Kubahwa ko mwana kungadakajisa zve pamukuvo wondhowo kungaengejera mutoro ku varovorani. Inga vabari vapsa, mungakahamara ngo kuvona kuti mukuvo wenyu muzinji pomwe no simba zvicashandisihwa mu kutaja mwana wenyu. Kutama hope pamwepo no kucinja mumazwiro zvingatyisijira ushamwari hwenyu. Imwimwi no mudoni wenyu munozodikana kuita cinjo kuti mukorondhe mwana wenyu zve kungwarira mucadho wenyu. Ngwajo yo Bhaibheri ingamubeseresa kudini kuti muhwisane no zvineso izvi?

BHAIBHERI RINOTI KUDINI: “Rudo hunopfava, rudo hunothiva.” Cimwenizve, rudo “ahupsangi kuda kwahwo, ahuceneki.” (1 VaKorinto 13:4, 5) Inga mai vapsa, ingavo zvo cibarihwe mucazobatikana maningi pa kuvonerera mwana. Ngo kudaro, mwamuna wenyu angatanga kuzwa kurejwa-rejwa, ngo kudaro mucakanganwa kuti iyena anodavo kutajwa. No kusengerera zve kunaka mwoyo, mungabesera mwamuna wenyu kuzwa ecidiwa zve anobatanijwavo mukukorondha mwana wenyu.

‘Imwimwi vamuna garanyi no vakaji venyu kudari ngo kuziva.’ (1 Pedru 3:7, BAIBERI MAZWI AKACENA A MWARI) Zwisisanyi kuti mukaji wenyu acazopejera maningi simba rake ku mwana wenyu. Waano mutoro mupsa zve angazwa kubararika hwiru, kuremba kana kutonyangajwa ega. Pa mukuvo umweni, angaguma pakucamwira imwimwi, asi ejanyi kuramba makathiva, ngo kuti “ari nane mundhu anononoka kuceneka kupinda murhwi wakavanga.” (Mazwi Akangwara 16:32) Tatijanyi uzivi zve ipanyi mukaji besero rinodiwa.—Mazwi Akangwara 14:29.

ZVAMUNGAITA:

• Majibaba: Beseranyi mukaji wenyu pa kungwarira mwana, pikija huri usiku. Punguranyi nguva yamunopejera ku zviro zvimweni ngo kudaro mungakwanisa kupeja mukuvo muzinji no mukaji pomwe no mwana wenyu

• Majimai: Apo mwamuna wenyu anotatija kuda kumubesera ngo pamusoro po mwana, tenderanyi besero. Kudari mwamuna akakonehwa kunasa kuita ushoni zvaidikanaro kuithwa, mucamuvereketera, asi no kunaka mutatijenyi maitihwe azvo

BHAIBHERI RINOTI KUDINI:“Vovaviri vanozova nyama imwe.” (Genesi 2:24) Pikija hazvo maano mundhu mupsa mu mbhuri yenyu, ceukijanyi kuti imwimwi no mudoni wenyu mucindori “nyama imwe.” Itanyi masimba ari ese kuti ushamwari hwenyu hurambe hwakavanga.

Vakaji, bongeseanyi besero ro mwamuna wenyu. Magama enyu o kubonga angava ‘anorapa.’ (Mazwi Akangwara 12:18) Vamuna, bvunjanyi mukaji wenyu madire amunomuita pomwe no kumureremeja. Musimbenyi ngo njira jaanovonerera ndijona mbhuri.—Mazwi Akangwara 31:10, 28.

‘Mucadopsanga zvenyu basi. Rangariranyi zvo vamwenivo.’ (1 VaKorinto 10:24) Nguva jese itanyi zvakanaka ku mudoni wenyu. Inga varovorani, psakanyi mukuvo wo kuvereketa, kubonga zve kupurukira umwe kuno umweni. Pa shwiro yo zvo kuvatana, mucadova no umbau. Tajanyi zvinoda mudoni wenyu. Bhaibheri rinoti: ‘Musanyimana, kwega kuri ngo kutenderana.’ (1 VaKorinto 7:3-5, BMAA) Ngo kudaro bhuisananyi shwiro iyi muri vaviri. Kusengerera kwenyu zve kuzwisisa kunozovangisa ushamwari hwenyu.

ZVAMUNGAITA:

• Mucakanganwa kupsaka cimukuvo cenyu mega basi mo vaviri

• Itanyi zviro zvidoko zvinoita kuti mudoni wenyu azwe ecidiwa, inga kutara citsamba kana kumupa cipo citotori

BHAIBHERI RINOTI KUDINI: “Unoziva Matahwa a Mwari, kubva udoko hwako; iwona ano simba ro kukupa uzivi hunogumisa ku ruponeso.” (2 Timoti 3:15) Ronganyi kuti zvicinyi zvamungazoita kuti mujijise mwana wenyu. Iyena ano ungwaru hunoshamisa hwo kujija, pikija acito akabahwa. Pikija aciri mu ndani, mwana angaziva izwi renyu zve oita mukuzwirana no mazwiro enyu. Muverengerenyi paanonga aciri njece. Pikija hazvo acikazwisisi zvamuri kuverenga, zvingamubesera kuti adakajihwe ngo kuverenga paanonga akura.

Mwana wenyu asipi mudoko maningi kuti azwe zvamunovereketa ngo pamusoro pa Mwari. Muitenyi kuti azwe mukumbiro wenyu kuna Jehovha. (Deuteronòmio 11:19) Pikija pamunonga mecitamba mese, vereketanyi ngo zviro zvakaita Mwari. (Nduyo 78:3, 4) Apo mwana wenyu anokura, iyena anozozwa rudo hwenyu kuna Jehovha zve anozojijavo kuda Jehovha.

ZVAMUNGAITA:

• Itanyi mukumbiro mecikumbira kamare ungwaru kuti muroveje mwana wenyu

• Hwirijiranyi magama makuru zve murangariro ku mwana wenyu ngo kudaro iyena anozotanga kujija aciri mudoko