1. Otatu ka konakona kombinga yoshigongi shini shoshigwana shaKalunga, naashoka oshe eta po omapulo geni?

“THIKAMENI, mu hambelele OMUWA, Kalunga keni; mu hambeleleni sigo aluheluhe!” Noohapu ndhika dhituntula, oshigwana shaKalunga shonale osha li sha gongalekwa shi galikane pamwe egalikano ndyoka li li limwe lyomomagalikano omaleeleka ngoka ge li mOmbiimbeli. (Neh. 9:4, 5) Osha li sha gongala muJerusalem mesiku eti-24 lyomwedhi omutiheyali gwOshijuda, Tishri (Septemba/Kotoba), mo 455 K.E.N. Sho tatu tala kiiningwanima mbyoka ya li ya hingile kesiku ndyoka lyi ikalekelwa, ipula to ti: ‘Omukalondjigilile guni omwaanawa gwa li wo gwa ningitha oshiningwanima shoka shi ende nawa? Iiyilongomwa yilwe yini tandi vulu okwiilonga megalikano ndika lya longekidhikikika?’ — Eps. 141:2.

2. Aaisraeli oye tu tulila po oshiholelwa shini oshiwanawa poshigongi shawo, konima sho ya tungulula edhingililokuma lyaJerusalem?

² Aajuda oya adhika nale ya mana okutungulula edhingililokuma lyaJerusalem momwedhi ngoka gwa tetekele oshigongi shoka. (Neh. 6:15) Oshigwana shaKalunga osha li sha manitha iilonga mbyoka muule owala womasiku 52, nopo nduno osha li sha tsikile okugandja eitulomo lyokondandalunde kompumbwe yasho yopambepo. Onkee ano mesiku lyotango lyomwedhi omupe, Tishri, osha li sha gongala pamwe pehalandjandja lyaayehe shi pulakene kuEsra, pamwe nAalevi yalwe, taya lesha mokule Ompango yaKalunga noku yi yelitha. Omaukwanegumbo agehe, mwa kwatelwa ayehe mboka “ye na omimvo dha gwana noyu uvite ko” oya thikama noya pulakene “okuza kepito lyetango sigo omoshanga shomutenya.” Shoka kashi shi tuu oshiholelwa oshiwanawa kutse mboka kunena hatu kala pokugongala mIinyanga yUukwaniilwa moka muuwanawa! Ihe mbela pokugongala mpoka oho iyadha omathimbo gamwe omadhiladhilo  goye taga falwafalwa ngoye to tameke okudhiladhila iinima mbyoka kaayi na naanaa oshilonga? Ngele osho, tala ishewe koshiholelwa shAaisraeli yonale mboka kaaya li owala ya tula miilonga shoka yu uvu, ihe oya li wo ya lili molwaashoka ya li inaaya vulika kOmpango yaKalunga ye li oshigwana. — Neh. 8:1-9.

3. Aaisraeli oya li ya vulika kelombwelo lini?

³ Ihe ethimbo ndika kalya li ethimbo lyokuhempulula omayono montaneho. Molwaashoka olya li esiku lyoshituthi, olya li li na okukala ethimbo lyenyanyu melongelokalunga lyaJehova. (Num. 29:1) Onkee ano, Nehemia okwa lombwele oshigwana a ti: “Ngashingeyi indeni kaandjeni, mu dhane oshituthi. Topoleni iikulya nomaviinu naamboka yaa na sha. Esiku ndika olya yapulilwa OMUWA gwetu, onkee inamu yemata. Enyanyu ndyoka OMUWA te li gandja, nali mú kumike.” Shoka shi shi okupandulwa, oshigwana osha vulika, nesiku ndyoka olya li lya ningi ‘lyenyanyu.’ — Neh. 8:10-12.

4. Omitse dhomaukwanegumbo dhAaisraeli odha li dha ningi shike, noshike dha li dha mono oshindhindhilikwedhi mOshituthi shOmatsali shika?

⁴ Mesiku tuu ndyoka lya landula ko, omitse dhomaukwanegumbo odha li dha gongala dhi tale nkene oshigwana tashi vulu okutsa kumwe thiluthilu nOompango dhaKalunga. Sho ya konakona Omanyolo, oya mono kutya momwedhi omutiheyali, Tishri, omwa li mu na okukala Oshituthi shOmatsali nehulitho lyasho lyelongelokalunga okuza mo 15 sigo omesiku eti-22, onkee ano oya li ya tameke okuninga omalongekidho. Shoka osha li Oshituthi shOmatsali oshiwanawa kaaku na we nkene ngaa shi ihulilwe pethimbo lyaJosua, naashoka osha li she ya ‘nyanyudha noonkondo.’ Shoka sha li sha dhana unene onkandangala poshituthi shoka, osho kutya Ompango yaKalunga oya li ya leshwa montaneho “okuza kesiku lyotango lyoshituthi sigo okehulilo.” — Neh. 8:13-18.

5. Oshigwana shaKalunga osha li sha ningi shike manga Aalevi inaaye shi kalela po megalikano kuJehova?

⁵ Omasiku gaali sho ga piti konima yoshituthi, osha li ethimbo lyo opala kAaisraeli yi ihempulule omolwokwaavulika kwawo kOmpango yaKalunga. Ndika kalya li esiku lyokunyanyukwa. Pehala lyaashono, oshigwana shaKalunga osha li shi idhilike iikulya e tashi zala omahahi shoka shi li endhindhiliko lyoluhodhi. Niishewe, ongulonene oshigwana osha li sha leshelwa Ompango yaKalunga konyala uule wootundi ndatu. Omutenya ‘osha hempulula oondjo dhasho e tashi galikana Kalunga, OMUWA gwasho.’ Opo nduno Aalevi oya li ya kalele po oshigwana negalikano lyawo lya longekidhikikika. — Neh. 9:1-4.

6. Oshike sha li sha kwathele Aalevi ya galikane egalikano tali ti sha, naashika otashi tu longo shike?

⁶ Nopwaahe na omalimbililo, okulesha kwawo aluhe Ompango yaKalunga okwa li kwa kwathele Aalevi yi ilongekidhile egalikano ndika li na eityo. Oovelise omulongo dhotango odha gandja unene eitulomo kiilonga yaJehova nokomaukwatya ge. Moshitopolwa sha hupa ko shegalikano,  ‘esilohenda lyaKalunga enene’ olye endululwa nomwa popiwa wo sha yela kutya Aaisraeli kaya li ya gwana okuulukilwa esilohenda ndyoka. (Neh. 9:19, 27, 28, 31) Ngaashi naanaa Aalevi mboka ya li ya ningi, omagalikano getu kuJehova otaga ka kala wo ge li pethimbo noge na eityo ngele otwa kala hatu tedhatedha kOohapu dhaKalunga esiku kehe, tatu etha Jehova a popye natse manga inaatu galikana kuye. — Eps. 1:1, 2.

7. Aalevi oya li ya pula Kalunga shike, notatu ilongo shike mwaashika?

⁷ Egalikano ndyoka oli na owala eindilo limwe lyeifupipiko. Otali adhika moshitopolwa shahugunina shovelise 32, ndjoka tayi ti: “Kalunga, Kalunga ketu, ngoye omunene ngiini! Omunankondo nomutilithi shili! Uudhiginini woye otau gwanitha omauvaneko goye. Okuza mpoka aakwaniilwa yaAssur ye tu hepeke, sigo onena nokuli, otwa tala iihuna ngiini! Aakwaniilwa yetu, aawiliki yetu, aayambi yetu naahunganeki yetu, ootatekulu naantu yetu ayehe oya hepekwa. Dhimbulukwa, nkene twa mono iihuna!” Onkee ano, Aalevi oye tu tulila po oshiholelwa oshiwanawa shokuhambelela Jehova noku mu pandula tango manga inaatu ninga omaindilo getu gopaumwene megalikano.

8, 9. (a) Aalevi oya li ya tameke egalikano lyawo momukalo guni gweifupipiko? (b) Aalevi oya li ya popi koongundu dhaakwiita yomegulu dhopaali dhini?

⁸ Nokuli nonando egalikano lyawo olya li lya longekidhwa nawa, Aalevi mboka oya li aaifupipiki noya li ye wete kutya oohapu dhawo itadhi vulu okuulika thiluthilu kutya Jehova okwa gwana okuhambelelwa shi thike peni. Onkee ano, egalikano olya li lya tameke neindilo ndika lyeifupipiko kombinga yoshigwana shaKalunga, tali ti: ‘Naya hambelele edhina lyoye lya simana, nando ehambelelo lyopantu kali na mupondo gwasha.’ — Neh. 9:5.

⁹ Egalikano olya tsikile tali ti: “Ngoye OMUWA, ongoye awike OMUWA; ongoye wa shiti ewangandjo noonyothi dhomewangandjo [“ongundu yaakwiita,” NW]. Ongoye wa shiti evi nefuta naayihe yi li mo; ayihe owe yi pe omwenyo. Aanankondo yomegulu [“ongundu yaakwiita yomegulu,” NW] otaa ku inyongamene e taa ku simaneke.” (Neh. 9:6) Eeno, Jehova Kalunga okwa shita ewangandjo alihe, ndyoka li na omilalawili odhindjidhindji. Shoka oshikumithi sha fa shoka, okwa shiti kehe shimwe shoka shi li kevi lyetu ewanawa nokwe shi ninga tashi wapa opo iinima ayihe mbyoka yi li ko yi na omwenyo yi vule okukala nomwenyo, sha hala okutya, okukala tayi vulu okweeta po ishewe iinima yomaludhi gayo. Mboka ya li ya mono ayihe mbika aayengeli aayapuki yaKalunga, mboka taya vulu wo okwiithanwa ‘ongundu yaakwiita yomegulu.’ (1 Aak. 22:19, OB-1954; Job 38:4, 7) Kakele kaashono, aayengeli ohaya longo ehalo lyaKalunga neifupipiko mokutonatela aantu aalunde “mboka taa ka hupithwa.” (Heb. 1:14) Aayengeli inaye tu tulila po tuu oshiholelwa sha dhenga mbanda shokulongela Jehova twa hangana twa fa ongundu yaakwiita ya dheulwa nawa! — 1 Kor. 14:33, 40.

10. Oshike tatu ilongo munkene Kalunga a li u ungaunga naAbraham?

 ¹⁰ Shoka sha landula ko, Aalevi oya li yu ukitha eitulomo kunkene Kalunga a li u ungaunga naAbram, ngoka sho e na oomvula 99 a li natango kee na okanona nomukulukadhi gwe ontimbe, Sarai. Okuza mpoka opo Jehova a li a lundulula edhina lye li ninge Abraham, ndyoka tali ti “hekulu yiigwana oyindji.” (Gen. 17:1-6, 15, 16) Kalunga okwa li wo u uvanekele Abraham kutya oluvalo lwe olwa li talu ka thigulula oshilongo Kaanana. Olundji aantu ohaya dhimbwa shoka yu uvaneka, ihe Jehova hasho e li ngaaka. Ngaashi egalikano lyAalevi tali ti: “Ongoye, OMUWA Kalunga wa hogolola Abram e to mu piitha mo muUr shomuBabilonia; owa lundulula edhina lye, li ninge Abraham. Owe shi tseya kutya okwe ku inekela, e to hangana naye. Owe mu uvanekele, u mu pe evi lyAakaanana, . . . li ninge eliko lyoluvalo lwe. Owa gwanitha euvaneko lyoye, oshoka ngoye omudhiginini.” (Neh. 9:7, 8) Natse natu holele Kalunga ketu omuyuuki mokukala aluhe tatu gwanitha po oohapu dhetu. — Mat. 5:37.

11, 12. Yelitha kutya edhina lyaJehova otali ti shike nonkene shoka sha li shu ulikwa kunkene a li u ungaunga noluvalo lwaAbraham.

¹¹ Edhina Jehova otali ti “oha ningitha,” shoka tashi ti kutya Kalunga oha ningitha omauvaneko ge ga ninge goshili. Shika oshu ulikwa nawa munkene Kalunga a li u ungaunga noluvalo lwaAbraham sho lwa li muupika muEgipiti. Pethimbo mpoka, osha li tashi monika sha fa itaashi wapa oshigwana ashihe shi mangululwe sho shi lale Evi lyEuvaneko. Onkee ano, okupitila miiningwanima oyindji ya landulathana, Kalunga okwa li a ningitha euvaneko lye li ninge lyoshili, nokungawo oku ulike kutya okwa gwana okwiithanwa edhina ndyoka li ikalekelwa nolya simana, Jehova.

¹² Egalikano ndyoka lya nyolwa kuNehemia otali popi kombinga yaJehova tali ti: “Owa mono, nkene ootatekulu taa hepekwa muEgipiti; owa uvu onkugo yawo, sho taa kugile ekwatho pEfuta lyomanenge. Owa longo iinyengandunge we yi longele omukwaniilwa gwaEgipiti, nomalenga ge naantu yevi lye, oshoka owa li wa mono, nkene ya hepeke aantu yoye. Owa kolekitha nena esimano ndyoka u li na sigo onena. Aantu yoye owe ya longele ondjila mefuta e to ya endithile mo puukukutu. Oomboka ye ya tidhagana, owe ya undulile muule womeya, oya ka ningina mo ya fa omamanya mefuta lya pindjala.” Opo nduno egalikano olya tsikile ko tali popi kombinga yashilwe shoka Jehova a li a ningile oshigwana she: “Oya lala evi lyaKaanana; owa sindi aantu mboka ya kala mo.  . . Aantu yoye oya kwata po iilando ya kola, evi lyo ondoka, omagumbo guuyamba nomithima dha pandwa [momamanya], omiti dhomiolivi, omiti dhiiyimati niitsambe yomiviinu. Oya li ashihe shoka ya hala e taa ondoka; oya nyanyukilwa iiwanawa ayihe we yi ya pe.” — Neh. 9:9-11, 24, 25.

13. Jehova okwa li a sile ngiini oshimpwiyu ompumbwe yopambepo yAaisraeli, ihe oya li yi inyenge ngiini?

¹³ Opwa li oonkatu dhilwe odhindji dha landulathana ndhoka Kalunga a li a katuka a gwanithe po elalakano lye. Pashiholelwa, nziya konima sho Aaisraeli ya thigi po Egipiti, Jehova okwa kala te ya sile oshimpwiyu pambepo. Dhimbulukwa shoka Aalevi ya li ya ti megalikano lyawo kuKalunga, oya ti: “Pondundu Sinai owa kulukile pevi wa zi megulu; owa popitha aantu yoye e to ya pe oompango oombwanawa nomalongo gu uka.” (Neh. 9:13) Jehova okwa li a kambadhala okulonga oshigwana she opo shi kale sha gwana okukala sha humbata edhina lye eyapuki shi li oshithigululi shEvi lyEuvaneko, ihe osha li she etha iinima iiwanawa mbyoka sha li shi ilongo. — Lesha Nehemia 9:16-18.

14, 15. (a) Ongiini Jehova a li a sile oshimpwiyu pahenda oshigwana she oshilunde? (b) Otatu ilongo mo shike munkene Kalunga a li u ungaunga noshigwana she oshihogololwa?

¹⁴ Egalikano lyAalevi otali ulike komayono  gaali gokondandalunde ngoka Aaisraeli ya li ya ningi konima owala sho yu uvaneke pOndundu Sinai kutya otaya ka vulika kOmpango yaKalunga. Omolwomayono ngaka, oya li ya gwana okweethiwa ya se. Ihe egalikano otali tanga Jehova, tali ti: “Ngoye ino ya thiga po mombuga, oshoka esilohenda lyoye enene. . . . Moomvula omilongo ne owe ya gwanithile oompumbwe dhawo adhihe; . . . oonguwo dhawo inadhi kulupa, noompadhi dhawo inadhi zinda.” (Neh. 9:19, 21) Kunena, Jehova ohe tu pe wo kehe shimwe shoka twa pumbwa opo tu mu longele nuudhiginini. Inatu kala nando twa fa Aaisraeli omayuvi mboka ya sile mombuga molwaashoka ya li inaaya vulika noya li kaaye na eitaalo. Uushili owo kutya, iinima mbyoka oya “nyolwa, yi tu londodhe. Oshoka otu li methimbo, uuna ehulilo li li popepi.” — 1 Kor. 10:1-11.

¹⁵ Shinikitha oluhodhi, konima sho ya lala Evi lyEuvaneko, Aaisraeli oya li ya taamba ko elongelokalunga lya nyata lyiikalunga yaKaanana notali pula oomwenyo. Onkee ano, Jehova okwa li e etha iigwana yopuushiinda yi hepeke oshigwana she oshihogololwa. Sho shi iyele ombedhi, Jehova okwa li e shi dhimine po pahenda e te shi hupitha kaatondi yasho. Shika osha kala nokuningwa “ethimbo nethimbo.” (Lesha Nehemia 9:26-28, 31.) Aalevi oya hempulula ya ti: “Omumvo nomumvo owe ya londodha neidhidhimiko. Owa hwameke aahunganeki yoye, ye ya uvithile, ihe aantu yoye oya li oombolo, onkee we ya etha, ya sindike kiigwana yilwe.” — Neh. 9:30.

16, 17. (a) Konima sho ya zi muukwatwa, onkalo yAaisraeli oya li ya yooloka ko ngiini kwaandjoka yoohekulululwa sho ya thigulula petameko Evi lyEuvaneko? (b) Aaisraeli oya li ya hempulula shike, noya li yu uvaneke okuninga shike?

¹⁶ Nokuli naasho ya galuka muukwatwa, Aaisraeli oya li ishewe ya kwatwa kombepo yokwaavulika. Oshizemo osha li shini? Aalevi oya tsikile okugalikana: “Ngashingeyi otwa ninga aapika mevi ndyoka we li tu pe, mevi ndika lyo ondoka lyoku tu palutha. Eloolo lyeteyo lyalyo otali pewa aakwaniilwa mboka we ya tula po ye tu pangele, molwaashoka twa yono. . . . notu li momupya omunene!” — Neh. 9:36, 37.

¹⁷ Mbela Aalevi oya li tayu ulike kutya Kalunga ka li pauyuuki sho e ya ethele monkalo ndjika ondhigu? Hasho nando! Oya hempulula ya ti: “Owa longo nawa, sho we tu geele; owa kala omudhiginini, nando twa yono.” (Neh. 9:33) Opo nduno, egalikano ndika kaali shi owala lyopaumwene olya li lya hulitha neuvaneko tali zi komutima kutya oshigwana otashi ka vulika kOmpango yaKalunga. (Lesha Nehemia 9:38; 10:29) Hugunina, aawiliki Aajuda 84 oya li ya shaina ondokumende. — Neh. 10:1-27.

18, 19. (a) Otwa pumbwa shike opo tu vule oku ka hupa tu ye muuyuni uupe waKalunga? (b) Katu na okweetha okugalikana kombinga yashike, nomolwashike?

¹⁸ Otwa pumbwa okupewa uutekuvuliko kuJehova, opo tu kale twa gwana okuya muuyuni we uupe wuuyuuki. Omuyapostoli Paulus okwa li a pula a ti: “Oku na tuu omunona ngoka ihaa dhengwa kuhe?” (Heb. 12:7) Ohatu ulike kutya ohatu taamba ko ewiliko lyaKalunga moonkalamwenyo dhetu mokukala aadhiginini miilonga ye nokweetha ombepo ye yi tu zule. Ngele otwa yono sha kwata miiti, otatu vulu okukala nuushili kutya Jehova ote ke tu dhimina po ngele otwi iyela ombedhi nokutaamba ko uutekuvuliko neifupipiko.

¹⁹ Masiku, Jehova ote ki iningila edhina lya simana shi vulithe pungaashi a li e li iningile sho a hupitha Aaisraeli muEgipiti. (Hes. 38:23) Ngaashi naanaa oshigwana she shonale sha li sha thigulula Evi lyEuvaneko, Aakriste ayehe mboka hayi idhidhimike ye li aalongeli yaJehova aadhiginini otaya ka thigulula omwenyo muuyuni uupe waKalunga wuuyuuki. (2 Pet. 3:13) Netegameno ndyoka ekumithi lye tu tegelela, inatu etha po okugalikana opo edhina lyaKalunga lya simana li yapulithwe. Oshitopolwa tashi landula otashi ka kundathana kombinga yegalikano lilwe ndyoka tu na okukala metsokumwe nalyo, opo tu mone omalaleko nuuyamba gaKalunga ngashingeyi nosho wo monakuyiwa.