Ukutshintshatshintsha komkhathi okwenzakala emhlabeni wonke kanye lokutshisa okungajayelekanga kuthwalisa abantu nzima. Nansi eminye imibiko emayelana lalokhu:

•   Umbiko okhitshwe yi-National Oceanic and Atmospheric Administration, U.S. Department of Commerce ngoJuly 13, 2023 uveza ukuthi eminyakeni engu-174 edlulileyo akukaze kutshise ngendlela okutshise ngayo ngenyanga kaJune e-America.

•   “Kutshisa ngendlela engajayelekanga e-Italy, eSpain, eFrance, eGermany lasePoland. Besekusithi esihlengeni seSicily leseSardinia kukhangelelwe ukuthi ukutshisa okulapho kudlule 48°C. Kuyabe kungokokuqala ukuthi kutshise ngalindlela eYurophu.”—Umbiko okhitshwe yi-European Space Agency ngoJuly 13, 2023.

•   “Njengoba umkhathi ulokhu utshintshatshintsha, kukhangelelwe ukuthi kuzatshisa kakhulu ikanti lezulu lizakuba linengi okokuthi lingabangela izikhukhula.”—UStefan Uhlenbrook owenhlanganiso ye-World Meteorological Organization, July 17, 2023.

 Imibiko emayelana lokutshintshatshintsha komkhathi okungajayelekanga iyakwethusa yini? Zwana ukuthi iBhayibhili lithini ngendaba le.

 Ukutshintshatshintsha komkhathi okubangela lokutshisa okungajayelekanga kuphakathi kwezinto uJesu athi zizakwenzakala ensukwini zokucina okuyizo esesiphila kuzo. Ngokwesibonelo wathi sizabona ‘izinto ezesabisayo.’ (ULukha 21:11) Ukutshintshatshintsha komkhathi kwenza abanengi bacabange ukuthi kuzacina kungasaphileki lapha emhlabeni.

 Hatshi. UNkulunkulu kasoze avume ukuthi umhlaba utshabalaliswe ngoba wawudala ukuze abantu bahlale kuwo nini lanini. (IHubo 115:16; UmTshumayeli 1:4) UNkulunkulu uthembisa ‘ukubhubhisa labo abawonakalisa umhlaba.’—ISambulo 11:18.

 IBhayibhili lisitshiya singathandabuzi ukuthi uNkulunkulu uzawuvikela umhlaba wethu ngoba ulamandla okwenza njalo.

•   “[UNkulunkulu] uyasithulisa isiphepho, amagagasi olwandle athule athi cwaka.” (IHubo 107:29) UNkulunkulu ulamandla okuqondisa imvelo, yikho kasoze avumele ukuthi abantu bathwale nzima kokuphela ngenxa yokutshintshatshintsha komkhathi.

•   “Uyawunakekela umhlaba, uwenze uvunde futhi uthele kakhulu.” (IHubo 65:9) UNkulunkulu uzakwenza ukuthi umhlaba ube lipharadayisi.

 Ukuze uthole okunengi ngokutshintshwa komhlaba usiba lipharadayisi, bala isihloko esithi “Who Will Save the Earth?”