Psalm 145:1-21
Bóhólníihii bitsʼą́ą́dóó yáʼátʼéehii áádóó bibee adziilii baa haʼniih
145 ShiDiyin God, aláahgo naatʼáanii nílíinii, tʼáá íiyisí naa hashniih doo, áádóó hoolʼáágóó ahóyéelʼáágóó nízhiʼ baa hashniih doo.
2 Tʼáá ákwíí jı̨́ naa hashniih doo, áádóó hoolʼáágóó ahóyéelʼáágóó nízhiʼ baa hashniih doo.
3 Bóhólníihii éí ayóó átʼéii nilı̨́, áko tʼáá íiyisí baa haʼniihgo yą́ą́h nilı̨́, índa yee ayóó átʼéii doo nijółkaah átʼée da.
4 Áálíiłii łaʼ oochííłdę́ę́ʼ, éí náás oochííłgóó yee yił náádahalneʼgo naa dahaniih doo, áádóó íínítʼįįdii ayóó ádaatʼéii yaa dahalneʼ doo.
5 Bee ił nílíinii bee ayóó ánítʼéhígíí áádóó tʼóó bikʼedaʼayóigo baa nanináhígíí nabikʼítsískees doo.
6 Adziil bee tʼóó bikʼedaʼíyéeʼgo íínítʼįįdii bee diné naa nidahalneʼ doo, áádóó ayóó ánítʼéhígíí baa chʼíhwiishʼaah doo.
7 Neʼajoobaʼ ayóó ánéelą́ąʼii bééhániihgo ná yaa nidahalneʼ doo, áádóó tʼáá ákogi ááníiłii ałdóʼ yee dahataał doo.
8 Bóhólníihii éí joobaʼ áádóó aa aʼááh hasin biiʼ hadeezbin; doo hah báháchįįh da índa bił hadleeʼgo aa aʼááh nízin.
9 Bóhólníihii tʼáá ałtso yichʼįʼ yáʼátʼéehgo áánííł índa tʼáá ałtsoní áyiilaii yoosánígo yaa aʼááh nízin.
10 Bóhólníihii nílíinii, áálíiłii tʼáá ałtso naa dahaniih doo, áádóó nidiyı̨́ı̨́ʼ danilíinii tʼáá ałtso naa dahaniih doo!
11 Bee nóhólníihgo bił hazʼáanii ayóó átʼéii yaa dahalneʼ doo, áádóó nidziilígíí yaa yádaałtiʼ doo,
12 áko ayóó átʼéego áyoolíłígíí índa bee nóhólníihgo bił hazʼáanii ayóó átʼéii ił ídlı̨́ ayóó ánóolninii diné yił ííshjání ádahósin.
13 Bee nóhólníihgo bił hazʼáanii hoolʼáágóó hólǫ́ índa oochííłgóó tʼáá ałtso bee nóhólnííh.
14 Bóhólníihii éí diné chą́ą́h dadigeehii tʼáá ałtso de áyósin, áádóó bąąh nidahwiikaadii tʼáá ałtso chánah ánáyoodlííł.
15 Tʼáá ałtso níká dadéezʼı̨́įʼgo nibaʼ ádaatʼé, áko baa náhwiilzhíishgo bichʼiyąʼ baa hidíʼaah.
16 Nílaʼ ąą ánéinilʼįįhgo hináanii tʼáá ałtso nináneelʼą́ąjįʼ deinízinii yee hwiih danilı̨́įgo áníłʼı̨́.
17 Tʼáá ałtsojįʼ Bóhólníihii tʼáá ákogi átʼéii jílı̨́, áádóó jijoobaʼgo tʼáá ałtsoní ájoolííł;
18 Bóhólníihii nídabookąąhgo bichʼįʼ sodadilzinii, éí tʼáá ałtso tʼáá aaníí ádaaníigo nídabookąąhii yíighahgi hólǫ́.
19 Dabidísinii deinízinii yeidiiʼaah; nídabookąąhgo ałdóʼ yidiitsʼaʼgo yisdáyiinííł.
20 Bóhólníihii ayóóʼádabóʼníinii tʼáá ałtso yaa áhályą́, nidi diné doo yáʼádaashóonii éí tʼáá ałtso íidoołdįįł.
21 Bóhólníihii bee baa haʼniihii bee yáshtiʼ doo, áádóó nihokááʼ dineʼé nináneelʼą́ąjįʼ bíniʼdii bízhiʼ diyinii hoolʼáágóó ahóyéelʼáágóó yaa dahaniih doo.
