¿Tlen tikchiuas para amo titlauanas?

ITECH achto tlamachtil otimotlapouijkej tlen okipanok Tony, pero tla ye kijtoskia tlen okipanouaya xamo amo oixpoliuiskia. Ye omokuayejyekouaya uelis nochipa koniskia miak alcohol porque amo omotaya kox oixuintiaya uan okijtouaya amo tlajyouiskia. ¿Tleka ijkon okipanok?

Porque sapanoua okoniaya alcohol, ik non, amo okimatiaya tlen opanouaya. Amo kuali omokuayejyekouaya porque itlalnamikilis amo kuali otekipanouaya. Ye nochipa okoniaya alcohol uan amo okimatiaya tlen okichiuaya.

Tony noijki amo okimatiaya monauatis uan otlakoniaya. Alberto noijki ijkon okipanok, okijtouaya amo sapanoua otlauanaya. Okijto: “Onikoniaya alcohol san ichtaka uan ijkuak sapanoua onitlauanaya amo onikitaya kox tlajtlakoli, ne san oniknekiaya nikonis alcohol”. Ik non, maski oksekimej okinmiluiayaj Tony uan Alberto sapanoua otlauanayaj, yejuan okijtouayaj amitlaj opanouaya, pero amo okitayaj alcohol okinnauatiaya. ¿Tlen uelis kinpaleuis akinmej ijkon kinpanoua?

Nin uelis tikchiuas

Miakej akinmej ayakmo tlauanaj okinpaleui tlen okijto Jesús: “Tla moixtololo non kajki moyekma mitstoktia xitlajtlakolchiwa, wejka xiktlamotla. Okachi kuali xikpolo itla de mokuerpo, iwa amo nochi mokuerpo makontlamotlakah miktla [noso mamiki]” (Mateo 5:29).

Ijkuak Jesús okijto itlaj xiktlamotla, kijtosneki ayakmo matikchiuakan nochi tlen kichiuas ayakmo matimouikakan iuan toTajtsin Dios. Maski ualeua titlajyouiskej uan yetoskia ken ijkuak itlaj techtekiliaj itech tocuerpo, techkokoua, techpaleuis para ayakmo san timokuayejyekojtoskej tikoniskej alcohol. Ik non, ijkuak ikaj mitsiluia ayakmo sapanoua xikoni alcohol, xikchiua tlen mitsiluia. a Tla ok tikneki tikonis alcohol, okachi kuali ayakmo xikoni nion tepitsin. Maski tikitas oui pero okachi kuali tiyetos.

Pero ¿tlen kipaleuis akin ualeua kipaktia tlauanas? Uan ¿tlen uelis kichiuas akin nochipa kineki konis alcohol?

¿Tlen uelis kipaleuis?

1. Nochipa ximotlatlaujti ika nochi moyolo. Nochtin akinmej kineltokaj toTajtsin Dios, Biblia kinmiluia: “Nochipa xikilikah n Toteko tlan nonkinekih keman nonmotiotsajtsiliah, xiktlajtlanilikah iwa ximotlasojkamatikah Iyolsewilis Dios, non amaka weleti kajsikamati, kimokuitlawis nomoyolo iwa nomotlayejyekolis por Cristo Jesús” (Filipenses 4:6, 7). Pero ¿tlen uelis tikiluis toTajtsin Dios para mamitsyolseui?

Moneki xikijto mitspaktia tikonis alcohol uan moneki xikseli mamitspaleuikan. Xikilui Jehová tlen tikneki tikchiuas para ayakmo nochipa tikonis alcohol uan ye mitspaleuis. Ijkon amo titlajyouis. Proverbios 28:13 kijtoua: “Akin kitlatia itlajtlakol amo kuali kisas, pero kiknomatiskej akin moyolkuitia uan kikaua itlajtlakol”. Jesús okijto ijkin matiktlatlaujtikan toTajtsin Dios: “Amo xiktekauili matechyoltilana tlajtlakoli uan techmakixti imak Satanás” (Mateo 6:13, TNM). Ijkon ken otimotlatlaujti, ¿ken tikteititis ayakmo tikneki nochipa tikonis alcohol? Uan ¿ken mitspaleuis toTajtsin Dios?

2. Tlen kijtoua Biblia mitspaleuis. Xikilnamiki “Itlajtol Dios yolitok iwa kipia weletílistli. [...] Iwa techajsikamatiltia tlan kuali iwa tlan amo kuali” (Hebreos 4:12). Miakej akinmej achto sapanoua otlauanayaj, okinpaleui nochipa kitlajtoltiskej uan mokuayejyekoskej tlen kijtoua Biblia. Salmista okijto: “Yolpaki tlakatl akin amo kikaki tlen kijtouaj akinmej amo yolkualmej, uan [...] ye moyolpaktia ika itlanauatil Jehová uan tonal uan youak ichtakatsin kitlajtoltia itlanauatil”. Ijkon “nochi tlen kichiuas kuali kisas” (Salmo 1:1-3).

Alberto omochijchika ayakmo nochipa konis alcohol porque omomachtiaya Biblia inmiuan iTlaixpantijkauan Jehová. Ye okijto: “Principios bíblicos onechpaleuijkej ayakmo manitlauana, ik non, ok niyoltok”.

3. Ximonauati. Biblia kijtoua sekimej otlauanayaj ijkuak ayamo opeuayaj kichiuaj ken Cristo pero omochipajkej “por Iespíritu Dios” (1 Corintios 6:9-11). ¿Tlen okinpaleui? Iespíritu santo toTajtsin Dios okinpaleui mamonauatikan, ijkon yejuan ayakmo otlauanayaj uan ayakmo omauiltiayaj. Ik non, Biblia kijtoua: “Amo ximotlawantikah, [...] okachi kuali, matemi nomoyolo ika n Espíritu, para ye manomechyakana” (Efesios 5:18; Gálatas 5:21-23). Jesús noijki okijto: “Nomotajtsi non kajki ilwikak nomechmakas n Espíritu Santo tla nonkitlajtlaniliskeh”. Ik non, “xiktlajtlanilikah Dios, iwa Ye nomechmakas” (Lucas 11:9, 13).

Akinmej kinekij kiyolpaktiskej Jehová moneki kimatiskej monauatiskej. Noijki moneki kitlajtoltiskej Biblia, momachtiskej uan motlatlaujtiskej ika nochi inyolo. Tla ikaj peua mosotlaua, makilnamiki tlen toTajtsin Dios kijtoua: “Pero akin kichiwa tlan kimonekiltia n Espíritu, kiselis nemílistli non ayik tlamis. Ijkó kiné, nochipa matikchiwakah tlan kuali iwa amo matimosotlawakah, porke ajsiki n tonati tipixkaskeh, tla amo timosotlawah” (Gálatas 6:8, 9).

4. Kuali xikpejpena akinmej inmiuan timouikas. Proverbios 13:20 kijtoua: “Akin nemi iuan akin ixtlamatki ye noijki yetos ixtlamatki uan akin mouika iuan akinmej amo yolkualmej kipanos tlen amo kuali”. Ik non, moneki xikinmilui akinmej inmiuan timouika amo tikneki titlauanas. Biblia kijtoua miakej ‘motlajtlachialtiah uan kinpojpouaj akinmej otlauanayaj [uan] omopaktijtinemiah itech ilwimej’ (1 Pedro 4:3, 4). Tla ijkon panoua okachi kuali ayakmo inmiuan matimouikakan.

5. Moneki kuali xikmati amo miak tikonis. Romanos 12:2 kijtoua: “Ayakmó xinemikah kemi nemih n tlaltikpaktlakah, yej xikpatlakah nomotlayejyekolis para ijkó manomechyankuili nomonemilis. Ijkó weletis nonkimatiskeh tlan kimonekiltia Dios, xikchiwakah tlan kuali, tlan kipaktia, iwa tlan yekmilajka”. Okachi tiyolpakis uan tikyolpaktis toTajtsin Dios tla timoyekanas ika principios bíblicos uan amo tikchiuas tlen oksekimej mitsiluiaj. Pero ¿ken tikmatis amo moneki tikonis miak alcohol?

Tla ijkuak tikoni alcohol uan tikmachilia yotiixuintik kijtosneki yotikonik miak alcohol. Ik non, tla tikonis alcohol moneki kuali xikmati amo miak tikonis, amo ximochia hasta tiixuintis. Xikilnamikto: Okachi kuali amo nikonis alcohol porque non kichiuas ok nitlauanas.

6. Xikijto amo. Tla tikijtoua “ejé”, “ejé”, noso tla “amó”, “amó”, ijkon xikchiua (Mateo 5:37). Ijkuak ikaj mitsiluis noso mitschiualtis xikoni alcohol moneki tikijtos amo. Pero moneki tikiluis ika tlakaitalistli. Colosenses 4:6 kijtoua: “Nomotlajtol nochipa mateyolpakti iwa amo xikinsojsotlawakah, iwa xikmatikah kenomi nontlanankiliskeh ijkuak itla nomechtlajtlaniskeh”.

7. Xikinmilui oksekimej mamitspaleuikan. Xikinmilui akinmej inmiuan timouika mamitspaleuikan para ayakmo tikonis alcohol uan ijkon timouikas iuan toTajtsin Dios. Biblia kijtoua: “Okachi kuali ome uan amo san se porque kipiaj kuali intetliokolil porque chikauak tekitij. Uan tla se uetsi, iyolikni uelis kipaleuis” (Eclesiastés 4:9, 10; Santiago 5:14, 16). Instituto Nacional sobre el Abuso del Alcohol y el Alcoholismo, tlen kajki ompa Estados Unidos okijtojkej: “Ijkuak tiknekis tikonis alcohol xikinmilui mofamiliares uan moyolikniuan mamitspaleuikan”.

8. Xikchiua tlen tikmati kuali. Santiago 1:22, 25 techiluia: “Nomejwah amo san xikkakikah itlajtol Dios, yej xikchiwakah tlan kijtoa, porke tla amo nonkichiwah san nonmokajkayajtokeh. Pero akin amo kilkawa tlan kikaki, iwa moyekketsa itech n yekmilajka tlanawátili iwa kimopantia, iwa kichiwa tlan kijtoa non tlanawátili, nochipa paktos ika tlan kichiwa”.

¿Tlen mitspaleuis ayakmo nochipa xikoni alcohol?

Sekimej san ualeua tlauanaj noso konij alcohol pero tla nochipa tlauanaj satepan ayakmo ueli kikauaj uan nochipa kinekij koniskej alcohol. Para ayakmo tlauanaskej amo san moneki kimatiskej monauatiskej, noijki porque kinekij mouikaskej iuan toTajtsin Dios. Alberto okijto: “Ijkuak onimochijchikauaya para ayakmo nitlauanas, sapanoua onitlajyouiaya, ijkon onikajsikamatki noijki omonekiaya manechpaleui se tlapajti”.

Miakej akinmej achto nochipa okinekiayaj koniskej alcohol noijki ijkon kijtouaj. bPara kuali mokuayejyekoskej uan ijkon kiyolpaktiskej toTajtsin Dios, sekimej omonekiaya kinuikaskej itech hospital uan ijkon kixikoskej ayakmo koniskej alcohol noso para kinmakaskej pajtli uan ijkon ayakmo kileuiskej alcohol. Jesús maski okimatiaya kinchiuas milagros okijto: “Tlakah non chikawakeh amo kimotlakewiah se tepajti, yej akimeh mokokoah” (Marcos 2:17).

¿Tleka moneki matikakikan toTajtsin Dios?

Tlen kijtoua Biblia iaxka toTajtsin Dios uan ye kineki amo matitlajyouikan, nochipa kuali matiyetokan. Maski yopanok veinticuatro xiuitl, Alberto ayakmo koni alcohol, okijto: “Oniyolpakik ijkuak onikmatki uelis ayakmo nitlauanaskia uan Jehová okinekiaya nechpaleuis, ye okajsikamatiaya ken onimomachiliaya uan onechpaleuiaya ijkuak okachi omonekiaya. Nochipa niktlasojkamatilis porque sapanoua onechpaleui”.

Ik non, tla nochipa tikneki tikonis alcohol amo ximosotlaua, miakej ijkon okinpanok ken te, pero axkan ayakmo konij alcohol noso konij san tepitsin. Yejuan yolpakij ijkon okichijkej uan te noijki ijkon timomachilis.

Tla tikpejpena san tepitsin tikonis alcohol noso ayakmo keman tikonis, xikilnamikto tlen Jehová kijtoua: “¡Oh, tla melauak tikinkakis notlanauatiluan! Moyolseuilis yetos ken se aueyatl uan momelajkayo ken olas tlen kipia ueyi atl” (Isaías 48:18).

[Notas]

[Recuadro uan foto]

 ¿Sapanoua nikoni alcohol?

Ximotlajtlani:

• ¿Axkan okachi nikoni alcohol?

• ¿San nochipa nikneki nikonis alcohol?

• ¿Nikneki nikonis itlaj okachi chikauak?

• ¿Nikoni alcohol ijkuak nimotekipachoua noso ijkuak itlaj nechpanoua?

• ¿Yonechilui se nofamiliar noso se noyolikni nikoni miak alcohol?

• ¿Yonimokualani inmiuan nofamiliares, akinmej inmiuan nitekipanoua noso ijkuak kanaj nipaxialoti porque nikoni alcohol?

• ¿Nochi semanas nikneki nikonis alcohol?

• ¿Nikualani ijkuak oksekimej amo tlakonij?

• ¿Amo nikijtoua kox nikoni miak alcohol?

Tla tikijtoua kema itech ninmej tlajtlanilmej, xamo moneki itlaj tikchiuas para ayakmo tikonis miak alcohol.

[Recuadro uan foto]

Tlen mitspaleuis xikpejpena kox tikonis alcohol

Tla tikonis alcohol ximotlajtlani:

• ¿Moneki manikoni alcohol?

Nin uelis tikchiuas: Tla mitspaktia tikonis miak alcohol okachi kuali amo xikoni nion tepitsin.

• ¿Nikonis miak noso san tepitsin?

Nin uelis tikchiuas: Kuali xikmati amo miak tikonis, amo xikkauili alcohol mamitsnauati.

• ¿Keman uelis nikonis alcohol?

Nin uelis tikchiuas: Amo xikoni alcohol tla tikuikas mocarro, titekipanos noso ijkuak timonechikos para timomachtis Biblia. Noijki amo xikoni alcohol tla tikpia mokonetsin uan ayamo nesi noso tikonitok pajtli.

• ¿Kanin uelis nikonis alcohol?

Nin uelis tikchiuas: Amo xikoni alcohol kanin miakej yauij, nion san ichtaka nion inmixpan akinmej amo konij alcohol.

• ¿Akinmej inmiuan uelis nikonis alcohol?

Nin uelis tikchiuas: Inmiuan akinmej kimatij monauatiskej uan amo inmiuan akinmej kinpaktia tlauanaskej.

[Recuadro uan foto]

Biblia okipaleui okse tlakatl ayakmo matlauana

Se tlakatl itoka Supot tlen chanti altepetl Tailandia okipaktiaya tlauanas, achto otlauanaya san youak pero satepan opejki tlauana nochi tonal. San okinekiaya tlauanas. Ijkuak opejki momachtia Biblia iuan iTlaixpantijkauan Jehová, okajsikamatki toTajtsin Dios amo kipaktia matitlauanakan, ik non, ayakmo otlauanaya pero satepan oksepa opejki tlauana, ifamilia sapanoua omoyolkokouaya.

Pero ye okitlasojtlaya Jehová uan okinekiaya kiueyichiuas. Tokniuan okiyolchikajkej uan noijki okinyolchikajkej isiua uan ome ikoneuan, okinmiluijkej omonekiaya amo makikauakan iselti. Ijkuak okitlajtolti 1 Corintios 6:10 kanin kijtoua amo yetoskej itech iTekiuajkayo toTajtsin Dios akinmej tlauanaj, okajsikamatki amo kuali tlen okichijtoka uan omonekiaya mochijchikauas para ayakmo tlauanas.

Ye okipejpenki ayakmo oksepa konis alcohol. Sapanoua okipaleui iespíritu santo toTajtsin Dios, tlen kijtoua Biblia, noijki ifamilia uan tokniuan, amo omosotla uan axkan ayakmo tlauana. Ifamilia sapanoua oyolpakik ijkuak omoapolakti ken iTlaixpantijka Jehová. Axkan tokni Supot kuali mouika iuan toTajtsin Dios ijkon ken achto okinekiaya uan kinpaleuia oksekimej noijki makixmatikan.