WANGƆ 11
Andia ti ya Ngbangɔ ndo za e ngasia?
1. Nda mɛ e na gwɛ̃ ya afa e na lége lo nɛ?
Ãngɛ mɛ andia ti ya Ngbangɔ ndo to e ya edu na ni nɛ?—NZEMBO 36:9.
Wa lingɔ e lo ɔ e na ndara. Lo ndo da bɛ lo na e nga ma se tɛ to ti songo. Fani mɛ ndɛ̃́, ta lo lindó e ya e liye na sɛ bɛ e nvɛ̃ni ma. (Yirimia 10:23) Ma se ko la nyingambi ndo du na gwɛ̃ ya awa dungɔ ni adɔ ni na nɔ̃ ko, e kwɛ́ nga na gwɛ̃ ya Nzapa dɔ e na nɔ̃. (Yisaya 48:17, 18) Lége mɛ andia ti ya Ngbangɔ ndo fa na e adu tisa mɛ alo ka tɛ Nzapa.—Di 2 Timɔte 3:16.
Andia tɛ Yehova ndo ha e na se ti dungɔ nzɔ̃ni na olo mɛ, ndo fa nga na e se ti lwangɔ na nzɔ̃ kpale ti kaka na ngoi mɛ na gangɔ. Adu nzɔ̃ni ya, e sepala ya Nzapa fa e na lége na lo mɛ ya lo la li e.—Di Nzembo 19:7, 11; Suma 4:11.
2. Andia ti Ngbangɔ adu nɛ?
Andia ti Ngbangɔ yani sɛ: ti uzu adu abɛta lo mɛ ti dungu ni nvɛ̃ni mɛ ta ndo gbiangbi ni ma. Ti sɛ ndo du na lo ti lo kɔi na mbɛni ngoi. (Kolimbola Mibeko 22:8) Nzɔ̃ bingangɔ li la za e ya e hĩnga ndia mɛ wa la elengbi ti kpãngɔ na kwa na ndo lo mɛ etengbi na ni. (Masese 2:10-12) Lɛlo kɔi, Ngbangɔ ndo wa e ya lɛ ngɛ̃́ adu tisa mɛ Nzapa hɛ̃́ e. Ndia ni ko alengbi ti dɔngɔ e na nɔ̃ ka lɛ kwa, ka ya da, nga na ngoi mɛ esi fɔnɔ̃. Ando to e ya edu na kpengba lɛ nga na ãngɛ.—Di Awa Pangɔ Kwa 17:28.
3. Akɔzo ndia sɛ la nɛ?
Yezo dikɔndó akɔzo ndia sɛ. Ti uzu afa nda mɛ edu ge tise: Hĩngangɔ Nzapa, yengɔ lo, lingɔ nga kwa ti mbili mbili hɛ̃ngɔ lo. Uzu ti hɛ̃́ngɔ nyɔ kwɛ́ ko, ale eda bɛ e na ndia ko ti uzu. (Masese 3:6) Azi mɛ ndo kpã ndia ko ka bɛ la ndo ti akwa Nzapa, ndo lwa bɛta dengɔ bɛ, ala nga na lwangɔ du ti kaka.—Di Matie 22:36-38.
Ndia ti sɛ ndo za e na mangbi tɛ e na azi mɛ ndɛ̃́. (1 Kɔrinto 13:4-7) Tɔndɔngɔ ni ndo hunda ya e manda se mɛ Nzapa ndo du du na azi.—Di Matie 7:12; 22:39, 40.
4. Andia ti ya Ngbangɔ ndo za e ngasia?
Andia ti ya Ngbangɔ ndo ha se mɛ songo ndo bombi nda sewa ndo ni kɔi. (Kɔlosɛ 3:12-14) Tɛnɛ tɛ Nzapa ndo bata nga nda sewa na lége ti hangɔ ala na mbɛni ndia mɛ ndɛ̃́ kɔi: ale due angbã buru na buru zu.—Di Ebandeli 2:24.
Se e dɔ nɔ̃ pɛko andia ti ya Ngbangɔ ko, alengbi ti batangɔ e na ya mi nga na bingangɔ li tɛ e. Lɛlo kɔi: Agbia kwa ndo ye tɛ la lá kwɛ́ awa kwa mɛ mbili mbili nga kpengbani ka lɛ kwa na lo mɛ ya ala ndo tɔndɔ Tɛnɛ tɛ Nzapa. (Masese 10:4, 26; Aebreo 13:18) Tɛnɛ tɛ Nzapa ndo ha nga e ya e sepala na aye mɛ alengbi, ekpã mangbi tɛ e na Nzapa ka uzu ti aye ti mi.—Di Matie 6:24, 25, 33; 1 Timɔte 6:8-10.
Kpãngɔ ndia ti ya Ngbangɔ na kwa alengbi ti batangɔ e ya edu na nzɔ̃ tɛrɛ. (Masese 14:30; 22:24, 25) Lɛlo kɔi, tɔndɔngɔ ndia tɛ Nzapa mɛ akɛ nyɔngɔ samba ɔngɔ ndoni ndo bata e ya ta e gã ngã ti wawa bere e kpi kwa ti kpekpese ma. (Masese 23:20) Yehova zi lége ya e nyɔ samba, kanda ale enyɔ na lége ni. (Nzembo 104:15; 1 Kɔrinto 6:10) Andia tɛ Nzapa ndo za nga e na wangɔ mɛ ni ndo wa na e ya e bata kwa tɛ e nga na bingangɔ li tɛ e. (Nzembo 119:97-100) Kanda se awa Kristo tɔndɔ ndia tɛ Nzapa ko, ta adu bo ti lwangɔ mbana gɛrɛ tɛ la nvɛ̃ni ma. Ala ndo li so ti gondangɔ Yehova.—Di Matie 5:14-16.
