OSHINYANDWA shika kashi shi “okudhimbiwa”! Oyendji osho ya li ya popi ngaaka sho ya tala oshinyandwa shedhina “Creation Drama.” Oshinyandwa shoka osha li sha simanekitha edhina lyaJehova noonkondo konima yokathimbo owala manga Epangelo ekwanyanya lyaHitler inaali tameka okuhepeka aapiya yaJehova muEuropa. Ihe mbela oshinyandwa shoka osha li naanaa kombinga yashike?

Mo 1914, aapiya yaJehova moombelewa oonene moBrooklyn shaNew York, U.S.A., oya li ya pititha oshinyandwa shedhina “Photo-Drama of Creation.” Osha li shi na uule woowili hetatu, nomathano tagi inyenge ge li melandulathano. Omathano ngoka oga li ge na omalwaala noga li hage endele pamwe nomawi. Oshinyandwa shoka osha li sha talika kaantu omamiliyona muuyuni awuhe. Mo 1914, omwa li mwa pitithwa natango oshinyandwa oshifupi hashi ithanwa “Eureka Drama.” Ihe mo 1920 nasha, iilongitho mbyoka ya li hayi longithwa okuulika iinyandwa, ookino noofilima ndhoka oya li ya kulupa noonkondo. Kakele kaashono, aantu oyendji oya li ya hala okutala iinyandwa mbyoka. Pashiholelwa, aakalimo yomuLudwigsburg shi li mOndowishi, oya li ya pula kutya “oshinyandwa ‘Photo-Drama’ otashi ka talika ishewe uunake?” Aapiya yaJehova oya li nduno ye na okuninga po shike?

Opo aantu ya tale iinyandwa mbyoka, mo 1920 nasha, aakalelipo yaBetel, moMagdeburg, shi li mOndowishi, oya li ya landa oofilima niikwa niipangitho yilwe komahangano gokukundaneka muParis shaFulaanisa nosho wo komahangano galwe giikwamathano ge li moLeipzig nosho wo moDresden. Iilongitho mbyoka oya li ya longithwa pamwe naambyoka iikulu yi li monkalo ombwanawa, yi kwathele aantu ya tale iinyandwa.

Omumwatate Erich Frost, ngoka a li e na oshipewa shokuhika omusika, okwa li a toto po omusika yi kale tayi endele pamwe noofilima nosho wo niinyandwa sho tayi talwa. Oohapu dhoshinyandwa odha li dha kuthwa membo lyetu lyedhina Creation. Shoka osho sha ningitha oshinyandwa “Photo-Drama” shi lukwe edhina epe “Creation Drama” sho sha ningululwa.

Oshinyandwa shoka oshipe osha li shi na uule woowili hetatu, shi thike pamwe noshinyandwa shedhina, “Photo-Drama.” Osha li hashi ulikwa lwiikando, oongulohi dha landulathana. Osha li shi na uuyelele tawu hokitha wu na ko nasha nomasiku geshito, osha li wo sha kwatela mo ondjokonona yopaMbiimbeli nosho wo yiinima yomuuyuni, nosha li shu ulike kutya omalongelokalunga giifundja inage etela aantu uuwanawa washa. Oshinyandwa “Creation Drama” osha li shu ulikwa muAustria, muLuxemburg shi li moNdowishi nosho wo moSwitzerland, nosha li natango shu ulukilwa aapopi yOshindowishi momahala galwe.

Omumwatate Erich Frost okwa ti: “Pethimbo oshinyandwa tashi talwa, onda li nda ladhipike mboka twa li nayo, unene tuu mboka ya li haya hiki iihikomwa, opo ya longithe okathimbo kontumba ye ende omukweyo nomukweyo, ya pe aakalipo omambo nosho wo uumbo. Kungeyi, otwa  gandja iileshomwa oyindji shi vulithe mbyoka twa li hatu gandja ngele tatu ende egumbo negumbo.” Omumwatate Johannes Rauthe, ngoka a li hu ulukile aantu oshinyandwa moPoland nosho wo moshilongo shoka hashi ithanwa kunena Czech Republic, ota ti kutya aakalipo oyendji oya li haye ya pe oondjukithi dhawo ye ke ya talele po. Otwa li hatu yi kaantu mboka nokuninga nayo oonkundathana tadhi hokitha dha kankamena kOmbiimbeli.

Mo 1930 nasha, uuna oshinyandwa “Creation Drama” tashi talwa, oshinyanga osha li hashi kala shu udha ndo, naantu mondoolopa oya li owala haya kala taya popi Oonzapo dhaJehova. Mo 1933, aantu konyala ye thike pomiliyona yimwe mOndowishi, oya li ya tala iinyandwa mbyoka ya longekidhwa koshitayimbelewa moshilongo shoka. Omumwameme Käthe Krauss okwa ti: “Opo tu ka tale Oshinyandwa omasiku agehe gatano, otwa li hatu ende ookilometa omulongo okuya nomulongo sho tatu galuka, tatu pandakana momakuti nokupita miikulundundu nomomalusilu.” Omumwameme Else Billharz okwa ti: “Oshinyandwa ‘Creation Drama’ osha li sha kwathele ndje ndi tunge ekankameno lyokukala ndi hole oshili.”

Omumwatate Alfred Almendinger, okwa hokolola a ti kutya sho yina a li a tala Oshinyandwa, “okwa li a kumwa noonkondo e tashi mu ningitha a lande Ombiimbeli ye nokukonga mo uutumbulilo ‘omulilo gweyogolitho.’” Molwaashoka ine wu mona mo mOmbiimbeli, okwe etha po okuya kongeleka nokonima okwa ninginithwa. Omumwatate Erich Frost okwa ti: “Aantu oyendjiyendji oya li ye ya moshili konima sho ya tala oshinyandwa ‘Creation Drama.’”—3 Joh. 1-3.

Momimvo ndhoka sho aantu taya tala oshinyandwa “Creation Drama,” ongundu yaNazi oya kala tayi nkondopala muEuropa nokumona aayambidhidhi oyendji noya li tayi piyaganeke. Petameko owala lyomumvo 1933, iilonga yOonzapo dhaJehova moNdowishi oya li yi indikwa. Okuza mpono sigo opehulilo lyIita Iitiyali yUuyuni mo 1945, aapiya yaJehova moEuropa oya kala nokuhepekwa nonyanya. Omumwatate Erich Frost okwa li a tulwa mondjedhililo uule womimvo hetatu lwaampono. Ihe okwa li a mangululwa mo nokonima okwa ka longa moBetel muWiesbaden, shi li mOndowishi. Osha li nawa lela sho oshinyandwa shoka itaashi dhimbiwa hashi ithanwa “Creation Drama” sha li she ya pethimbo, opo shi ladhipike Aakriste oyendji mboka ya li ya hepekwa omolweitaalo lyawo pethimbo lyIita Iitiyali yUuyuni.—Uuyelele mbuka owa za mondjokonona yOonzapo dhaJehova moNdowishi.