Psalm 58:1-11
Doo yáʼádaashóonii atídoolnííł bíká sohodizin
58 Ayóó átʼéii danohłíinii, daʼ nihíísh tʼáá aaníí tʼáá ákogi átʼéego hadahohdziih? Nihokááʼ diné danohłíinii, daʼ tʼáásh ákogi átʼéego aa nídaahtʼı̨́?
2 Dooda, doo yáʼáshóonii ayóó átʼéego nihijéí biyiʼdi bee hadahoyoohʼaah. Nihokááʼgóó nihílaʼ bee doo chohooʼínígi ádaahtʼı̨́.
3 Doo yáʼádaashóonii éí tʼáá nidahachííhgóó yóóʼahikááh. Tʼáá nidahachííhdóó dabiyoochʼíidgo ádił nidaʼiisííh.
4 Tłʼiish bikʼaasdaʼ nahalingo hweʼánítʼı̨́ı̨́h dahólǫ́. Tłʼiish jéʼáhodilkałii nidahojílin.
5 Tłʼiish nidayiishǫǫhii tʼáá íiyisí dayiichįįhgo tłʼiish yichʼįʼ dahataałgo hachʼįʼ tłʼiish jéʼáhodilkałii nidahojílin.
6 Diyin God nílíinii, éí bizééʼ góneʼ biwooʼ dahítííh! Bóhólníihii nílíinii, náshdóíyáázh bitsiijįʼ daditłʼooígíí biwooʼ dadeeníinii bitsʼą́ą́ʼ dahítííh!
7 Bíniʼdii ałtso dadiyı̨́įhgo tó ałtso íínaʼígíí nidahojílin leʼ. Azdoołkah biniyé beʼałtı̨́ı̨́ʼtłʼóól yiyiiłtaazgo bikʼaʼ nidahaastǫʼ nidahalin leʼ.
8 Chʼosh tsiikʼiyaʼiiʼáhii diłhįhígi átʼéego hániʼdii doo hwéédahoozįįh da. Awééʼ atsą́ hááʼéelgo tʼáadoo jı̨́honaaʼéí yiyiiłtsánígíí nidahojílin leʼ.
9 Neʼásaaʼ bee íłbézhí tʼáadoo daniidóhí chʼil deeníní biyaa hadíídeezígíí nahalingo tʼáá dahináago Diyin God hashké nídzingo atéʼéłʼíinii yee nahjįʼ kóhodoolííł.
10 Diné tʼáá ákogi ádaatʼéii kʼééhodiidzaago yiyiiłtsą́ągo tʼáá íiyisí bił hózhǫ́ǫ doo. Diné doo yáʼádaashóonii bidił bee hakeeʼ táázdoogis.
11 Áko diné ádaaníi doo, Tʼáá aaníí, diné tʼáá ákogi ádaatʼéii nályééh bá hólǫ́ǫ́ lá! Tʼáá aaníí, niʼ bikáaʼgi Diyin God ánihwiiʼaah lá!
