Ik bün uptrekt in ain arm stel in Montreal stad. As ik 6 månat har is mij papa doodbleewe. Weegen dit mijn mama hät dat müst ales oiwer sich alaine häwe. Wij wäire 8 kiner un ik wäir dai jüngst.

Solang as ik groot ware däir, bün ik sër gewaldig woore un däir drogas benutse un däir gild were un ik har ümgang mit slechte lüür. As ik 10 jår har, dun häw ik klaine daile måke for dai huure un for dai wat gild borge mit groot sinse. Ik häw mij soo dul anwent laige un dai andrer bedraige dårweegen däire dai lüür ales måke wat ik wul. Un dit ales däir mij sër gefale!

As ik 14 jår har, ik däir sër gaud dai lüür al bedraige. Ik däir dai armrings, dai uure un dai fingerrings gans bilig kööpe un wen ik dat forkööpe däir, däir ik dat soo måke as wen dat schijr guld wäir. Ik däir dat forkööpe upe ruu un üm dai shoppings rümer. Ik däir mij sër bewunre woo dat licht wäir rasch gild fordaine mit dai andrer bedraige. Ais, häw ik 10 duusend dólares fordaint in bloos air dag!

As ik 15 jår har, bün ik ruuterschikt woore fon dai schaul woo ik wåne däir. Ik häw anfånge slåpe upe ruu, ine huus fon air woo ik ümgang mit har urer irgends air anerd stel.

Weegen dai forkërd daile wat ik måke däir, däir dai poliss feelmåls mij uutfråge. Ik bün nij ais inspuunt woore weegen ik däir nij ais wat forkööpe wat ståle woore wäir. Oft däir ik düür multas betåle weegen dai forkërde daile wat ik måke däir, soo as dai lüür bedraige, loigen fortele taum wat dårmit krijge un wat forkööpe ån dai papijr häwe dårtau. Kair däir mij ängste, dårweegen däir ik streng fortele mit dai lüür taum sai betåle dat wat sai schüülig wäire taum dai wat gild borge däire mit hoog sinse. Dat wäir gefärlig, dårweegen güng ik ni åne wafen. Öftens däir ik uk arbëre mit grup lüür wat sër gefärlig wäire.

Dai airst mål wat ik höört häw oiwer Jehovaas Tüügen, har ik bloos 17 jår. Ik däir mit mijne bruud t’hoopwåne wat anfånge har dai Bijbel studijre mit Jehovaas Tüügen, åwer däir mij ni gefale dat wat dai Bijbel säge däir oiwer wosoo wij leewe muite. Dun, häw ik dat uutmåkt mit dai bruud woo ik wåne däir un bün t’hooptrekt mit ain anerd fruug wat ik al kene däir.

Åwer dës bruud hät uk anfånge dai Bijbel studijre mit Jehovaas Tüügen! Fon dun an, sin dai daile aners woore. Ik häw mij bewunret as wosoo eer leewend aners woore is nå dat sai anfånge hät dai Bijbel studijre. Nuu, däir sai mër gaurigkët un geduld mit mij wijse. Ik häw annåme hengåe nå ain forsamlung fon Jehovaas Tüügen. Ik bün gaud upnåme woore for fornünftig un gaure lüür. Dai lüür dår, wäire gans aners as dai lüür woo ik mit gewoont wäir t’hoop sin! As ik klain wäir mijn familg hät mij nij ais weese lijb un gaurigkët. Dai gaurigkët wat Jehovaas Tüügen weese häwe, wäir grår dat wat ik sër gërn häwe wul. As sai sich anbåre häwe taum mij dai Bijbel lëre, häw mit frööligkët annåme.

Wat ik fon dai Bijbel lëre däir, mit sicherhët hät mij leewend rert. Weegen dat ik speele däir taum gild krijge, har ik schulden wat oiwer 50 duusend dólares wäire. Taum dai betålen, häw ik un twai fründ ain steelen mit gewald oos uutdacht. Woo gaud dat mij lëd dåe hät. Weegen mijn fründ häwe dårmit foirwärtsgåe un air is doodmåkt woore un dai anerd is inspuunt.

Ik bün bijbleewe dai Bijbel lëre un ik häw saie dat ik feel ümstelen måke müst. Ik häw saie wat stäit in 1 Coríntios 6:10: “Dai spitsbuube, dai wat maine sai häwe ais nij naug un wile ümer mër häwe, dai wat taufeel drinke, dai wat andrer uutschimpe un dai wat andrer bedraige, daue ni God sijne Regirung ärbe.” As ik dës spruch leest häw, ik häw hüült, weegen ik häw saie wofeel slechte daile ik måke däir. Ik häw forståe dat ik feel ümstelen måke müst. (Romanos 12:2) Ik wäir gewaldig un slim, un mij gans leewend wäir loigen.

Åwer ik häw uk fon dai Bijbel lërt dat Jehovaa barmhärtsig un forgeewig is. (Isaías 1:18) Ik däir sër beere dat Jehovaa mij helpe schul dai ümstelen måke wat nöörg wäire. Mit sijn hülp häw ik dai ümstelen måkt kreege. Dai haupt dail dårtau is wääst as ik un mijn bruud oos forfrigt häwe.

As ik 24 jår har, wäir ik al forfrigt un har al 3 kiner. Nuu, däir ik bruuke ain fornünftig arbëd. Åwer ik har ni feel ine schaul lërt un har kaim wat gaud oiwer mij fortele küün. Nog air mål, häw ik sër dul tau Jehovaa beert. Dun, bün ik loosgåe taum ain arbëd suike. Ik däir säge dat ik mij leewend ümstele wul un aine ërlig arbëd häwe. Wekmåls ik däir uutdüüre dat ik dai Bijbel lëre däir un wul ain beeter mësch sin. Feel wule mij ni arbëd geewe. In ain stel häw ik genau sägt woo mijn leewend wääst wäir. Dai mësch hät mij sägt: “Ik wait ni woweegen, åwer air dail däit mij säge dat ik mut dij anneeme.” Ik bün mij sicher dat dit wäir dai antwoort tau mijn beeren. Mite tijd ik un mijn fruug häwe oos tauwe låte soo as Jehovaas Tüügen.

Ik dau hüüt leewe weegen ik måk wat dai Bijbel inlërt. Ik häw ain fain familg. Un weegen dat ik mij sicher bün dat Jehovaa mij forgeewt hät, häw ik freere in mijn leewend.

Al 14 jårelang dau ik up dai gans tijdlang dai andrer helpe lëre wat dai Bijbel inlërt. Ain pår tijdlang trööguut mijn fruug hät uk anfånge in dës arbëd. In dai lätste 30 jår, häw ik hulpe kreege 22 lüür wat t’hoop mit mij arbëre daue Jehovaas Tüügen ware. Ik dau nog hengåe ine shoppings, åwer ni taum dai lüür bedraige, bloos taum eer fortele oiwer mijne gloobe. Nuu wil ik eer wat geewe: dai schöön hofnung taum leewe in dai nijg wild woo dai lüür frai sin fon dai wat bedraige. (Salmo 37:10 un 11)