Omumvo kehe, ohatu pilinta Oombiimbeli niileshomwa omamiliyona tayi popi kombinga yOmbiimbeli. Ohatu tungu iitayimbelewa niinyanyangidho miilongo yimwe kombanda yevi, nohatu yi kaleka monkalo yi shi okutalwa. Omahala moka hatu gongalele kage shi gondilo, ihe ohaga monika nawa. Omahala ngoka ohagi ithanwa Iinyanga yUukwaniilwa. Openi nduno hatu adha iimaliwa?

Otse yene hatu ambidhidha iilonga yetu nosho wo aantu mboka haye tu pe omayambidhidho gopashimaliwa. (2 Aakorinto 9:7) Oshifo shetu shOshungolangelo shomomumvo 1879 osha tile: “Tse otwi itaala kutya JEHOVA ote ke tu kwathela, nomolwaashono ihatu hehela aantu iimaliwa,” nenge tu ninge ehanga lyapya. Sigo onena osho twi itaala ngaaka.

Ihatu gandja oshitimulongo, iigandjwa nokuumba ongalo. Ihatu futitha omayakulo ngoka haga gandjwa megongalo, yo iileshomwa yetu ihayi landithwa. Omayambidhidho ngoka hatu mono ohaga tumwa kiitayimbelewa. Uuna tatu uvitha nenge tatu longo yalwe megongalo, ihatu futwa. Ohatu iyamba wo okutunga omatungo getu. Omolwashike mbela? Shika otashi tsu kumwe noohapu dhaJesus ndhoka tadhi ti: “One mwa pewa oshindji omagano, gandjeni wo omagano.” (Mateus 10:8) Aauvithi yetu ayehe ihaya futwa. Muyo omwa kwatelwa mboka haya longo miitayimbelewa, moombelewa oonene niilyo yOlutuwiliki lwOonzapo dhaJehova.

Omayambidhidho ngoka hatu gandja, ohaga longithwa wo okukwathela ooitaali ooyakwetu uuna pwa holoka iiponga yopaunshitwe. Ohatu tungulula omagumbo gawo nomahala gokugongalela gaantu mboka ya dhengwa kiiponga yopaunshitwe. Ohatu ya kwathele wo niikulya, iizalomwa nekwatho lyopaunamiti. Aakriste mboka ya li ko omimvo 2000 nasha dha ka pita, nayo osho ya li haya ningi. —  Aaroma 15:26.