¿Tikitaʼya pan iní̱n a̱matajkuilo̱l kén yej nitajto̱lmoya̱waj de Jehová nimoyektajakiáj kua̱ nimonechkowaj? ¿Té íga tikye̱ʼtapejpenaj totsotsol wan tiknekij matine̱sikan ye̱kti?

Iga tikye̱ʼitaj to-Dios. Tikmatij iga Dios kita toyo̱loj, aya̱san kén tine̱sij (1 Samuel 16:7). Pero kua̱ timonechkowaj iga matikweyichi̱wakan, tiknekij matikye̱ʼitakan yéj wan no̱ tokni̱wan. Si tiaskiáj kan onoʼ se̱ juez, tiktapejnaskiáj ye̱kti totsotsol iga ijkó̱n tikne̱xtiáj iga tikye̱ʼitaj itekipano̱lis. Ijko̱nsan no̱, ken timotajakiáj kua̱ timonechkowaj kine̱xtiá iga tikye̱ʼitaj Jehová Dios, el «Juez de nochi ta̱jli», wan no̱ Kajli kan timonechkowaj (Génesis 18:25).

Iga matikne̱xti̱kan iga tinemij ken kijtowa Biblia. Itajto̱l Dios kijtowa iga yej kitokaj Cristo, ye̱kti mamotajakikan, iga mane̱si iga kiweyichi̱waj Dios (1 Timoteo 2:9, 10). Iní̱n tajto̱l kijto̱sneki amo matikajaki̱kan tsotsol yej makichi̱wa iga mateitakan, iga anka pux karoj, pux tepontik o kanaktiʼ. Wan matimoye̱ʼtajakilti̱kan kijto̱sneki iga mo̱nsaj matimotajakiltikan, amo masokiyoj. Iní̱n tajto̱lmej te̱pale̱wiá matiktapejpenakan totsotsol ken tejeme̱n tiknekij. Siga timoye̱ʼtajakiáj wel tikmonsajtiliáj itamachtilis de to-Dios, yej te̱ma̱nawiá, wan wel tikweyichi̱waj sinke matitajto̱kan ( Tito 2:10; 1 Pedro 2:12). Siga timoye̱ʼtajakiltiáj kua̱ timonechkowaj, kichi̱was iga matajto̱kan ye̱kti de ia̱ltepe̱ʼ Jehová.

Iga totsotsol maono ichkatiʼ wan mo̱nsaj mane̱si, ayá̱ moneki mayankuiʼ o makaroj. Inó̱n iga amo xikajte̱wa iga iní̱n makichi̱wa iga amo xaj pan Kajli kan nimonechkowaj.

• ¿Té íga moneki matimoyektajakikan kua̱ timonechkowaj iga matikweyichi̱wakan Jehová?

• ¿Katiapa tajto̱lmej yej onoʼ pan Biblia wel te̱pale̱wiá kua̱ tikitaj te̱ tsotsol matikajaki̱kan?