Ko e tala ne lagomatai a tautolu ke maama kua tutala a Paulo ke he fekau he Atua hagaao ke he finagalo Haana tuga ne moua e tautolu he Tohi Tapu.

Fa totoku he tau tohi ha tautolu e Heperu 4:12 ke fakakite kua gahua malolo e Tohi Tapu ke hiki e tau momoui, ti hakotika e mena ia. Ka e lagomatai ai ke maama e talahauaga ha Paulo he mogo ne tohi e ia e tau kupu he Heperu 4:12. Kua fakamafana e ia e tau Kerisiano Heperu ke kaufakalataha mo e finagalo he Atua. Loga he tau finagalo ia kua moua he tau Tohiaga Tapu. Fakaaoga e Paulo e fakataiaga he tau Isaraela ne fakatokanoa he Atua mai i Aikupito. Fai amaamanakiaga a lautolu ke o atu ke he “motu [kua mavehe mai] ne tafe ai e puke huhu mo e meli,” ka moua e lautolu e okiokihaga mooli.​—Esoto 3:8; Teutaronome 12:9, 10.

Ko e finagalo he Atua anei. Ka e tiaki he tau Isaraela e takitakiaga ti nakai fakagahuahua e tua ki a Iehova. Laulahi mogoia ia lautolu ne nakai hohoko atu ke he okiokihaga. (Numera 14:30; Iosua 14:6-10) Ka e lafi e Paulo kua ha ha agaia e “kupu ne talahaua mai ke hao atu ke he hana [Atua] okiokihaga.” (Heperu 3:16-19; 4:1) Ko e ‘kupu ia ne talahau’ ko e vala mooli he mena ne fakakite he Atua hagaao ke he finagalo haana. Tuga e tau Kerisiano Heperu, maeke a tautolu ke totou ti kaufakalataha mo e finagalo ia. Ke fakamaama ko e maveheaga nei ne fakavē ke he tau Tohiaga Tapu, ne fatiaki e Paulo e tau vala he Kenese 2:2 mo e Salamo 95:11.

Kua hokotia ke he tau loto ha tautolu kua “toka agaia . . . e kupu ne talahaua mai ke hao atu ke he hana [Atua] okiokihaga.” Falanaki a tautolu ke he mena ne fakaako he Tohi Tapu kua maeke agaia ke hao atu ke he okiokihaga he Atua, ti kua taute e tautolu e tau lakaaga ke hao atu ki ai. Nakai taute e tautolu e mena nei he lali ke muitua e Fakatufono faka-Mose po ke taute e tau mena mitaki ke moua e taliaaga ha Iehova. Ka ko e tua ha tautolu ke he Atua, kua kaufakalataha fiafia a tautolu mo e finagalo haana ti matutaki ke taute pihia. Totou afe e tau tagata he lalolagi ne kamata foki ke fakaako e Tohi Tapu mo e ako e mena ne fakakite he Atua hagaao ke he finagalo haana. Kua fakalagalaga he mena nei e tokologa ia lautolu ke hiki e puhala moui ha lautolu, ke fakakite e tua, mo e papatiso. Ko e puhala ne lauia a lautolu ko e fakamooliaga maaliali “ko e kupu he Atua kua moui ia, mo e gahua malolo.” Ko e mena ne fakakite he Atua he Tohi Tapu hagaao ke he finagalo haana ne fitā e lauia e tau momoui ha tautolu mo e to matutaki ke gahua malolo he tau momoui ha tautolu.