E, kua ha ha he lalolagi katoa e tau miliona he tau fekafekau fifine he Tau Fakamoli a Iehova. Ko e kau lahi a lautolu he tau tagata fakamatala he tala mitaki he Kautu he Atua. Pehē e talahauaga fakaperofeta he Salamo 68:11 hagaao ke he tau fekafekau ia: “Kua vagahau mai e Iki [Iehova] ke he kupu; kua lahi e kau ha lautolu [ko e tau fifine] ne fakamatala.”

Kia mailoga e kehekehe he fekafekauaga he tau fifine he Tau Fakamoli a Iehova mo e fekafekauaga ne taute he tau fifine takitaki he falu lotu. Kua kehe mooli a lautolu. He tau puhala fe kua kehe a lautolu?

Kua kehe e tau tagata fanogonogo he fekafekauaga ha lautolu. Ko e tau akoako fifine, mua atu i Kerisitenitome, ne talia e tau matagahua takitaki i loto he tau fakapotopotoaga ha lautolu, ti ko e laulahi he tau tagata fanogonogo ha lautolu ko e tau tagata he fuifui. Ma e tau fekafekau fifine he Tau Fakamoli a Iehova, ko e laulahi he tau tagata fanogonogo ne fakamatala a lautolu ki ai kua haia i fafo he fakapotopotoaga, ko e tau tagata oti, tau tagata ne feleveia he fekafekauaga ha lautolu he taha fale ke he taha fale mo e falu matakavi foki.

Taha puhala kua kehe foki e tau fekafekau fifine he Tau Fakamoli a Iehova mai ia lautolu he falu lotu ko e gahua ha lautolu i loto he fakapotopotoaga. Ko e tau akoako fifine ha Kerisitenitome mo e falu lotu ne leveki atu mo e fakaako atu ke he tau tagata i loto he fakapotopotoaga ha lautolu ke he tau taofiaga he lotu ha lautolu. Ka ko e tau fekafekau fifine he Tau Fakamoli a Iehova, ne nakai fakaako a lautolu i loto he fakapotopotoaga ka ha ha i ai e tau tagata taane kua papatiso. Ko e tau tagata taane ni kua kotofa mo tau faiaoga ka taute pihia.​—1 Timoteo 3:2; Iakopo 3:1.

Kua fakamaama he Tohi Tapu ko e tau tagata taane ni hokoia ne kotofa ke leveki e fakapotopotoaga. Mailoga e fakafifitakiaga ne fakatoka he aposetolo ko Paulo he mogo ne tohi a ia ke he matakainaga leveki, ko Tito: “Ko e mena hanai ne toka ai e au a koe i Kereta, kia . . . kotofa e tau patu ke he taha māga mo e taha māga.” Ne lafi e Paulo ko e tau tagata oti ne kotofa kua lata ke “kua nakai talahaua kelea, ko e tane he fifine tokotaha.” (Tito 1:5, 6) Ne tala age foki e Paulo e tau fakatonuaga pihia ki a Timoteo he tohi haana hagaao ke he levekiaga he fakapotopotoaga: “Kaeke kua foli e taha ke he feua he epikopo, kua manako a ia ke he gahua mitaki. Hanai, kua lata ke he epikopo aua neke talahaua kelea a ia, kua fai hoana ke he fifine tokotaha, . . . kua aga ke fakaako atu.”​—1 Timoteo 3:1, 2.

Ko e ha e tau kotofaaga leveki i loto he fakapotopotoaga kua fakamahao ni ke he tau tagata taane? Pehē a Paulo: “Ha ko e mena nakai maeke e au ke fakaako atu ha fifine, po ke pule ke he tane, ka kia fakamate ni. Ha ko e mena ne eke fakamua a Atamu, ka e fakamui a Eva.” (1 Timoteo 2:12, 13) Ti ko e fakapapahiaga he tufugatiaaga ne fakakite e finagalo he Atua he kotofa e tau matagahua fakaako atu mo e leveki.

Ko e tau fekafekau ha Iehova kua mumuitua ke he fakafifitakiaga he ha lautolu a Takitaki ko Iesu Keriso. Ne tohi he tutaki ko Luka hagaao ke he fekafekauaga ha Iesu: “Ti haele takai ai a ia ke he tau māga, mo e tau magamotu, kua ogoogo mo e fakamatala e vagahau mitaki he kautu he Atua.” He magaaho fakamui ne fakafano atu e Iesu e tau tutaki haana ke taute foki e gahua ia: “Ti o fano ke he tau māga kua fakamatala e vagahau mitaki.”​—Luka 8:1; 9:2-6.

He vahā nei, ko e tau fekafekau ha Iehova​—taane mo e fifine—​ne gahua fakamakutu he taute e fekau ne talahau tuai e Iesu: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.”​—Mataio 24:14.