Kutamikihwa ngo ari wese kunoviisa kuhwajihwa no matambujiko. Ndizvona zvinoitisa kuti Bhaibheri ridanije rufu inga muvengi. (1 Vakorinte 15:26) Pa cijijo 27, imwimwi makajija kuti Jehovha anozopeja muvengi uwu. Asi zvicinyi zvinozoitika kuno vandhu vakafa? Mu cijijo ici munozojija ngo pamusoro po cigondiso ca Jehovha cinodakajisa. Iyena anozomusa mamiriau no mamiriau o vandhu kuti vapone kwenda no kwenda. Kureva kuti izvi zvinozoitikadi kamare? Ivona vanozomuswa kuti vaponere kwapi? Kudenga kana kuti pasi pano?

1. Jehovha anoda kuitenyi kuno shamwari no ukama hwedu hwakafa?

Jehovha anoda maningi kumusa vandhu vakafa. Jobe mwanarume wainga akagondeka, wainga no cokwadi cokuti Jehovha aicaizomukanganwa paaizofa. Iyena wakati kuna Mwari: “Mungandidanija, inini ndingadavira [pandinonga ndiri mu Guva].”—Verenganyi Jobe 14:13-15.

2. Tinozvizivisa kudini kuti vakafa vanozomuswa?

Jesu paainga ari pasi pano, Jehovha wakamupekeja simba kuti amuse vandhu vakafa. Inga muezaniso, Jesu wakamusa cimusikane cogumi na maviri o makore no mwana umwe wo noni. (Marko 5:41, 42; Ruka 7:12-15) Jesu wakamusazve shamwari yake Razaro. Pikija Razaro wainga afa, wopeja njiku murongomuna naari muguva, Jesu wakamumusa. Jesu wakaita mukumbiro kuna Mwari perapo woti: “Razaro, budai kunja!” “Mundhu waingaya akafa wakabuda kunja.” (Johani 11:43, 44) Rangariranyi ngo mudakaro wakava no ukama no shamwari ja Razaro!

3. Ngoyapi vetero kuno shamwari no ukama hwenyu hwakafa?

Bhaibheri rinogondesa kuti: “Kunozowanika kumuka ko vakafa.” (Mabasa o Vapostori 24:15) Vandhu vakamuswa ndi Jesu kareko vainga vacizivi kwenda kudenga. (Johani 3:13) Ivona vakadakara maningi pavakamuswa kuti vaponezve pasi pano. Mukufananavo, sambiri pano Jesu anozomusa zviuru no zviuru zvo vandhu kuti vaponezve mu paradhiso pasi pano. Iyena wakananga kuti; “vese vari mu makuva anoceukijwa” vanozomuswa. (Johani 5:28, 29) Izvi zvinoreva kuti, vese vari mumurangariro wa Jehovha vanozoponazve. Pikija vaya vokuti apana acavaziva kuti vakamboponazve.—Johani 5:28, 29.

 NASANYI KUPSAKISISA

4. Jesu wakakhombija kuti anokwanisa kumusa vandhu vakafa

Jijanyi zvizinji ngo pamusoro po zvakaita Jesu kuno shamwari yake Razaro. Verenganyi Johani 11:14, 38-44, perapo bhuisananyi ngo muvhunjo jinotevera:

• Tinozvizivisa kudini kuti Razaro waingadi akafa? —Vonanyi vhesi 39.

• Jesu wakamusa Razaro kuti aponezve pasi pano. Kudari Razaro wainga akaenda kudenga, munorangarira kuti Jesu waizokwanisa kumumusa?

Rijanyi VHIDHIYO.

5. Vandhu vazinji vanozomuswa!

Verenganyi Nduyo 37:29, perapo bhuisananyi ngo muvhunjo unotevera:

• Mamiriau no mamiriau o vanozomuswa vanozoponera kwapi?

Kusiyapo kumusa basi vashandiri vakagondeka va Jehovha, Jesu anozomusavo vandhu vamweni. Verenganyi Mabasa o Vapostori 24:15, perapo bhuisananyi ngo muvhunjo unotevera:

• Ndiyani wamaidakarira kuvona akaperepo kumuswa?

• Vetero yo rumuko yakaembejera kudini no kuvangisa vabari va Ferisiti?

 ZVOTAJIJA

Bhaibheri rinogondesa kuti mamiriau no mamiriau o vandhu vakafa vanozomuswa. Jesu wakapuwa simba ndi Jehovha kuti amuse vandhu vakafa ngokuti iyena anoda kuti vaponezve.

Kuhwirijira

• Ngozvapi zvinokhombija kuti Jehovha na Jesu vanoda kumusa vandhu vakafa?

• Mamiriau no mamiriau o vandhu vanozomuswa vanozopona pasi pano kana kuti kudenga? Ngenyi muri kunanga kudaro?

• Ngo zvapi zvinomukhohwesa kuti shamwari no ukama hwenyu hwakafa hunozomuka?