MIYEKEJ religiones temachtiaj kenijki noneki tinentos ijkuak tikchiuas teoyotl niman tlenon noneki noijtos ipan se teoyotl. San ika, Biblia kijtoua ika onka okse tlen más ueyi kijtosneki xijkon ken tlen yotikonteneujkej.

Biblia kijtoua ika ijkuak itekipanojkauan toTajtsin kinotsayaj, kipapatlayaj kampa kichiuayaj teoyotl niman xnochipa san noijki nentoyaj. Kemantika chikauak kichiuayaj teoyotl niman kemantika san yoliktsin. Sekimej ajkotlachiayaj niman oksekimej nixpilouayaj. San ika, xkeman okinkuikej imágenes, rosarios noso itlaj okse, yejuamej, san kijtouayaj tlen kimachiliayaj. ¿Tleka toTajtsin okinkak inteoyouan?

Kachtopa, ken yotikitakej yejuamej okinotskej toTajtsin ika itoka. Niman noijki okichiujkej tlen kijtoua 1 Juan 5:14: “Tikneltokaj ikan nochi toyojlo, ika Dios san tlinon tiktlajtlaniliskej ken yejua kineki, yejua techkakis”. Kuakon, ijkuak tiknotsaskej toTajtsin, noneki tiktlajtlaniliskej tlen yejua kineki. ¿Tlenon kijtosneki yejuin?

Noneki tikmatiskej tlenon kineki toTajtsin matikchiuakan, niman san uelis ijkin tikchiuaskej, tla tomachtiaj iTlajtol toTajtsin. Jehová xkichia ika matiktsontekontlalikan nochi tlen kijtoua Biblia, yejua kineki matokojtilikan matikasikamatikan tlen kijtoua niman matiktlakamatikan (Mateo 7:21-23). Niman tlen tiuelij ipan Biblia noneki nesis ipan toteoyouan.

Ijkuak más tomachtijtiaskej itech Jehová, más chikaujtias totlaneltokil. Niman yejuin melak noneki, pampa tla ijkon tikchiuaj, toTajtsin techkakis. Jesús okijto: “Niman tla nenkineltokaskej nochi tlen nenkitlajtlaniskej ijkuak nenkichiuaskej oración, nenkiseliskej” (Mateo 21:22). Maski tlaneltokijli kijtosneki tikneltokas itlaj tlen xtikita, xkijtosneki tla nonekis nochi tikneltokaskej, yej, noneki onias seki tlemach tlen matechititi ika yemelak nochiuas on tlen tikneltokaj (Hebreos 11:1). Melauak, tejuamej xuelij tikitaj Jehová, san ika, Biblia kiteneua seki tlemach tlen techititia ika Jehová melauak nemi niman yejua kinkaki akin itech tlaneltokaj. Tejuamej uelis tiktlajtlaniliskej makichikaua totlaneltokil pampa yejua kinektika techpaleuis (Lucas 17:5; Santiago 1:17).

Onka okse tlen noneki tikchiuaskej niman ijkon toTajtsin techkakis. Jesús okijto: “San nejua notechkopa uelis ajsiskej itech noTajtsin” (Juan 14:6). Yejuin kijtosneki ika san uelis tonisiuiskej itech toTajtsin tla tiknotsaj ika itoka Jesús. ¡Yejua ika, Jesús okinmachti inomachtijkauan kenon kinotsaskej toTajtsin ika itoka! (Juan 14:13; 15:16). San ika, tiknotsas toTajtsin itechkopa itoka Jesucristo xkijtosneki tla noneki tiknotsaskej Jesús. Yejuin kijtosneki, ika noneki tikasikamatiskej ika pampa yejua omik topampa ueli tiknotsaj toTajtsin iluikakchane.

Maski inomachtijkauan Jesús kimatstoyaj kenijki kichiuaskej oración, se de yejuamej okijli: “NoTEKO, xtechmachti kenijki tikchiuaskej oración” (Lucas 11:1). ¿Tleka ijkon okijli? Yejua kinekiya kimatis tlenon ueliskia kitlajtlaniskej ijkuak kichiuaskej teoyotl.