Psalm 115:1-18
115 Nihichʼįʼ éí dooda, Bóhólníihii nílíinii, nihichʼįʼ éí dooda, nidi aa aʼááh nínízinii áádóó nitʼáá aaníinii biniinaa nízhiʼ bee niʼdójíigo naa haʼniih leʼ!
2 Haʼátʼíísh biniinaa ałʼąą dineʼé ádaaní, BiDiyin Godshąʼ kʼad háájí silı̨́ı̨́ʼ?
3 NihiDiyin God yeeʼ yótʼááh hiníláadi hólǫ́; tʼáá ádeeshłííł nízinígíí áyoolííł.
4 Biʼedaʼalyaii éí béésh łigaii índa óola, éí diné bílaʼ yee ádayiilaii ádaatʼé.
5 Éí bizééʼ dahólǫ́ǫ nidi, doo yee yádaałtiʼ da. Binááʼ dahólǫ́ǫ nidi, doo yee daʼooʼı̨́į da.
6 Bijaaʼ dahólǫ́ǫ nidi, doo yee daʼdiitsʼaʼ da. Bíchı̨́ı̨́h dahólǫ́ǫ nidi, doo yee daʼałchin da.
7 Bílaʼ dahólǫ́ǫ nidi, doo yee nidaʼachʼid da. Bikeeʼ dahólǫ́ǫ nidi, doo yee nidaakai da, áádóó azooł dah dijoolígíí dahólǫ́ǫ nidi, doo yee yádaałtiʼ da.
8 Díí ádajoolíłígíí tʼáá éí nidahojílin, áádóó edaʼalyaii yaa dadzólíhígíí tʼáá ałtso ałdóʼ tʼáá ákódaatʼé.
9 Ízrel dineʼé nohłíinii, Bóhólníihii baa dadzíínóhłí! Éí yíká análwoʼii áádóó yinaageʼ nilı̨́.
10 Éran dineʼé nohłíinii, Bóhólníihii baa dadzíínóhłí! Éí yíká análwoʼii áádóó yinaageʼ nilı̨́.
11 Nihí Bóhólníihii dadíínóhsinii, Bóhólníihii baa dadzíínóhłí! Éí yíká análwoʼii áádóó yinaageʼ nilı̨́.
12 Bóhólníihii éí nihénálniih nítʼééʼ; akʼizhdoodliił; Ízrel dineʼé yikʼizhdoodliił; Éran dineʼé yikʼizhdoodliił.
13 Aʼohgo ádaatʼéii índa ayóó ádaatʼéii Bóhólníihii deidósinii yikʼizhdoodliił.
14 Nihaʼáłchíní tʼáá bił Bóhólníihii kʼeeʼąą nihidínółtʼįįhgo daʼdoohtʼįįł!
15 Bóhólníihii éí yádiłhił índa nahasdzáán áyiilaii nihikʼijidlíi leʼ.
16 Yáʼąąsh bił hiníláii éí Bóhólníihii bí, nidi nahasdzáán éí dadineʼé badaʼáłchíní yeidiníʼą́.
17 Daneeznáanii éí Bóhólníihii doo yaa dahaniih da; hodéezyéél góyaa nidahaleehígíí ałdóʼ dooda.
18 Nidi nihí kodóó ahóyéelʼáágóó Bóhólníihii baa dahwiiʼniih doo. Bóhólníihii baa dahohniih!
