Ekitebyo 111

Omwojo Owaagwejegyeire

AI BAMBE! N’enki ekirikubaho aha? Omwojo obyami ahansi tugire shi ngu arikubi munonga hi? Reeba! omwe ahari abo bashaija abarikuruga omu nju ni Paulo! Na Timoseo nomureebaho? Tugire shi ngu omwojo yaahanantuka omu dirisa?

Eego, ekyo nikyo kyabaho. Paulo akaba naaheereza abeegyesibwa orubazo hanu omuri Troa. Naamanya ngu tarikuza kugaruka kubareeba okumara obwire buraingwa ahakuba omu eizooba eriraakurateho, naaza kutemba obwato agyende. N’ahabw’ekyo aguma naaganiira okuhitsya omu itumbi.

Ogu mwojo orikwetwa Yutuko akaba ashutami omu dirisa, atyo yaakwatwa oturo yaagwejegyera. Yaahanantuka omuri kaanyinaishatu yaagwa ahansi! Mbwenu ningira ngu nooreeba ahabw’enki abantu beerarikiriire. Abashaija ku baizire baamwihaho, baashanga kiri nk’oku baaba nibakiteekateeka. Manya yaafa!

Paulo ku yaareebire ngu omwojo yaafa, yaamurambiraho yaamubumbatira. Atyo yaagira ati: ‘Mutakayerarikirira. Ari gye!’ Kandi kwo buzima nikwo kiri! N’eky’okutangaaza! Paulo yaamuzoora! Abantu boona bashemererwa munonga.

Boona bagaruka ahaiguru omuri kaanyinaishatu bagumizamu n’okurya ekihuuro. Paulo agumizamu n’okuganiira okuhitsya omu kasheeshe. Beitu nitubaasa kuhamya ngu Yutuko taragarukire kugwejegyera! Bwanyima Paulo, Timoseo n’abo abaabaire nibagyenda nabo baza omu bwato. Noomanya ei barikuza?

Paulo ariyo naamariiriza orugyendo rwe rwakashatu orw’okubuurira, kandi ari omu muhanda naagaruka owaabo. Omu rugyendo oru, Paulo akaba yaatwire omu rurembo Efeso ari wenka kumara emyaka eshatu. N’ahabw’ekyo hati oru n’orugyendo ruraingwaho kukira orugyendo rwe orwa kabiri.

Bwanyima y’okuruga omuri Troa, obwato bwemerera ahari Mileeto kumara omwanya mukye. Obu Efeso eri mailo nkye kuruga Mileeto, Paulo atuma aha bareeberezi omu kibiina okwija omuri Mileeto ngu abaase kuganiira nabo omurundi gw’aha muheru. Bwanyima y’ekyo, obunaku bw’obwato kugyenda ku bwahikire, mbwenu ka baagizire enaku okureeba Paulo naagyenda!

Aha muheru obwato buhika Kaisarea. Paulo akirikutuura aha omu nju y’omwegi Filipi, omurangi Agabo amurabura. Agira ngu Paulo naija kukomwa ku araije omuri Yerusaalemu. Kandi kwo buzima, eki nikyo kyabaireho. Bwanyina y’okuguma omu kihome kumara emyaka ebiri omuri Kaisarea, Paulo ayoherezibwa omuri Rooma okucwerwa orubanja omu maisho g’omutegyeki Omurooma Kaisaari. Ka tureebe ekirikubaho omu rugyendo rwabo kuza Rooma.

Ebyakozirwe eshuura 19 okuhika 26.