Wilembewa na Mateyo 6:1-34
6 “Samalani kuti osati mukochita vinthu vachilungamo pamenso pa ŵanthu na cholinga chakuti akuwoneni. Mukochita vamene ivi muzalondele lini mphoto kuli Atata ŵanu ali kululu.
2 Tetyo pamupeleka mphaso zachifundo,* osati mukolija belo monga ni mwakuchitila ŵanthu achinyengo m’malo ŵawo opemphelela na m’misewu na cholinga chakuti ŵanthu aŵatamande. Shuwa nukuujani, ŵanthu amene awo olondelelatu mphoto yawo yonse.
3 Koma wewo ukopeleka mphaso zachifundo, kwanja yako yamanjele osati ikoziŵa vayuchita kwanja yako ngayo,
4 kuti mphaso zako zachifundo zinkhale zachisinsi. Ukachita tetyo Atata ŵako amene owona vuchitika olo kuti wewo ungakwanishe lini kuŵawona, azakujoshele.
5 Komasoti pamupemphela, osati mukochita vinthu vakuchita ŵanthu achinyengo. Chifukwa ove okonda kupanama m’malo ŵawo opemphelela na mu mphambano za misewu ikulu-ikulu kuti ŵanthu akoŵawona. Shuwa nukuujani, ŵanthu amene awo olondelelatu mphoto yawo yonse.
6 Koma wewo paupemphela, ukoloŵa m’ng’anda mwako novala chiseko ndipo ukopemphela kuli Atata ŵako amene ungakwanishe lini kuŵawona. Ukachita tetyo Atata ŵako amene owona vuchitika olo kuti wewo ungakwanishe lini kuŵawona, azakujoshele.
7 Paupemphela, osati ukolaŵila mawu ŵamo na ŵamo moweleja-weleja monga ni mwakuchitila ŵanthu a mitundu iyakine. Ove oganiza kuti Mulungu aŵamvwishile akolaŵila mawu anyinji ngako.
8 Tetyo mwewo osankhala monga ni ove, chifukwa Atata ŵanu oziŵa vamufunikila olo mukaliye noŵasenga kumo.
9 Koma mwewo mukopemphela teti:
‘Atata ŵasu muli kululu, zina yanu ituŵishiwe.*
10 Ufumu wanu uwele. Vofuna vanu vichitike pano pa chalo monga ni mwavilili kululu.
11 Mutipase chakulya* chatufunikila lelo.
12 Mutikhululukile vophoniya* vasu chifukwa sewo nase takhululukila ŵala atiphoniyela.*
13 Tiyavyeni kuti osati tigonje keno tuyesewa* koma mutiteteze kwa Satana.’
14 Keno mukhululukila ŵanthu machimo ŵawo, namwe soti Atata ŵanu akululu azakukhululukileni.
15 Koma keno mukhululukila lini ŵanthu machimo ŵawo, Atata ŵanu azakukhululukileni lini soti machimo ŵanu.
16 Keno muli pa nthawe yolekeja kulya, osati mukowonesha chinso chachisoni monga ni mwakuchitila ŵala ŵanthu achinyengo. Ove osamalila lini vinso vawo* kuti ŵanthu ayakine aziŵe kuti ali pa nthawe yolekeja kulya. Shuwa nukuujani, ŵanthu amene awo olondelelatu mphoto yawo yonse.
17 Koma keno wewo uli pa nthawe yolekeja kulya, ukosamba kumenso kwako komasoti ukozolela mafuta m’mutu mwako,
18 kuti ŵanthu ayakine osati aziŵe kuti uli pa nthawe yolekeja kulya, koma Atata ŵako tyala amene ungakwanishe lini kuŵawona. Ukachita tetyo Atata ŵako amene owona vuchitika olo kuti wewo ungakwanishe lini kuŵawona, azakujoshele.
19 Lekani kuliunjikila chuma pano pa chalo, pamene njenjete* na nguwe vuwononga komasoti pamene akawalala otyola noiŵa.
20 Koma unjikani chuma chanu kululu, kwamene njenjete olo nguwe vingawononge lini komasoti kwamene akawalala angatyole lini noiŵa.
21 Chifukwa kwamene kuli chuma chako, ntima wako uzankhale soti kwamene uko.
22 Laiti ya muŵili ni linso. Tetyo keno linso yako yulolesha* pa chinthu chimozi, muŵili wako wonse uzankhale wongweleŵela ngako.
23 Koma keno linso yako ni yadyela,* muŵili wako wonse uzachite mfinzi. Tetyo keno kungweleŵela kwamene kuli muli wewo ni mfinzi, niye kuti mfinzi yamene iyo ni ikulu ngako.
24 Wantchito angakatile lini ntchito mabwana aŵili, chifukwa angazonde yumo noyamba kukonda muyakine, olo angankhale wokhulupilika kuli yumo noyamba kunyoza muyakine. Mungakwanishe lini kutumikila Mulungu na Chuma pa nthawe imo na imo.
25 Pa chifukwa chamene ichi, nukuujani kuti: Lekani kudela nkhaŵa za moyo wanu, kuti muzalye chinji olo kuti muzamwe chinji olosoti kudela nkhaŵa za miŵili yanu kuti muzavwale chinji. Kansi moyo ni wofunika lini ngako kupambana chakulya ndipo kansi muŵili ni wofunika lini ngako kupambana chovwala?
26 Lolesheshani tunyoni twa mmululu, pala tove tukomola lini mbewu olo kuweja olosoti kusunga chakulya m’chimphaka, koma Atata ŵanu akululu otulyesha. Kansi mwewo nimwe lini antengo wapatali kupambana tunyoni?
27 Niŵani wa mwewo wamene angatalimphishe moyo wake patontho peka* chifukwa chodela nkhaŵa?
28 Komasoti pa nkhani ya vovwala, ndaŵa yanji mudela nkhaŵa? Phunzilani mwakukulila maluŵa akusanga. Okatalini ntchito komasoti osonalini vovwala.
29 Koma nukuujani kuti olo Solomo mu ulemelelo wake wonse aliye vwaleko vovwala viweme ngako monga ni iliyonse mwa maluŵa amene aŵa.
30 Lomba keno Mulungu ovwalika teti vomela vakusanga, vamene vungonkhalapo lelo yeka mailo nakuzaviponya pamulilo, kansi yove angakuvwalikeni lini kupambana pamene apo mwewo achikhulupililo chitontho?
31 Tetyo osati mukodela nkhaŵa nonena kuti, ‘Tilye chinji?’ olo ‘Timwe chinji?’ olosoti, ‘Tivwale chinji?’
32 Chifukwa ŵanthu a mitundu iyakine osakila-sakila mwakhama vinthu vonse vamene ivi. Koma Atata ŵanu akululu oziŵa kuti mwewo mufunikila vinthu vonse vamene ivi.
33 Tetyo nthawe zonse mukoika Ufumu na mfundo zolungama za Mulungu pamalo oyamba pa moyo wanu, ndipo yove azakupaseni vinthu viyakine vonse vamene ivi.
34 Osati mukodela nkhaŵa za nsiku yamailo, chifukwa mailo yamene iyo izankhale na vodesa nkhaŵa vakesoti. Mavuto a nsiku iliyonse ni okwanila pa nsiku yamene iyo.”
Malizu a m'nyansi
^ Olo kuti, “mphaso kuli osauka.” Onani matanthauzo a mawu ayakine.
^ Olo kuti, “ikowonewa kuti ni yopatulika; ikowonewa kuti ni ituŵa.”
^ Mu Chigiliki, “banzi.”
^ Mu Chigiliki, “nkhongole.”
^ Mu Chigiliki, “ali nase na nkhongole.”
^ Mu Chigiliki, “Osatiloŵesha m’mayeselo.”
^ Olo kuti, “oleka kulisamalila.”
^ Mawu a Chigiliki amene eŵamasulila kuti “njenjete” otanthauza ntundu uyakine wa tudoyo tuchita monga ni nsenene twamene tudjeta vovwala.
^ Mu Chigiliki, “yulungamika.”
^ Mu Chigiliki, “iipa.”
^ Mu Chigiliki, “wamene angatalimphishe moyo wake kupima kwanja imozi.”
