KO MAKORE akawanda, Vaiziraeri vainga no cirovejeso co kupira mare kuti vabesere kunamata ko cokwadi. Mu njiku ja Jesu, Vajudha vaidikana kushaba zviro zvakawanda, izvi zvaiita kuti upenyu hwavo unese maningi.

Kuitira kubesera mu tabhernakeri po kufamba ko nguva mu themberi, vanarume vo Cijudha vaidikana kushaba madrakima maviri. Mu njiku ja Jesu mushabo uu, waishandiswa inga mupiro kuitira kubesera themberi yakavakwa ndi Herodhi. Vajudha vamweni vakavhunjisa Pedhru kuti Jesu waishaba kana kuti haiwa. Jesu wakananga kuti azvizivi kushata kushaba. Ngo kudaro, Jesu wakavhunja Pedhru kwaizowanira zingwenjere ro sirivha kuti ashabe.—Mateu 17:24-27.

Vandhu va Mwari vaidikanazve kupa cogumi co zviro zvovaikotora no cogumi co mare. (VaLevi 27:30-32; Bziverengo 18:26-28) Vatungamiriri vo zviara vainanga kuti vandhu vaidikana kushaba ngo mushovo wese wo masakani, kubatanijavo “masakani o minti, masakani o dhiri no mbeu yo kumini.” Jesu aacaishora vandhu vaipa cogumi, asi iyena wakavhisa pambhene maitiro akashata ainga no Vafarisi no vashabisi ngo pamusoro po cogumi.—Mateu 23:23.

Pa mukuvo wondhowo, Vajudha vaidikanazve kushaba zviro zvakawanda kuna Varoma, avo vaivatonga pa mukuvo wondhowo. Inga muezaniso, vaya vainga no minda javo vaidikana kushaba ngo mare kana ngo zvavairimaro. Zvinovoneka kuti mutengo wovaidikanaro kushaba waiguma pa 20 kana 25 o mapurusento. Cimwenizve, Mujudha umwe nga umwe waidikanazve kushaba. Uu ndiwona mushabo waida kuziva Vafarisi kuti Jesu anotendehwa kushaba kana kuti haiwa. Iyena wakavonesa kuti itusu tinodikana kushaba paakati: “Ipanyi Sezari zviro zva Sezari, ipanyivo Mwari, zviro zva Mwari.”—Mateu 22:15-22.

Kwaingavo no mushabo wo nyagoso yainghwina no kubuda yo mudharaundhemo. Mushovo uu wo mushabo waipagahwi maicevera piketi, mumabhrinji, mumbhararano kana mumaghwiniro o dhorobha no mubazari.

Mushabo waidikana kushaba vaya vaitongwa ngo Varoma, waikura maningi. Mukuzwirana no musimuri wo ndhorondho yo Ciroma anozwi Tacitu, pa Utongi wa Tibherio Jesu paainga pasi pano, “Vasiriya no Vajudha, vakadeketera kuti vapungure mushabo ngokuti zvainga zvicivanesera maningi.”

Zvaivanesera maningi ngo manera ovaidikanaro kushaba. Ivona vainga vacinazve citendehwa co kuva vashabisi. Ngenyi? Ngokuti basa iri, rainga rapuwa vaya vaishaba mare yakawanda. Ivona vaizoita kuti vamweni vashabe kuti vaeje kuwana mare yakawanda. Zvinovoneka kuti Zakeu wainga ari umwe wo vashabisi ava. (Ruka 19:1, 2) Zvinozwisisika kuti vandhu, avaicaidakarira zvaitwaya. Cimwenizve, vandhu vainga no mavonero akashata ngo pamusoro po vandhu vaishaibisaya.