Bulu ɔngɔ 400 na pɛ diringɔ kĩngɔ gbágbá ti Yeruzalɛmɛ fãni mɛndɛ̃ ko, kota nganga nzapa kɔi mɛ ili lo la Zekaria ná ya lo Elizabete ndo dundó dã na kɔdɔrɔ niko. Ala lindó libala ali bulu gba kanda ta ala dũndó nyi ma. Lá kɔi, na ngoi mɛndó Zekaria ndo zɔ ta yɔmbɔ ka ndo mɛ santo ka tepelo ko, angelo Gabriel sindó gbɛlɛ lo. Zekaria mandó mbɛtɔ kpengbani kanda Gabriel tɛnɛndó hɛ̃ lo ya: ‘Ta mɔ kpɛ mbɛtɔ ma. Mbi ga pa hɛ̃ mɔ nzɔ̃ pa mɛ alo ka tɛ Yehova. Ya mɔ Elizabete na dungɔ nyingambi kɔi ti kɔli wa ili lo na dungɔ Yoanɛ. Yehova pɔna lo ti lingɔ kwa ti ngbondoni.’ Zekaria hũndandó angelo ya: ‘Ngasia la mbi lengbi ti yengɔ tɛnɛ mɛ mɔ ndo tɛnɛ nɛ? Mbi ná ya mbi e ti abange ta elengbi ti dũngɔ nyingambi ma.’ Gabriel tɛnɛndó hɛ̃ lo ya: ‘Nzapa la to mbi ti nɛngɔ ya, mbi pa hɛ̃ mɔ nzɔ̃ pa olo. Kanda na lo mɛ ya mɔ kɛ̃ yengɔ tɛnɛ mɛ mbi tɛnɛ hɛ̃ mɔ ko, ta mɔ na tɛnɛngɔ tɛnɛ ma tee ka na dũngɔ nyingambi niko.’

Zekaria ningandó ka ndo mɛ santo ti tepelo ɔngɔ se mɛndó lo ndo ninga na ni gã. Ngbĩi, lo sindó wa azi mɛndó ndo kũ lo ka gɛgi ti tepelo ndo gindó hĩngangɔ ye mɛ li tɛrɛ lo. Kanda ta Zekaria ndo kokandó tɛnɛngɔ tɛnɛ ma. Lo ndo li bondó ajɛstɛ na ti lo. Ni la, azi gbɔ̃ndó ndani ya, Zekaria lo ti mangɔ nzɔ̃ pa kɔi mɛ alo ka tɛ Nzapa.

Elizabete mɛndó ngɔ wa lo dũ ngandó nyingambi ti kɔli ngama se mɛndó angelo tɛnɛ na ni. Akwa lo ná ayata lo gandó ti bangɔ nyingambi niko. Bɛ la dendó mawoma na lo tɛ Elizabete. Elizabete tɛnɛndó hɛ̃ ala ya: ‘Ili lo na dungɔ Yoanɛ.’ Ala tɛnɛndó hɛ̃ lo ya: ‘Ta zo kɔi ti ndasewa tɛ mɔ mɛ ili lo Yoanɛ da ma. Hɛ̃ lo ili to lo Zekaria.’ Kanda Zekaria nvɛ̃ni sundó tɛnɛ mɛ: ‘Ili lo la Yoanɛ.’ Bo na ngoi niko, Zekaria bandandó tɛnɛngɔ tɛnɛ fãni mɛndɛ̃! Azi zu ti Yuda mandó pandɛ tɛ nyingambi niko wa ala bandandó hũndangɔ tɛrɛ la na ndo ya: ‘Nyingambi olo na dungɔ nvɛ̃ni na?’

 Na gesi Zekaria sĩndó na nyingɔ vuru. Wa lo bandandó tɛnɛngɔ tɛnɛ ti prɔfesi: ‘Zia ya Yehova lua gonda. Lo kondó kapa hɛ̃ Abrahama ya, lo na tongɔ mobikisi kɔi, Masiya mɛ na songɔ e. Yoanɛ na dungɔ prɔfeta wa lo na lɛkɛngɔ lége tɛ Masiya.’

Ye kɔi ti kpɛ̃nɛ li ngandó tɛrɛ lo na mbage tɛ Maria mɛ nyita Elizabete. E na tɛnɛngɔ tɛnɛ ni na ya wangɔ ti gesi.