Nufuna kufwa—Kansi Baibolo inganiyavye nikankhala na maganizo ofuna kulipaya?
Yankho ya m’Baibolo
Eye! Baibolo ifumila kwa “ Mulungu, amene olimbikisa ovutika ntima.” (2 Akorinto 7:6) Olo kuti ni buku lini yoyavya ŵanthu ovutika maganizo, Baibolo yayavya ŵanthu anyinji amene enze na maganizo ofuna kulipaya. Ndipo malangizo ŵake angakuyavyeni soti namwe.
Kansi Baibolo yupeleka malangizo otyani pa nkhani yamene iyi?
● Mukoujako ayakine mwamumvwila.
Vayunena Baibolo: “Shamwali ngaye-ngaye okukonda nthawe zonse, ndipo yove ni m’bale wamene evyalikila kuti akuyavye pakawoneka mavuto.”—Miyambo 17:17.
Mfundo yake: Tonse tufuna kuti ŵanthu ayakine atiyavye tikakumana na mavuto.
Keno mungawujeko lini ayanu mwamumvwila, vunkhala monga mwatakula chimwala cholema ndipo mufuna lini kuti muchiike pansi. Koma mukaŵafotokozelako, vunkhala monga mwachitula ndipo vinthu vuyamba kukuyendelani luweme.
Yejani kuchita ivi: Fotokozani mwamumvwila kuli munthu muyakine lelo, payakine wa m’banja mwanu olo muyanu wamudalila. a Olo soti mungalembe pa pepa mwamumvwila.
● Nkhoyani mukawonane na dokota.
Vayunena Baibolo: “ Ŵanthu a bwino-bwino osakila lini dokota, koma olwala niye omusakila.”—Mateyu 9:12.
Mfundo yake: Tikalwala tuyeja-yeja kufwana thandizo ya kuchipatala.
Keno munthu ofuna kulipaya, chingankhale chizindikilo cha matenda ovutika maganizo. Tetyo osachita nsoni kuyawonana na dokota monga ni mwamuchitila mukalwala matenda aliwonse. Ndipo n’vokwanishika kupola matenda ovutika maganizo.
Yejani kuchita ivi: Nkhoyani mukawonane na dokota wamene oyiziŵa luweme ntchito yamene iyi kuti akuyavyeni mokulumija.
● Mukokumbukila kuti Mulungu okuŵelengelani.
Vayunena Baibolo: “Nthaki/mpheta 5 ozigulisa na ndalama ziŵili ziliye mphamvu, n’tetyo lini? Koma lomba paliye olo imozi yamene yuluŵika kwa Mulungu . . . Osachita wowa. Nimwe ofunika ngako kupambana nthaki zinyinji.”—Luka 12:6, 7.
Mfundo yake: Yehova owona kuti nimwe wofunika ngako.
Payakine mungowona kuti paliye okuganizilani, Koma Mulungu oziŵa mavuto onse ŵamukumana nawo. “Yove okukondani olo kuti mungayambe kuganiza kuti—mufuna lini soti kunkhala na moyo.” Lemba ya Masalimo 51:17. Yunena kuti: mwewo Mulungu munganyoze lini ntima wong’ambika na wofwaika. Ivi vuwonesha kuti Mulungu ofuna kuti munkhale mphela na moyo chifukwa okukondani.
Yejani kuchita ivi: Sakilani m’Baibolo kuti muwone umboni wakuti okukondani. Mwachisanzo, ŵelengani mutu 24 m’buku yakuti Yandikirani kwa Yehova.
● Mukopemphela kwa Mulungu.
Vayunena Baibolo: “Mutulileni [Mulungu], nkhaŵa zanu zonse pakuti okudelani nkhaŵa.”—1 Petulo 5:7.
Mfundo yake: Mulungu okusengani kuti mukomasuka kumuwuja chilichonse chamene chukuchitishani nkhaŵa.
Mulungu angakwanishe kukupasani ntendele wa mu ntima komasoti mphamvu kuti mukwanishe kupilila mavuto ŵamukumana nawo. (Afilipi 4:6, 7, 13) Mulungu okatishila ntchito njila yamene iyi poyavya ŵanthu amene omusenga kuti aŵayavye.—Masalimo 55:22.
Yejani kuchita ivi: Pemphelani kwa Mulungu lelo. Mukatishile ntchito zina yake yakuti, Yehova, ndipo mumuwuje mwamumvwila. (Masalimo 83:18) Musengeni kuti akuyavyeni kupilila.
● Mukoganizila vinthu viweme vayulonjeza Baibolo.
Vayunena Baibolo: “Chiyembekezo chamene ichi chatili nacho, chili monga ni nangula wa miyoyo yasu ndipo n’chosimikijilika komasoti n’chonkhazikika.”—Aheberi 6:19, Mawu anyansi.
Mfundo yake: Maganizo ŵasu angasokonezeke monga ni mwayuchitila sitima yamene yakumana na chimphepo pa manzi, koma vinthu viweme vayulonjeza Baibolo vingatiyavye kuti maganizo amene awo ankhale m’malo.
Vinthu vatuyembekezela ni nthano lini tyala, koma niye vawalonjeza Mulungu .—Chivumbulutso 21:4.
Yejani kuchita ivi: Ŵelengani nkhani ziyakine zokhuza vayutilonjeza Baibolo mu phunzilo 5 ya kabuku kakuti Uthenga uweme wofumila kuli Mulungu!
● Mukochita vinthu vukukondweleshani.
Vayunena Baibolo: “ Ntima wosangalala niye mankhwala ochija.”—Miyambo 17:22.
Mfundo yake: Tikochita vinthu vatukonda tunkhala osangalala, komasoti tunkhala na thanzi iweme.
Yejani kuchita ivi: Mukochita vinthu vingakuchitisheni kuti mukavichita mukokumvwa luweme. Mwachisanzo, kumvwishila nyimbo ziweme, kuŵelenga nkhani ziyakine zolimbikisa, komasoti kuchita masoŵela ayakine okukondweleshani. Mungankhale soti osangalala keno muyavya ayakine, olo pa vinthu vitontho-vitontho.—Machitidwe 20:35.
● Mukosamalila thanzi yanu.
Vayunena Baibolo: “Kuchita masoŵela otang’isha muŵili ni kopindulisha.”—1 Timoteyo 4:8.
Mfundo yake: Vinthu vutiyendela luweme keno tuchita masoŵela otang’isha muŵili, kuyona mokwanila, komasoti kulya vakulya vupasa thanzi.
Yejani kuchita ivi: Pangani kaulwendo kuti muyondolole mendo olo kwa 15 minesi tyala.
● Mukokumbukila kuti vinthu vuchinja.
Vayunena Baibolo: “Muziŵalini kuti moyo wanu uzankhale wotyani mailo.”—Yakobo 4:14.
Mfundo yake: Vinthu vamene vukuchitishani nkhaŵa pali lomba—olo vamene vuwoneka kuti mungavikwanishe lini kuvisilinja—vingankhale kuti ni vaka nthawe katontho tyala.
Olo mungapanikizike ngako pali lomba, ziŵani kuti vinthu vizayambe kuyenda nsiku iyakine. Tetyo, palipano mukofwana njila ingakuyavyeni kuti mukwanishe kupilila. (2 Akorinto 4:8) M’kupita kwa nthawe vinthu vunkhala soti m’malo mwake, koma mukangolipaya niye kuti mphela mwafwa.
Yejani kuchita ivi: Ŵelengani nkhani za ŵanthu a m’Baibolo amene enze efooka mpaka kuyamba kuganiza kuti afwe. Ndipo onani mwevichinjila vinthu pa moyo wawo noyamba soti kuyenda luweme—Olo kuti enzeyembekezela lini kuti vinthu vingachinje. Ganizilani visanzo ivi vokonkhapo.
Kansi Baibolo yutomola za ŵanthu amene enze funishisha kufwa?
Eye. Baibolo yofotokoza za ŵanthu amene enze “na maganizo ofuna kufwa.” Mulungu aliye ŵazuzule, koma eŵayavya. Ndipo angakwanishe kuchita soti vamene ivi na mwewo.
Eliya
● Kansi enze ŵani? Eliya enze mneneli wotang’a ntima. Koma nthawe iyakine naye efooka. Lemba ya Yakobo 5:17 yunena kuti: “Eliya enze munthu monga ni sewo”.
● Ndaŵa yanji enze funishisha kufwa? Pa nthawe iyakine, Eliya enzeliwona kuti, wasala yeka-yeka. Enze na nkhaŵa, komasoti enzeliwona kuti niwosafunika. Tetyo epenphela kuti: “Chosani moyo wangu Yehova.”—1 Mafumu 19:4.
● N’chinji chimuyavya kuti achinje maganizo ŵake amene aŵa? Eliya efotokozela Mulungu mwenzemvwila. Kansi Mulungu emulimbikisa tyani? Mulungu ewonesha kuti ekhuziwa navo, ndipo emuwonesha vinthu vuwonesha kuti yove ni wa mphamvu. Emusimikijila soti kuti akali munthu wofunika ndipo emupasa soti munthu muweme komasoti wachikondi kuti akomuyavya.
▸ Ŵelengani nkhani ya Eliya: 1 Mafumu 19:2-18.
Yobu
● Kansi enze ŵani? Enze munthu wolemela, enze na banja ikulu ndipo enzetumikila Mulungu wachendi mokhulupilika.
● Ndaŵa yanji enze funishisha kufwa? Mwazi-zizi Yobu ekumana na mavuto anyinji mokonkhejana. Katundu wake wonse weiŵiwa komasoti kuwonongewa. Ŵana ŵake onse echifwa pechifyanthiwa na ng’anda. Yove elwala matenda oŵa-ŵa ngako. Ndipo posilijila pake, azishamwali ŵake emukhumundwisa ngako pomunena kuti mavuto ŵakumana nawo wachita kuŵayamba yeka. Yobu enena kuti: “Moyo naukana; nufuna lini kunkhala soti na moyo mpaka kale-kale.”—Yobu 7:16.
● N’chinji chimuyavya kuti achinje maganizo amene aŵa? Yobu epemphela kwa Mulungu komasoti efotokozelako ŵanthu ayakine mavuto ŵake. (Yobu 10:1-3) Elimbikisiwa soti na muyake zina yake Elihu, wamene enze wachikondi ndipo emuyavya kuwona mavuto ŵake moyenela. Koma chofunika ngako n’chakuti, Yobu emvwila malangizo ŵechimupasa Mulungu.
▸ Ŵelengani nkhani ya Yobu: Yobu 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Mose
● Kansi enze ŵani? Mose enze n’sogoleli wa Aisiraeli koma soti mneneli wokhulupilika.
● Ndaŵa yanji enze funishisha kufwa? Mose enze panikizika chifukwa cha udindo ukulu, ŵanthu enze nkhalila ku munyoza, mwakuti efyika poŵeŵa navo. Chifukwa cha vamene ivi, edandawulila Mulungu kuti: “Nipaeni tyala.”—Numeri 11:11, 15.
● N’chinji chimuyavya kuti achinje maganizo amene aŵa? Mose efotokozela Mulungu mwenze mvwila. Ndipo Mulungu emuyavya pemuchepeshela ntchito yake kuti asati akopanikizika.
▸ Ŵelengani nkhani ya Mose: Numeri 11:4-6, 10-17.
a Keno muwona kuti maganizo ofuna kulipaya okulila-kulila ndipo muwona kuti paliye aliyense angakuyavyeni, tumilani foni ŵanthu amene ephunzisiwa ntchito yoyavya ŵanthu ovutika maganizo keno alipo mudela yanu.
Mungakondesoti kuwona izi
ZA SEWO
Sengani kuti muzatandajiwe na wa Mboni za Yehova
Sengani kuti muzatandajiwe nokambilana mfundo za m’Baibolo na wa Mboni za Yehova, olo yesani pulogilamu yasu yophunzila Baibolo kwamahala.