Psalm 61:1-8
Diyin God nihichʼą́ą́h hólónígíí bee baa dadzííníidlí
61 Diyin God nílíinii, nánooshkąąhígíí diitsʼı̨́ı̨́h. Shisodizin yíníłtsʼą́ą́ʼ.
2 Shąąh nahakaʼgo niʼ nihoneelʼą́ą́dę́ę́ʼ nichʼįʼ sodideeszįįł. Tsé shilááh áníłtsoii baa shinílóós.
3 Háálá nineʼ nehésdzííʼ áádóó anaʼí bitsʼąą kin niłdzilgo yaaʼáii shá nílı̨́.
4 Niníbaal biiʼ hodílzinii hoolʼáágóó biiʼ kééhashtʼı̨́į doo. Nitʼaʼ biyaagi doo shihodééłníígóó naa jííníshłíi doo. Síilah.
5 Háálá, Diyin God nílíinii, bee ádee hadeesdzíiʼii shá disínítsʼą́ą́ʼ. Nízhiʼ deidísinii bííʼ dadooleełígi átʼéii shaa dííníʼą́.
6 Aláahgo naatʼáanii nízaadgóó hináago bá ánílééh. Náás daʼíchíhígi átʼéego hináago bá ánílééh!
7 Diyin God bidááhdóó hoolʼáágóó hojílǫ́ǫgo ahoolʼáa doo. Aa aʼááh hasinii áádóó tʼáá aaníinii haa áhályą́ą doo biniyé hashtʼehólééh!
8 Áko tʼáá ákwíí jı̨́ ádee hahidisdziihígíí beʼeshʼı̨́įgo hoolʼáágóó nízhiʼ baa hashniihgo hashtaał doo.
