria, owaabaire ari munywani wa Eliashibu ow’aha mara. (Neh. 13:28) Omukago ogu nigworeka enshonga ahabw’enki Omunyamurwa Omukuru Eliashibu yaikiriize otari Mwisraeli kandi omuhakanisa kumugambira eky’okukora. Kwonka Nehemia akooreka ngu n’omwesigwa ahari Yehova arikunaga aheeru ebintu bya Tobia.

7. Abaheereza ba Yehova otwariiremu n’abareeberezi nibahamya bata ngu baaguma bari abarikwera?

⁷ Nk’abantu abehaireyo ahari Yehova, tushemereire kuguma turi abeesigwa ahariwe. Twaba tutahamiire aha mitindo ye ehikiriire, titurikubaasa kuguma turi abarikwera omu maisho ge. Titushemereire kwehuzya emitindo ya Baibuli ahabw’okwenda kushemeza abanyabuzaare. Abareeberezi omu kibiina nibacwamu barikwihirira aha mitindo ya Yehova, beitu bitari biteekateeko byabo. (1 Tim. 5:21) Abareeberezi nibetantara kukora ekintu kyona ekirikubaasa kushiisha omukago gwabo na Ruhanga.​—1 Tim. 2:8.

8. Niki eki abaheereza ba Yehova boona bashemereire kwijuka aha bikwatiraine n’emikago?

⁸ Ni kirungi kuguma nitwijuka ngu “ekigombe kibi kishiisha emicwe mirungi.” (1 Kor. 15:33) N’omu banyabuzaare baitu nihabaasa kuba harimu abarikutureetera kukora ebibi. Eliashibu akataho eky’okureeberaho kirungi arikushagika Nehemia kugaruka kwombeka orugo rwa Yerusaalemu. (Neh. 3:1) Kwonka obwire ku bwahingwireho, Tobia n’abandi bakashiisha Eliashibu kyamureetera kukora ebibi omu maisho ga Yehova. Twine kunywana abantu abarikutuhiga kukora ebirungi nk’okushoma Baibuli, okwejumba omu nteerane, n’omu kubuurira. Okukira munonga nitusiima abanyabuzaare abarikutuhiga kukora ebirungi.

9. Ahabw’enki entebeekanisa za hekalu zaateganisiibwe kandi Nehemia akakwatsa baahi orubanja?

⁹ Shoma Nehemia 13:10-13. Nikireebeka obu Nehemia yagaruka Yerusaalemu abantu bakaba batakihayo omu hekalu. Ahabw’okutagira eby’okubareeberera ebirikumara, Abaleevi bakacwamu kutsigaho obuheereza bwabo baaza kuhinga emisiri yaabo. Nehemia akakwatsa orubanja abaabaire baine obujunaanizibwa bw’okurundaana kimwe kya ikumi. Buzima bakaba batarikukora omurimo gwabo. Nibabaasa kuba baabaire batarikushorooza kimwe kya ikumi omu bantu, nari batarikutwara kimwe kya ikumi ekyo omu hekalu nk’oku baabaire baine kukora. (Neh. 12:44) N’ahabw’ekyo Nehemia akahamya ngu kimwe kya ikumi kyashoroozibwa. Akatoorana abashaija abeesigwa kureeberera ebishengye by’amabiikiro n’okuha Abaleevi omugabo gwabo.

10, 11. Nitubaasa kushagika tuta okuramya okw’amazima?

¹⁰ Eki nitukyegaho ki? Nikitwijutsya ngu twine omugisha gw’okuhaisa Yehova ekitiinisa n’ebi twine. (Enf. 3:9) Twahayo okushagika omurimo gwa Yehova, nituba twamuha ebye buzima. (1 Bus. 29:14-16) Nitubaasa kuteekateeka ngu titwine bingi by’okuhayo, kwonka twaba nitusiima, twena nitwija kugira eki twahayo.​—2 Kor. 8:12.

¹¹ Kumara emyaka mingi, eka ayaabaire erimu abaana munaana ekaba eyeta omushaija n’omukazi we abakuzire abaabaire bari baapayoniya ab’omutaano, kurya nabo buri saabiiti. Nyina w’abaana abo butoosha akaba agira ngu obu atwire naateekyera abantu ikumi, tikirikumugumira kuteekyera abandi babiri. Eby’okurya ebyo ebya buri saabiiti nibireebeka nka bikye, kwonka baapayoniya abo bakaba basiima munonga obufura obwo! Ab’eka egyo nabo bakagasirwa munonga ahabwa baapayoniya abo. Ebigambo byabo ebirikugaruramu amaani n’ebirungi ebi baabaire babagambira ebirikukwata aha kubuurira, bikahiga abaana kutunguuka omu by’omwoyo. Bwanyima abaana boona bakaza omu buheereza obw’obutwire.

12. Abareeberezi n’abaheereza nibataho ky’okureeberaho ki ekirungi omu kibiina?

¹² Ekindi, abareeberezi n’abaheereza bashemereire kuteeraho abandi eky’okureeberaho omu kushagika okuramya okw’amazima nka Nehemia. Eki nikihwera abandi omu kibiina. Abareeberezi nabo nibatooreza eky’okureeberaho ky’entumwa Paulo. Akaba naashagika okuramya okw’amazima kandi akaha n’obuhabuzi. Nk’eky’okureeberaho, akaha obuhabuzi bwingi aha bikwatiraine n’okuhayo.​—1 Kor. 16:1-3; 2 Kor. 9:5-7.

13. Abayudaaya abamwe bakaba bakora ki aha Sabato?

¹³ Shoma Nehemia 13:15-21. Twamara obwire bwingi turikwesherurira eby’obutungi, omukago gwaitu na Yehova nigusiisikara. Kurugiirira aha biri omu Okuruga 31:13, Sabato eya buri saabiiti ekaba eijutsya Abaisraeli ngu n’abantu abeeziibwe. Aha izooba eryo, amaka gakaba gagira okuramya kw’eka, okushaba, kandi gateekateeka aha biragiro bya Ruhanga. Kwonka Abaisraeli abamwe bakaba baguza ebintu aha Sabato nk’oku baabaire bakora aha mazooba agandi. Okuramya Ruhanga bakakuta omu mwanya gwa kabiri. Nehemia ku yaareebire ekyabaire nikibaho, yaaragiira kukiinga enyigi z’orurembo aha izooba rya mukaaga omu mwabazyo, kuzibira abashuubuzi kutaaha omu rurembo Sabato etakahikire.

14, 15. (a) Nihabaasa kubaho ki twamara obwire bwingi turikusherura esente? (b) Nitubaasa kutaaha tuta omu buruhuukiro bwa Ruhanga?

¹⁴ Niki eki turikubaasa kwegyera aha ky’okureeberaho kya Nehemia? Eky’okubanza, nitwega ngu titushemereire kumara obwire bwingi turikusherura esente. Emirimo yaitu neebaasa kutuhuzya na munonga twaba niyo twayebembeza. Ijuka okurabura kwa Yesu okurikukwata aha kuheereza abakama babiri. (Shoma Matayo 6:24.) Nehemia akaba naabaasa kukora esente nyingi arikwejumba omu by’obushuubuzi, kwonka obwire bwe akabukoresa ata omuri Yerusaalemu? (Neh. 5:14-18) Omu mwanya gw’okushuubura n’aba Tuuro nari n’abandi, akeehayo kuhwera abaheereza ba Ruhanga bagyenzi be n’okukora ebirikureetera eiziina rya Ruhanga kwezibwa. N’obunaku obu, abareeberezi n’abaheereza nibata omutima aha kukora ebirikuhwera ekibiina kandi abaheereza ba Ruhanga bagyenzi baabo nibabakunda ahabw’okutwaza batyo. N’ekirikurugamu, abaheereza ba Yehova nibagira rukundo, obusingye, n’obumwe.​—Ezk. 34:25, 28.

¹⁵ Abakristaayo tikirikubetengyesa kugira Sabato eya buri saabiiti. Paulo akagira ati: “Hakiriho sabato y’okuhuumuriraho ebiikiirwe abantu ba Ruhanga.” Akongyera yaagira ati: “Omuntu weena otaahire omu buruhuukiro bwa Ruhanga, biri ahuumwire emirimo ye, nk’oku Ruhanga yaahuumwire eye.” (Heb. 4:9, 10) Nk’Abakristaayo, nitubaasa kutaaha omu buruhuukiro bwa Ruhanga turikukora ebirikuhikaana n’ebigyendererwa bye. Iwe n’ab’eka yaawe nimwebembeza okukora ebi Yehova akunda murikugira okuramya kw’eka, murikuza omu nteerane n’omu kubuurira? Twine kuhamira aha kihikire turikushoboororera abu turikukorera nari abu turikukora nabo na munonga baaba batarikwikirizana n’entebeekanisa yaitu ey’eby’omwoyo. Ekyo nikishushana n’eki Nehemia yaakozire obu yaabinga aba Tuuro akakiinga enyigi z’orurembo. Omu kukora ekyo, akaba naayebembeza okuheereza Yehova. Ahabw’okugira ngu turi abaheereza ba Yehova abeeziibwe, ni kirungi kwebuuza tuti: ‘Oku ndikutwaza nikworeka ngu ninyebembeza obuheereza bwe?’​—Mat. 6:33.

16. Akamanyiso k’Abaisraeli b’omu bunaku bwa Nehemia nk’abantu ba Ruhanga abeeziibwe kakaba kari mu kabi ki?

¹⁶ Shoma Nehemia 13:23-27. Omu bunaku bwa Nehemia, Abaisraeli bakaba bashwera abanyamahanga. Obu Nehemia yaataayaaya omuri Yerusaalemu omurundi gw’okubanza, akahiga abakuru b’abantu kuragaana endagano y’okutashwera abakazi b’abanyamahanga. (Neh. 9:38; 10:30) Kwonka aha kutaayaaya kwe okwa kabiri, Nehemia akashanga abashaija Abayudaaya bashweire abanyamahanga kandi akamanyiso kaabo nk’abantu ba Ruhanga abeeziibwe kakaba kari haihi kuhwaho! Abaana b’abanyamahangakazi abo bakaba batarikugamba Oruheburaayo. Bwanyima y’okukura, baakayeyetsire Abaisraeli? Nari baakayeyetsire Abashidoodi, Abaamoni,  nari Abamoabu? Obu baabaire batarikumanya Oruheburaayo, bakaabaasize kwetegyereza ebiragiro bya Ruhanga? Bakaamanyire bata Yehova kandi bakacwamu kumuheereza omu mwanya gw’okuheereza baaruhanga ba baanyinabo? Okucwamu ahonaaho kikaba nikyetengyesa kandi nikyo Nehemia yaakozire.​—Neh. 13:28.

17. Abazaire nibabaasa kuhwera bata abaana baabo kugira omukago murungi na Ruhanga?

¹⁷ Obunaku obu, twine kugira eki twakora kubaasa kuhwera abaana baitu kugira akamanyiso k’Ekikristaayo. Abazaire, mwebuuze muti: ‘Abaana baitu nibeetegyereza amazima g’omu Baibuli kandi nibagagambaho? (Zef. 3:9) Ebi barikugaaniiraho nibyoreka ngu nibebemberwa omwoyo gwa Ruhanga nari ogw’ensi?’ Otakaahwa amaani waareeba ngu nikyetengyesa kubahwera kukora empindahinduka. Nikitwara obwire kwega ekintu, na munonga waaba oine ebirikukuhuzya. Abaana baawe nibagyemeserezibwa kutoorobera Yehova. N’ahabw’ekyo, n’okugumisiriza koresa Okuramya kw’Eka nari obundi bwire kuhwera abaana baawe kugira omukago murungi na Yehova. (Bir. 6:6-9) Boorekye ebirungi ebirikuruga omu kuba ow’omutaano aha b’ensi ya Sitaane. (Yoh. 17:15-17) Kandi teeraho kubahika aha mutima.

18. Ahabw’enki abazaire nibo barikubaasa kuhwera abaana baabo kwehayo ahari Yehova?

¹⁸ Abaana baawe baine kwecweramu yaaba baraaheereze Yehova nari bataraamuheereze. Kwonka imwe nk’abazaire nimubaasa kubahwera omu miringo mingi. Eki nikitwariramu okubateeraho eky’okureeberaho kirungi, kubashoboororera emicwe ei bashemereire kwetantara n’okubahwera kwetegyereza ebirikuruga omu kucwamu kubi. Abazaire, niimwe murikubaasa kuhwera abaana baanyu kwehayo ahari Yehova. Mwine kubahwera kutunga akamanyiso k’Ekikristaayo kandi bakakarinda. Twena twine kurinda akamanyiso kaitu k’Ekikristaayo, ekirikumanyisa okugyendera aha mitindo ya Ruhanga n’okutwaza omu muringo ogu arikwenda ngu tutwazemu.​—Kush. 3:4, 5; 16:15.

19, 20. Yehova naabaasa kutwijuka ata akatuzimuurira ebirungi?

¹⁹ Omwe owaabaire ariho omu bunaku bwa Nehemia ni nabi Malaki, owaagizire ngu ‘ekitabo ekirimu ebirikwijutsya kikahandiikwa . . . ahabw’abaabaire nibatiina MUKAMA, bakateekateeka aha iziina rye.’ (Mal. 3:16, 17) Ruhanga taribaasa kwebwa abo abarikumutiina bakakunda n’eiziina rye.​—Heb. 6:10.

²⁰ Nehemia akashaba ati: “Ai Ruhanga wangye, ogume onyijukye, onzimuurire ebirungi.” (Neh. 13:31) Nka Nehemia, amaziina gaitu nigaija kuguma omu kitabo kya Ruhanga eky’ebirikwijukwa ku turaagume nitwetantara emikago mibi, turikushagika entebeekanisa z’ekibiina kya Yehova, turikwebembeza obuheereza bwa Yehova, kandi turikurinda akamanyiso kaitu k’Ekikristaayo. Ka tugume ‘nitweshwijuma tureebe ku turaabe turi omu kwikiriza.’ (2 Kor. 13:5) Twaguma twine omukago murungi na Yehova, naija kutwijuka ‘atuzimuurire ebirungi.’