FAKAAKOAGA 10
Maeke Fēfē a Koe ke Mailoga e Tapuakiaga Mooli?
1. Taha ni kia e lotu mooli?
“A mutolu [kia mataala ke he] tau perofeta pikopiko.”—MATAIO 7:15.
Ne fakaako e Iesu e tau tutaki haana kua taha ni e lotu, ko e lotu mooli. Kua tuga e puhala ne takitaki atu ke he moui tukulagi. Ne pehē a Iesu: “Kua tokogaogao foki a lautolu ke moua” e puhala ia. (Mataio 7:14) Ne talia hokoia he Atua e tapuakiaga ne fakavē ke he haana Kupu ko e Tohi Tapu. Ko e tau tagata tapuaki mooli oti kua fakalataha ke he taha e tua.—Totou Ioane 4:23, 24; 14:6; Efeso 4:4, 5.
Kitekite e vitiō Talia Oti Nakai he Atua e Tau Puhala Tapuaki?
2. Ko e heigoa ne talahau e Iesu hagaao ke he tau Kerisiano fakavai?
“Kua talahau e lautolu kua iloa e lautolu e Atua, ka kua fakatikai e lautolu a ia ke he tau gahua ha lautolu.”—TITO 1:16.
Ne hataki e Iesu to fakahehē he tau perofeta fakavai e tau Kerisiano. He kili, tuga na fiafia a lautolu ke he tau tagata tapuaki mooli. Ko e tau lotu ha lautolu kua talahau mo Kerisiano. Ka e maeke ia koe ke mailoga e tau tagata pihia ke he tau puhala ni ha lautolu. Fēfē? Ko e tapuakiaga mooli hokoia kua tutupu mai e tau Kerisiano mooli ne kitia ai e tau fua mo e tau puhala ia.—Totou Mataio 7:13-23.
3. Maeke fēfē a koe ke mailoga e tau tagata tapuaki mooli?
Manamanatu ke he lima e fakamailoga nei:
-
Ko e tau tagata tapuaki mooli kua fakalilifu e Tohi Tapu ko e Kupu he Atua. Ne eketaha a lautolu ke momoui ke he tau matapatu fakaakoaga ia. Ti ko e lotu mooli kua kehe mai he lotu kua fakavē ke he tau manatu he tau tagata. (Mataio 15:7-9) Ko e tau tagata tapuaki mooli ne nakai fakamatala taha mena mo e taute taha mena kehe.—Totou Ioane 17:17; 2 Timoteo 3:16, 17.
-
Fakalilifu he tau tutaki mooli ha Iesu e higoa he Atua ko Iehova. Ne fakalilifu e Iesu e higoa he Atua he fakailoa ai. Ne lagomatai e ia e tau tagata ke iloa e Atua mo e fakaako a lautolu ke liogi ke fakatapu e higoa he Atua. (Mataio 6:9) He matakavi ne nofo ai a koe, ko e lotu fe kua fakailoa e higoa he Atua?—Totou Ioane 17:26; Roma 10:13, 14.
-
Tau Kerisiano mooli kua fakamatala hagaao ke he Kautu he Atua. Fakafano he Atua a Iesu ke fakamatala e tala mitaki he Kautu. Ko e Kautu he Atua ko e amaamanakiaga ni a ia ma e tau tagata. Ne fakatumau a Iesu ke tutala hagaao ki ai ato mate a ia. (Luka 4:43; 8:1; 23:42, 43) Ne pehē a ia ko e tau tutaki haana to fakamatala hagaao ki ai. Ka fai tagata kua fina atu ki a koe ke tutala hagaao ke he Kautu he Atua, ko e lotu fe kua liga fano a ia?—Totou Mataio 24:14.
-
Nakai fai vala e tau tutaki ha Iesu he lalolagi kelea nei. Maeke a koe ke mailoga a lautolu he puhala kua nakai fai vala a lautolu he tau mena politika po ke tau fetokoaga fakamotu. (Ioane 17:16; 18:36) Kua nakai fifitaki foki e lautolu e tau mahani mo e tau aga hagahaga kelea he lalolagi.—Totou Iakopo 4:4.
-
Ha ha he tau Kerisiano mooli e fakaalofa lahi mahaki ke he taha mo e taha. Mai he Kupu he Atua, kua fakaako a lautolu ke fakalilifu e tau matakau lanu kehekehe oti. Pete kua fa lalago malolō he tau lotu fakavai e tau felakutaki he tau motu, kua nakai talia he tau tagata tapuaki mooli ke taute pihia. (Mika 4:1-3) Ka ko e tau Kerisiano mooli kua fakaaoga fakamakai e tau magaaho mo e tau koloa ha lautolu ke lagomatai mo e fakamalolō e falu.—Totou Ioane 13:34, 35; 1 Ioane 4:20.
4. Maeke nakai a koe ke kitia e lotu mooli?
Ko e lotu fe kua fakavē e tau fakaakoaga oti kana ke he Kupu he Atua, fakalilifu e higoa he Atua, mo e fakapuloa e Kautu he Atua ko e amaamanakiaga hokoia ma e tau tagata? Ko e matakau fe kua fakagahua e fakaalofa mo e kalo kehe he felakutaki? Ko e heigoa e manatu haau?—Totou 1 Ioane 3:10-12.
