AAMWATATE naamwameme oyendji mboka monakuziwa ya tembukile kiilongo yilwe omolwuuhupilo, ngashingeyi oya galukila kiilongo yawo. Ohaya tembukile komahala hoka ku na ompumbwe onene yaauvithi, omolwohole yawo yokuhola Jehova nosho wo aantu ooyakwawo. (Mat. 22:37-39) Aamwatate naamwameme mboka oya li ye na okuninga omaiyambo geni, naJehova okwe ya yambeke ngiini? Opo tu shi tseye, natu kundathaneni kombinga yoshilongo Kamerun, shoka shi li muuninginino waAfrika.

Mo 1998 omumwatate gwedhina Onésime okwa tembuka mo moshilongo shawo, Kamerun. Okwa kala kondje yoshilongo uule womimvo 14. Esiku limwe pokugongala oku uvu po ethaneko kombinga yiilonga yokuuvitha. Omupopi okwa ti: “Ngele ookuume yaali oya li taya yulu oohi, ihe gumwe okwa li ta kwata odhindji dhi vule dhamukwawo, mbela ngoka a li ta kwata oonshona ita ka yula mpoka pu na mukwawo?”

Ethaneko ndyoka olya kwathele Onésime a mone kutya okwa pumbwa okushuna koKamerun, hoka ku na aantu oyendji ye na ehalo lyokukonakona Ombiimbeli. Ihe okwa li e na omalimbililo gontumba. Mbela ota ka vula ngaa okwiigilila natango onkalo yokoKamerun konima sho a kala e li kondje yoshilongo ethimbo ele? Opo a mone ngele ote ke shi vula, tango Onésime okwa ka talela po koKamerun uule woomwedhi hamano. Opo ihe, mo 2012, okwa tokola a tembukile koKamerun.

Onésime ota ti: “Onda li ndi na okwiigilila natango uupyu womoKamerun nosho wo onkalo yamo. Onda li ndi na wo okwiigilila okukuutumba kiipundi yiipilangi mOshinyanga shUukwaniilwa. Ihe sho nda kala tandi gandja eitulomo kokugongala inandi kala we tandi ipula niipundi iiwanawa mbyoka ndi igilila.”

Mo 2013, Onésime okwa hokana Géraldine, ngoka a li a kala koFulaanisa uule woomvula omugoyi, e ta galukile koKamerun. Jehova okwa li e ya yambeke ngiini sho ya pititha komeho okulonga ehalo lye? Onésime ota ti: “Otwa li twa yi kOsikola yAauvithi yUukwaniilwa, e tatu ka longela koBetel. Omumvo gwa zi ko, megongalo lyetu omwa ninginithwa aakonakonimbiimbeli ye li 20. Ngashingeyi ondi uvite ndi li mehala ewanawa ‘nokuyula oohi.’” (Mark. 1:17, 18) Géraldine okwa gwedha ko a ti: “Onda mona omalalekonuuyamba ogendji inaandi shi tegelela.”

Judith okwa li a tembukile koAmerika, ihe okwa li a hala okutamununa mo uukalele we. Okwa ti: “Ngele nda ka talela po koKamerun onda li handi lili uuna ndi li pokushuna, molwaashoka onda li tandi thigi po aantu mboka nda tameke okukonakona nayo Ombiimbeli.” Nonando ongawo, Judith okwa kala ta kakadhala okutembukila koKamerun.  Okwa li e na iilonga hayi futu nawa mbyoka ya li hayi mu kwathele a fute epango lyatate gwe ngoka e li koKamerun. Ihe Judith okwi inekele muJehova, e ta tembukile koKamerun. Okwa zimine kutya omathimbo gamwe oha kala a yuulukwa onkalamwenyo ombwanawa ndyoka a li e na sho a li koAmerika. Okwa li a galikana Jehova e mu kwathele i igilile onkalo ndjoka ompe nokwa li wo a kwathelwa ketsomukumo ndyoka a li a pewa komutonatelishikandjo nomukulukadhi gwe.

Uuna Judith ta dhiladhila kwaashoka sha ningwa po sho a galukile koKamerun, okwa ti: “Muule owala woomvula ndatu, onda kwathele aantu yane ya ninginithwe.” Judith okwa ningi omukokolindjila i ikalekelwa. Kunena oha longo pamwe nomusamane gwe, Sam-Castel, miilonga yuutonatelishikandjo. Ihe oshike sha ningwa po kombinga yatate gwaJudith? Judith naapambele ye oya mono oshipangelo moshilongo shilwe, moka tate gwe a li a tandwa oshali. Etando lyahe olya li lye ende nawa.

Omumwatate gwedhina Victor okwa li a tembukile koKanada. Konima sho a lesha Oshungolangelo yi na oshitopolwa kombinga yelongo lyopombanda okwa tameke okwiipula kombinga yelongo ndyoka a li a hala. Okwe etha po elongo lyopombanda, e ta hogolola okuya kosikola yopaungomba. Okwa ti: “Okuya kosikola ndjoka okwa kwathele ndje ndi mone iilonga mbala, nondi vule okukokola ondjila.” Lwanima Victor okwa hokana Caroline, noya ka talela po koKamerun. Sho ya ka talela po oshitayimbelewa, aamwatate yamwe oya li ye ya ladhipike ya tale ngele otaya vulu okulongela moKamerun. Victor ota ti: “Katwa li tu na etompelo lyokutinda ehiyo ndyoka notwa li tatu vulu oku li taamba ko, molwaashoka otwa li twa kaleke onkalamwenyo yetu paunathangwa.” Nonando uukolele waCaroline kawa li nawa, oya tokola ya tembukile koKamerun.

Victor naCaroline oya ningi aakokolindjila yondjigilile, opo ya kwathele mokuuvithila aantu mboka tayu ulike ohokwe. Petameko oya li ya pungula iimaliwa ya gwana, nokaya li ya pumbwa iilonga yokwiikongela omboloto. Konima yaashono oya yi ya ka longe koKanada uule woomwedhi oonshona, naashoka oshe ya kwathele ya galukile koKamerun ya tsikile okukokola ondjila. Omalalekonuuyamba geni ya li ya mono? Oya li ya hiti Osikola yAauvithi yUukwaniilwa e taya ningi aakokolindjila yi ikalekelwa, nongashingeyi oye li miilonga yokutunga. Victor ota ti: “Okukaleka onkalamwenyo yetu paunathangwa okwe tu kwathela tu ikolelele muJehova, nokwa kala te tu kwatha.”

Mo 2002, Alain, ngoka a li omunasikola kouniveesiti moNdowishi, okwa li a lesha okafo Aagundjuka otamu ka longitha ngiini onkalamwenyo yeni? Uuyelele mboka wa li mokafo hoka owe mu inyengitha i itulile po omalalakano omape. Mo 2006, okwa yi kOsikola yOkudheula Aakalele, nokwa li a tuminwa koKamerun, koshilongo hoka a valelwa.

Alain okwa li a mono iilonga moKamerun mbyoka a li owala ha longo omasiku gamwe. Lwanima okwa mono iilonga hayi futu nawa, ihe okwa li a limbililwa ngele ota ka kala ngaa e na ethimbo lya gwana lyokuya muukalele ngaashi shito. Onkee ano, sho a pewa oshinakugwanithwa a kale omukokolindjila i ikalekelwa, okwe shi taamba ko kaapu na okukakadhala. Omuhona gwe okwa gwedhele ondjambi ye, opo andola a tsikile oku mu longela, ihe Alain okwa kakatele etokolo lye. Lwanima Alain okwa hokana Stéphanie, ngoka a kala ha zi moFulaanisa ethimbo ele. Mbela omashongo geni a li a taalele sho a tembukile koKamerun?

 Stéphanie ota ti: “Onda tameke okweehama, ihe onda mono epango, e te kala nawa.” Aaihokani mboka oya li ya lalekwa nuuyamba omolweidhidhimiko lyawo. Alain ota ti: “Sho twe ku uvithila komukunda gwokokule hagu ithanwa Katé, otwa adha ko aantu yontumba ya hala okukonakona Ombiimbeli. Lwanima, otwa li twa vulu okukonakona nayo okupitila mongodhi. Yaali yomaakonakoni mboka oya li ya ninginithwa, e ta pu totwa ongundu yaauvithi.” Stéphanie okwa gwedha ko a ti: “Kapu na enyanyu tali vulu okuyelekwa nokukwathela omuntu a ninge ehumokomeho noku thike poshitsa shokwiiyapulila Jehova. Okulongela moshilongo muka, okwe tu etela enyanyu enene.” Kunena, Alain naStéphanie oye li miilonga yuutonatelishikandjo.

Gisèle okwa ninginithwa manga a li kosikola yuundohotola koItalia. Okwa li a fuulwa konkalamwenyo yanathangwa yaaihokani mboka ya li taya konakona naye Ombiimbeli, nokwa li a hala okutamununa mo uukalele we. Onkee Gisèle okwa ningi omukokolindjila gwondjigilile, omanga ta mana osikola ye.

Gisèle okwa li e na ehalo lyokulonga oshindji miilonga yaJehova koKamerun, ihe okwa li e na omalimbililo. Ota ti: “Onda li ndi na okweetha po uukwashigwana wandje waItalia nokuthiga po ookuume kandje naakwanezimo mboka ya li haya zi moItalia.” Nonando ongawo, muMei 2016, Gisèle okwa shuna koKamerun.

Lwanima, okwa hokanwa kuLéonce, noya lombwelwa koshitayimbelewa ya tembukile kuAyos, ondoolopa ndyoka ya li yi na ompumbwe yaauvithi.

Onkalamwenyo muAyos oya li ngiini? Gisèle ota hokolola ta ti: “Olundji kamwa li hamu kala olusheno, nokatwa li hatu vulu okunwetha oongodhi dhetu. Olundji oongodhi dhetu kadha li hadhi longo. Ondi ilongo okuteleka pondje, notwa li hatu yi nuutololi tu na ootoshe tu ka teke omeya uusiku, molwaashoka ethimbo ndyoka kothithiya ihaku kala aantu oyendji.” Oshike sha li sha kwathele aaihokani mboka yi idhidhimike? Gisèle ota ti: “Ombepo yaJehova, kuume kopandjokana e li nawa, etsomukumo nosho wo ekwatho lyopashimaliwa ndyoka omathimbo gamwe twa li hatu pewa kaakwanezimo nookuume ketu.”

Mbela Gisèle okwa nyanyukwa ngaa sho a galukile koshilongo shawo? Okwa ti: “Eeno, osho lelalela! Otwa li twa taalele omathimbo omadhigu notwa li hatu kala twa teka omukumo omathimbo gamwe, ihe sho twa kala kaatu uvite we ngawo, ngame nomusamane gwandje otwa ningi shoka twa li tu na okuninga. Otwi inekela muJehova notu uvite twa hedha popepyeelela naye.” Léonce naGisèle oya li ya hiti Osikola yAauvithi yUukwaniilwa, nongashingeyi oye li aakokolindjila yi ikalekelwa yopakathimbo.

Ngaashi owala aayuli yoohi hayi idhidhimikile oonkalo dha yoolokathana, opo ya kwate oohi odhindji, mboka haya galukile kiilongo yawo ohaya ningi omaiyambo, opo ya kwathele mboka ya hala okupulakena ketumwalaka lyUukwaniilwa. Kapu na omalimbililo kutya Jehova ita dhimbwa iilonga yaauvithi mbaka haya longo nuudhiginini mokusimanekitha edhina lye. (Neh. 5:19; Heb. 6:10) Ngele oho zi kondje yoshilongo, ihe koshilongo hoka wa valelwa oku na ompumbwe yaauvithi, mbela ito vulu okugaluka? Ngele owe shi ningi, Jehova ote ke ku yambeka. — Omayel. 10:22.