KA TUGIRE ngu omuntu yaakuha ekiconco kirungi munonga. Noohurira ota?— Mbwenu noomwebaza kwonka obura kuguma nomwijuka? Nari nooguma nomwijuka n’eki yaakukorera?—

Yehova Ruhanga akatuha ekiconco kirungi munonga. Akoohereza Omwana we omu nsi kutufeera. Noomanya ahabw’enki Yesu yaatufeereire?— Eki n’ekintu kikuru munonga eki tushemereire kwetegyereza.

Nk’oku twayegire omu Shuura 23, Adamu akashiisha obu yaahenda ekiragiro kya Ruhanga. Kandi twena tukahungura ekibi okuruga ahari tataitwe Adamu. Mbwenu, nooteekateeka ngu tukaba nitwetenga ki?— Tukaba nitwetenga tataitwe ondiijo, owaagumire ari ohikiriire obu yaabaire ari omu nsi. Nooteekateeka ngu n’oha orikubaasa kuba tataitwe nk’ogwo?— Yesu naabaasa.

Yehova akoohereza Yesu omu nsi ngu abe nka tataitwe omu mwanya gwa Adamu. Baibuli neegira eti: “Omuntu ow’okubanza, Adamu, akahinduka omuntu oine amagara. Adamu owa bwanyima yaahinduka [o]mwoyo orikureeta amagara.” Adamu ow’okubanza akaba ari oha?— Niwe ogwo ou Ruhanga yaahangire kuruga omu mucuucu. Adamu owa kabiri n’oha?— Ni Yesu. Baibuli neeyoreka eki ku erikugira eti: ‘Omuntu w’okubanza [Adamu] akaruga omu itaka n’omuntu w’omucuucu; omuntu owa kabiri [Yesu] akaruga omu iguru.’​1 Abakorinso 15:45, 47; Okutandika 2:7.

Ahabw’okugira ngu Ruhanga akaiha amagara ga Yesu omu iguru yaagata omunda y’omukazi Mariamu, Yesu tarahungwiire kibi kyona  kuruga ahari Adamu. Egi niyo nshonga ahabw’enki Yesu yaabaire ari omuntu ohikiriire. (Luka 1:30-35) Kandi egyo niyo nshonga ahabw’enki obu Yesu yaazaarwa maraika yaagambiire abariisa b’entaama ati: “Eki kiro Omujuni yaabazaarirwa.” (Luka 2:11) Kwonka Yesu okubaasa kuba Omujuni waitu, niki ekyabaire nikyetengyesa?— Akaba aine kukura kandi akaba omushaija mukuru nka Adamu. Obwo Yesu akabaasize kuhinduka ‘Adamu owa kabiri.’

Yesu Omujuni waitu, kandi naija kuba “Tataitwe Otahwaho.” Baibuli nikwo erikumweta. (Isaaya 9:6, 7) Eego,Yesu ohikiriire naabaasa kuba tataitwe omu mwanya gwa Adamu, owaahindukire otahikiriire obu yaashiisha. Omu muringo ogwo nitubaasa kucwamu ngu ‘Adamu owa kabiri’ abe tataitwe. Kwonka Yesu n’Omwana wa Yehova Ruhanga.

Twayega ebirikukwata ahari Yesu, nitubaasa kumwikiriza nk’Omujuni waitu. Noijuka eki aine kutujuna?— N’okutujuna ekibi n’okufa ebi twahungwiire kuruga ahari Adamu. Amagara agahikiriire agu Yesu yaahaireyo ahabwaitu nigeetwa ekitambo. Yehova akahayo ekitambo ngu tusaasirwe ebibi byaitu.​—Matayo 20:28; Abarooma 5:8; 6:23.

Buzima titurikwenda kwebwa ebi Ruhanga n’Omwana we baatukoreire, tikwo?— Yesu akooreka abakuratsi be omuringo gw’omutaano ogurikubaasa kutuhwera kwijuka ebi yaakozire. Ka tugugambeho.

 Teera akashushani ori omu kishengye ky’ahaiguru omuri Kanyinaibiri y’omuri Yerusaalemu. N’obwire bw’ekiro. Yesu n’entumwa ze bari aha meeza. Aha meeza hariho enyama y’omwana gw’entaama eyokize, omugaati, na viinyo erikutukura. Baine ekiihuro ky’omutaano. Noomanya ahabw’enki?—

Ekiihuro eki n’eky’okubaijutsya eki Yehova yaakozire emyaka mingi enyima obu abantu be Abaisraeli, baabaire bari abahuuku omuri Misri. Obwire obwo Yehova akagambira abantu be ati: ‘Buri ka eyite omwana gw’entaama, mute eshagama yaagwo aha biti by’emiryango y’amaju gaanyu.’ Kandi yaagira ati: ‘Mutaahe omu maju gaanyu murye omwana gw’entaama.’

 Abaisraeli nikwo baakozire. Kandi ekiro ekyo, maraika wa Ruhanga akaraba omu nsi ya Misri. Omu maju maingi, maraika akaita omwana w’omujigaijo. Kwonka maraika ku yaabaire areeba eshagama y’omwana gw’entaama aha biti by’emiryango, egyo nju akaba agihiingura. Omu maju ago, tihaine baana abaafiire. Faraho omugabe wa Misri, akatiina munonga ahabw’eki maraika wa Yehova yaakozire. N’ahabw’ekyo Faraho akagambira Abaisraeli ati: ‘Mugyende murugye omuri Misri!’ Ahonaaho, baata ebintu byabo aha ngamira n’endogoya baagyenda.

Yehova akaba atarikwenda ngu abantu be beebwe oku yaabacungwire. N’ahabw’ekyo akagira ati: ‘Omurundi gumwe omu mwaka nimwija kuguma murye ekiihuro, nk’eki mwarya ekiro eki.’ Ekiihuro ekyo eky’omutaano bakakyeta Okuhingurwaho. Noomanya ahabw’enki?— N’ahabw’okuba ekiro ekyo maraika wa Ruhanga “akahingura” amaju agaabaire gaine akamanyiso k’eshagama.​—Okuruga 12:1-13, 24-27, 31.

Yesu n’entumwa ze bakaba nibateekateeka ahari ekyo obu baabaire nibarya ekiihuro ky’Okuhingurwaho. Bwanyima, Yesu akakora ekintu kikuru munonga. Kwonka atakakikozire, entumwa eyaabaire etarikwesigwa, Yuda, ekabingwa. Reero Yesu yaakwata omugaati ogwabaire gutsigaireho, yaagushabira, yaagubega, yaaguha abeegi be naagira ati: “Mwakiire, murye.” Bwanyima yaabagira ati: ‘Omugaati ogu nigujwekyera omubiri gwangye ogu ndaheyo obu ndabafeere.’

Ekyakuratsireho Yesu yaakwata ekikopo kya viinyo erikutukura. Bwanyima y’eshaara endiijo y’okusiima, yaakibaha naagira ati: “Munyweho mwena.” Kandi yaabagira ati: ‘Viinyo egi neejwekyera eshagama yangye. Omu bwire butari bwa hare eshagama yangye neija kusheesheka kubacungura kuruga omu bibi byanyu. Mugume mukore mutyo okuunyijukiraho.’​—Matayo 26:26-28; 1 Abakorinso 11:23-26.

Mbwenu waayetegyereza ngu Yesu akagira ngu abeegi bakaba bashemereire kuguma nibakora batyo okumwijukiraho?— Bakaba  batakigaruka kurya kiihuro ky’Okuhingurwaho. Omu mwanya gw’ekyo, omurundi gumwe omu mwaka bakaba baine kugira ekiihuro eki eky’omutaano eky’okwijuka Yesu n’okufa kwe. Ekiihuro ekyo nikyetwa Ekiihuro kya Mukama waitu. Ebiro ebi nitukira kukyeta Ekiijutsyo. Ahabw’enki?— Ahabw’okuba nikitwijutsya eki Yesu n’Ishe, Yehova Ruhanga, baatukoreire.

Omugaati gushemereire kutureetera kuteekateeka aha mubiri gwa Yesu. Akaba ayeteekateekire kuhayo omubiri ogwo ngu tubaase kutunga amagara agatahwaho. Kandi shi viinyo erikutukura?— Eshemereire kutwijutsya obukuru bw’eshagama ya Yesu. N’ey’omuhendo munonga kukira eshagama y’omwana gw’entaama ogw’aha izooba ry’Okuhingurwaho omuri Misri. Noomanya ahabw’enki?— Baibuli neegira ngu eshagama ya Yesu neebaasa kutureetera kusaasirwa ebibi byaitu. Kandi twasaasirwa ebibi byaitu byona, nitwija kuba tutakirwara, tutakikaikura, kandi tutakifa. Tushemereire kuteekateeka ahari ekyo twaza aha Kiijutsyo.

Buri omwe shi ashemereire kurya aha mugaati n’okunywa ahari viinyo aha Kiijutsyo?— Yesu akagambira abo abarikunywa ahari viinyo kandi bakarya aha mugaati ati: ‘Nimwija kugira omugabo omu bukama bwangye kandi mushutame naanye aha bitebe by’obukama omu iguru.’ (Luka 22:19, 20, 30) Eki kikaba nikimanyisa ngu bakaba nibaija kuza omu iguru kuba abakama na Yesu. N’ahabw’ekyo abo bonka abaine amatsiko g’okutegyeka na Yesu omu iguru nibo bashemereire kurya omugaati kandi bakanywa na viinyo.

Kwonka n’abo abatarikurya mugaati nari kunywa viinyo bashemereire kubaho aha Kiijutsyo. Noomanya ahabw’enki?— N’ahabw’okuba naitwe Yesu akahayo amagara ge ahabwaitu. Twaza aha Kiijutsyo nitworeka ngu titwebirwe. Nitwijuka ekiconco kya Ruhanga ekirungi munonga.