KUTANGISA MABHUYO
CIJIJO 3
Khombijanyi Unyasha
Ndhungamiriro: “Rudo huno unyasha.” —1 Vak. 13:4.
Jesu Wakaitenyi?
1. Vonanyi VHIDHIYO, kana verenganyi Johani 9:1-7. Perapo daviranyi muvhunjo jinotevera:
-
Ngozvapi zvakaita Jesu pakutanga, kureva kuti wakarapa bofu riya kana wakatanga ngo kuricumaera?—Vonanyi Johani 9:35-38.
-
Ngenyi mabhuire akaita Jesu akabesera mwanarume uwu kuti ade kuzwa masoko akanaka?
Tinojijenyi ngo muezaniso wa Jesu?
2. Mundhu anozoda maningi kuzwa masoko atiri kucumaera kudari akavona kuti tinoneseka ndiyena.
Tevejeranyi Jesu
3. Zwiranyi pena mundhuwo. Ejanyi kurangarira manera ari kujizwa.
-
Jivhunjisenyi kudari: ‘Ari kuneseka ngo pamusoro penyi? Ngozvapi zvingamubesera no kudakarira?’ Kuita izvi kunozomubesera kuti mukhombije unyasha ngo njira yocibarihwe no yokadi.
-
Vonesanyi kuti imwimwi muri kuneseka ngo zvamuri kuzwaro. Kudari mundhuwo akamuvhunja manera ari kujizwa kana cineso caari kusongana naco, mucacinja mabhuyo.
4. Bhuyanyi ngo njira yaushoni no inovonesa nderemejo. Pamunozwira pena mundhu, moda kamare kumubesera iyena anozozvivona ngo manera amunovereketa. Ngwariranyi zviro zvamunovereketa no manera amunozvivereketa mongwarira kubhuya magama anozomuhwaja.
5. Ivanyi mundhu anobesera. Psakanyi mukana jaushoni kuti mubesere mundhu ngo njira yaushoni. Kuva mundhu wakanaka mwoyo kungafunungura mukana kuitira kutangisa mabhuyo.
