Adũ mbi ka Paddington, kartié mɛ azi da gba mɛ ka Londres. Mbi ndo dundó ndoni kɔi na mama tɛ mbi nga na atagbia mbi taa ti wali. Na ya angoi mɛndɛ̃ to e ndo dɔndó e zia, na lo mɛ ya lo ndo nyɔndó samba gba.

Ta mbi handó mbi na lingɔ sambela bí zu na ngoi mɛndó mbi dɛ nyingambi. Mbi ndó na Ngbangɔ kɔi ti yakere mɛ ni bondó na mbɛti ti Nzembo, mɛ mbi kpandó ni ti mabere bia mɛ mbi ndo ye. Tɛnɛ kɔi mɛndó mbi di kaya buku tɛ mbi ti kalasi ko, ta bɛ mbi ndo li na ni ma: “Zo zu ti kwá.” Tɛnɛ niko ndo lindó ya ta mbi la langɔ nzɔ̃ni ma wa mbi ndo bingandó li mbi gba na ndo dungɔ lɛ ngɛ̃́ tɛ mbi na ndo bi mɛ na gangɔ. Mbi ndo tɛnɛndó ya ‘ta dungɔ lɛ ngɛ̃́ alengbi ti dungɔ ngaso mɛ ma.’ ‘Nda mɛ mbi ge lɛ gigi nɛ?’ Ta mbi di yendó kpingɔ ma!

Mbi bandandó sepalangɔ na kwa tɛ asiɔ nyingɔ. Mbi ndo gindó lége ti tɛnɛngɔ tɛnɛ na azi mɛ kpili, gwengɔ ka kunda nga na bangɔ afilmɛ mɛ ndo hɛ̃ azi mbɛtɔ ndoni kɔi na akwa mbi ti kalasi. Abɛse du ya afilmɛ niko ndo hɛ̃ndó mbɛtɔ ko, e ndo sepala bondó bangɔ ni.

Ngoi mɛndó mbi ti na bulu sui kɔi ko mbi tindó yenge yenge. Mbi bandandó nyɔngɔ manga wa mbi ti ngandó mbɛ ti nyɔngɔ ni. Na na pɛni, mbi banda ngandó nyɔngɔ bangɛ. Na ngoi mɛndó mbi ti na bulu 11 ko, mbi ndo nyɔndó samba ɔ ndoni. Abɛse du ya ta mbi ndo mandó mongo ni ma ko, mbi ndo sepalandó na ndenge mɛ ni ndo gbɔ̃ mbi. Mbi ndo sepala ngandó na miziki na dɔngɔ dɔ. Mbi ndo sepalandó gwengɔ afɛtɛ gba nga na anganda ti bí ngoi zu mɛ bɛ mbi ye. Mbi ndo sindó na bí wa mbi ndo dirindó yada na hɔndɛngɔ tɛrɛ mbi uzu ti nɛngɔ ya ndã de. Na lo mɛ ya ni ndo hɛ̃ndó mbi nzɛ̃ngɔ gba ko, mbi bandandó kpɛngɔ kalasi na ya angoi gba. Na ngoi mɛndó mbi ka da kalasi ko, se prɔfɛsɛr kɔi onzi hangɔ e na mbɛti, mbi ndo nyɔndó samba uzu ti nɛngɔ ya o mɛndɛ̃ ga ha e na ye.

Ngoi mɛndó e si ka nda bulu ko, ta mbi luandó pwɛ gba ma. Mama tɛ mbi mandó ngɔnzɔ na lo ti pwɛ mɛ mbi lua na lo mɛ ya ta lo hĩngandó seliye mɛ mbi ti na ni ma. Mbi na lo e pandó pa wa mbi lo mbi diri ka ndo mɛndɛ̃. Mbi dirindó ka tɛ wanda tɛ mbi Tony, mɛndó lo na kwali tɛ arasta. Lo ndo wa nzi wa lo ndo tɛkɛndó drɔgɛ wa a hĩngandó lo mabere zo mɛ ndo du na ngɔnzɔ gba. Ta ningandó ma mbi mɛndó ngɔ na ngoi mɛndó mbi dɛ na bulu 16 wa mbi dũndó nyingambi ti kɔli.

Fãni ti uzu mɛndó mbi tengbi na Atɛmwɛ tɛ Yehova adundó ka da mɛ leta kĩ ndo bata na apalanga ti wali mɛ adũ ayangambi mɛ ta ala ka libala ma. Leta hɛ̃ndó mbi ya da kɔi kayi. Atɛmwɛ tɛ Yehova sɛ ti awe ndo gandó so bangɔ apalanga mɛndɛ̃ ti wali mɛndó e na la kayi. Lá kɔi mbi yendó tɛnɛngɔ tɛnɛ na la. Mbi yendó fangɔ na la tɛnɛ ti nvɛ̃nɛ mɛ Atɛmwɛ tɛ Yehova ndo ha. Na siriri zu ala hɛ̃ndó mbi gbinya ti hũnda tɛ mbi zu na lége ti Ngbangɔ. Mbi sepalandó na seliye tɛ la ti dede bɛ. Ni la li ya mbi ye ya ala manda mbi na Ngbangɔ.

Ta ningandó ma mbi mandandó lo kɔi kaya Ngbangɔ mɛ agbinyangbindó dungɔ lɛ ngɛ̃́ tɛ mbi. Na ngoi mɛndó mbi dɛ nyingambi ko, mbi ndo kpɛndó kwá. Kanda ala zandó mbi ya mbi hĩnga tɛnɛ tɛ Yezo mɛ aba songɔ na pɛ kwá! (Yoanɛ 5:28, 29) Mbi manda ngandó ya Nzapa ndo da bɛ lo na mbi. (1 Petro 5:7) Tɛnɛ mɛ kaya mbɛti ti Yirimia 29:11, agbɔ̃ndó bɛ mbi nvɛ̃ni, ni tɛnɛ ya: “‘Mbi hĩnga nzɔ̃ni dangɔ bɛ mɛ mbi na ni na lo tɛ ĩ,’ Yehova la tɛnɛ, ‘dangɔ bɛ ti siriri kanda ta ti pɛnɔ ma mɛ na hɛ̃ngɔ ĩ dungɔ lɛ ngɛ̃́ ti nzɔ̃ni na bí mɛ na gangɔ nga na nzɔ̃ dangɔ bɛ.’” Mbi tindó na nzɔ̃ dangɔ bɛ ti dungɔ na dungɔ lɛ ngɛ̃́ ti bwai na bwai ge lɛ sese mɛ na tingɔ Paradizo.​—Nzembo 37:29.

Atɛmwɛ tɛ Yehova fandó ya ala ndo ye mbi nvɛ̃ni. Na ngoi mɛndó mbi gwe bombi tɛ Atɛmwɛ tɛ Yehova ti fãni ti uzu ko, ala yambandó mbi nzɔ̃ni wa zo zu fa ngandó nzɔ̃ bɛ na mbage tɛ mbi! (Yoanɛ 13:34, 35) Ala ɔngbindó nvɛ̃ni na azi ti sambela tɛ mbi. Atɛmwɛ tɛ Yehova yambandó mbi abɛse du ya ta se ti dungɔ lɛ ngɛ̃́ tɛ mbi ndó nzɔ̃ni ma. Ala ndó na yɔngɔrɔ bɛ, ala ndo kpã ngandó lɛ la ndo mbi wa ala za ngandó mbi. Mbi hũndó ya mbi li kaya ndasewa kɔi tɛ ayata mɛ ndo yengbi nvɛ̃ni.

Mandangɔ Ngbangɔ zandó mbi ya mbi gbinyangbi aseliye tɛ mbi ti nɛngɔ ya ni mangbi na ndia tɛ Nzapa. Ta adundó woni ya mbi zia nyɔngɔ manga ma. Abia mɛndɛ̃ ndo lindó ya ta mbi zia nyɔngɔ bangɛ ma, na lo ni la mbi kɛ̃ndó mangɔ ni. Mbi ziandó gwengɔ afɛtɛ na anganda ti bí ti nɛngɔ ya ta mbi di nyɔ samba gbɔ̃ mbi ma. Mbi gi ndó akwa mɛ na aseliye ti nzɔ̃ni mɛndó ala za mbi ya ta mbi diri na ndo dungɔ lɛ ngɛ̃́ tɛ mbi ti gã ma.​—Masese 13:20.

Tony banda ngandó mandangɔ Ngbangɔ ndoni kɔi na Atɛmwɛ tɛ Yehova na ngoi niko. Na lo mɛ ya ala hɛ̃ndó gbinya ti ahũnda tɛ lo zu na lége ti Ngbangɔ ko, ni la lo yendó ya aye mɛ ni ndo manda adu bɛtani. Lo gbinyangbindó alo gba na ya dungɔ lɛ ngɛ̃́ tɛ lo: lo fandó mangbi na asiɔ azi mɛndó lo ndo dɔ nɔ na ala, wa lo zia ngandó nzingɔ nzi nga na nyɔngɔ bangɛ. Ti nɛngɔ ya e hɛ̃ Yehova dengɔ bɛ ko, e hũndó ya ayɔ ya e zia dungɔ lɛ ngɛ̃́ ti bi, wa a li ya nyi e mai na ndo kɔi mɛ nzɔ̃ni. E li ndó libala na 1982.

Ta bɛ mbi ndo li na se mɛndó mbi ndo gi hĩngangɔ atɛnɛ mɛ kaya Linɔngi ti Sinzili nga na Lamuká ma! a mɛ tɛnɛ tɛnɛ tɛ azi mɛ ala gbinyangbi alo ti ya dungɔ lɛ ngɛ̃́ tɛ la mɛ mbi ngandó na gwɛ̃ ti lingɔ ngaso. Selɛlo tɛ la a sandó ngunu bɛ mbi! a yɔndó ya mbi li kpengbani ti nɛngɔ ya ta mbi nzɛ̃ ma. Mbi lindó sambela hɛ̃ Yehova ya lo za mbi. Mbi na tony e mundó batisimɔ na Nzɛ ti Mbalambala 1982.

Mangbi ti nzɔ̃ni mɛndó mbi ti na ni na Yehova a batandó dungɔ lɛ ngɛ̃́ tɛ mbi. Mbi na Tony e hũndó se mɛ Yehova za na e na ya ngoi ti pɛnɔ. E mandandó se mɛ e lengbi ti kpãngɔ bɛ e ndo Yehova na ya ngoi ti pɛnɔ, wa e ndo hũ ya londo za wa lo ndo hɛ̃ nga ti lo kaya ndasewa tɛ e ngoi zu.​—Nzembo 55:22.

Mbi ndo ma dengɔ bɛ na ndenge mɛndó mbi za na nyi mbi ti kɔli na ti wali ya ala hĩnga Yehova nga ma mbi. Ndɛ lo mɛ mbi ndo ma nga dengɔ bɛ na ndenge mɛ mbindo hũ se mɛ ayangambi tɛ la ndo mai nga na ya mbilimbili.

Ta langɔ di dɛ kpɛ lɛ mbi na bí na lo ti bí mɛ na gangɔ bere na lo ti kwá ma. Mbi na Tony e ndo hɛ̃ tɛrɛ e zu na ya kwa ti gwengɔ bangɔ bombi kɔi kɔi na ya pɔsɔ zu ti sangɔ ngunu bɛ ayata. E ndo gwendó ndoni kɔi na ala ti fangɔ tɛnɛ na azi ya se ala du na loyengɔ ka mbage tɛ Yezo ko, ala na luangɔ dungɔ lɛ ngɛ̃́ ti bwai na bwai.