Abrahama fandó na nyi lo Yisaka yengɔ Yehova nga na dungɔ na loyengɔ na ndo akapa tɛ lo. Kanda ngoi mɛndó Yisaka ti na bulu 25 ko, Yehova hũndandó Abrahama ya, lo li ye kɔi ti kpengbani. Ye mɛndó lo hũnda nɛ?

Nzapa tɛnɛndó hɛ̃ Abrahama ya: ‘Se mɔ ye, gwe ka kɔdɔrɔ ti Moria, kai hɛ̃ nyi mɔ bo kɔi mɛ mɔ ndo ye lo gba ngama mbeka ka ndo ngomba.’ Ta Abrahama hĩngandó nda mɛ Yehova hũnda lo ya, lo li ye ti ngaso ma. Abɛse ngaso ko, lo tɔndɔndó Nzapa.

Na ndapelele, Abrahama ná nyi lo Yisaka nga na awa kwa tɛ lo sɛ mundó lége ti gwengɔ ka Moria. Na pɛ nɔngɔ nɔ bi taa ko, ala hũndó ngomba ka yɔngɔrɔni. Abrahama yɔndó ka ti awa kwa tɛ lo ya, ala kũ ani na ngoi mɛ lo ná Yisaka gwe ti hɛ̃ngɔ mbeka. Lo tɛnɛndó hɛ̃ nyi lo ya, lo yɔ nzanze ti wá, wa Abrahama mundó zãma. Yisaka hũndandó to lo ya: ‘Ngasã ti zɔngɔ na mbeka ni wa?’ Abrahama gbinyandó ya: ‘Nyi mbi, Yehova na hɛ̃ngɔ e.’

Na ngoi mɛndó ala si ka ndo ngomba ko, ala lɛkɛndó ndo ti zɔngɔ na mbeka. Abrahama gbendó gɛrɛ Yisaka ná ti lo, wa lo kpãndó lo ka ndo ti zɔngɔ na mbeka.

Abrahama mundó zãma. Na mbala kɔi, angelo tɛ Yehova ilindó lo ka ndozu, wa lo pandó hɛ̃ lo: ‘Abrahama! Ta mɔ li nyi mɔ siɔni ma! Mbi ye ndɛ ya, mɔ ndo kpɛ Nzapa biani na lo mɛ ya, mɔ ye hɛ̃ngɔ nyi mɔ kɔi mbeka na lo tɛ  mbi.’ Abrahama hũndó ngasã gbaga kɔi mɛ agba kaya kɛkɛ. Lo zarandó Yisaka mbala kɔi wa lo hɛ̃ndó ngasã gbaga na se lɛ nyi lo.

Bandangɔ na bi niko, Yehova bandandó ilingɔ Abrahama ya, kwa ni. Mɔ hĩnga nda mɛndó Yehova ili lo ngaso? Na lo mɛ ya, Abrahama ndo lindó aye zu mɛ Yehova ndo yɔ ka ti lo, abɛse na ngoi mɛ ta lo ndo gbɔ̃ndó nda mɛ Yehova ndo hũnda ya, lo li ni ma.

Yehova dirindó na ndo kapa tɛ lo hɛ̃ Abrahama ya: ‘Mbi na sulungɔ mɔ, mbi na lingɔ ya, ayati mɔ ná atara mɔ ti gba.’ Lo ko ngandó kapa ya, lo na sulungɔ azi zu ti mbilimbili na lége tɛ atara lo.